Ягья 11

Лазарал чан хтун

1-2Бетан лугьудай хуьре Майрамани адан вах Мартади уьмуьр тухузвай. Садра са папа, Реббидин кӀвачеривай атир галай гъери гуьцӀна, вичин чӀараривди михьнай. Гьа паб и кьве вахакай сад – Майрам – тир.

Абурун стха Лазар азарди кьунвай.

3Вахари Исадин патав «Я Агъа, Ви рикӀ алайди азарди кьунва» лугьуз сад ракъурнай.

4А хабар агакьайла, Исади лагьанай:

– А азарди адаз ажал гъидач, Лазар азарди кьуни Аллагьдал ва Адан Хцел баркалла гъида.

5Исадиз Марта, Майрам ва Лазар кӀандай. 6Лазар азарди кьунвайди я лагьана хабар фад агакьнайтӀани, Иса Вич авай чкада мадни кьве юкъуз амукьна. 7Идалай кьулухъ Ада Вичин тилмизриз лагьана:

– Ша чун мад Ягьудатдиз фин.

8– Я Муаллим! – лагьана тилмизри. – Гьа и йикъара чувудриз Ваз къван гуз кӀанзавай, амма Вун мад гьаниз физва.

9– Йикъа цӀикьвед сят авачни? – жаваб гана Исади. – Инсан рекьяй юкъуз физваз хьайитӀа, ам кӀвач галкӀана ярх жедач, адаз и дуьнья экуь яз аквазва. 10Йифиз физвайдан кӀвач адав экв гвачирвиляй са затӀунихъ галкӀида.

11И гафар лагьана, Ада давамар хъувуна:

– Чи дуст Лазар ахварал фенва, Зун ам ахварай авудиз физва.

12Адан тилмизри лагьана:

– Я Агъа! Ам ахвариз фенватӀа, сагъ хъжеда.

13Иса ам кьенвайдакай рахазвай, амма тилмизриз Ам гьакӀан ахварикай рахазвайди хьиз жезвай. 14Инал Исади ачухдиз лагьана:

– Лазар кьенва. 15Куьн имандал гъидай хьтин са кар авунин фикир авайвиляй, Зун икьван чӀавалди аниз фенвачир. Зун и кардал шад я. Гила ша чун адан патав фин.

16Кьветхвер лакӀаб алай ТӀумая тилмизриз лагьана:

– Ша чунни Муаллимдихъ галаз фин, Адахъ галаз санал рекьин.

17Иса Бетандиз атайла, Адаз Лазаран мейит кьуд йикъан вилик кьветӀе динжарнавайди чир хьана. 18Бетандилай Ярусалимдал кьван зур сятдин рехъ авай. 19Майраман ва Мартадин патав кьенвай стхадин башсагълугъвал гуз гзаф чувудар атанвай. 20Иса къвезвайдакай хабар хьайила, Марта Адан вилик экъечӀна; Майрам кӀвале амай. 21Мартади Исадиз лагьана:

– Я Агъа! Вун ина авайтӀа, зи стха рекьидачир. 22Амма заз чизва, исятдани вуч Вуна Аллагьдивай тӀалабайтӀа, гьам Ада Ваз гуда.

23– Ви стхадал чан хкведа, – лагьана Исади.

24– Къияматдин юкъуз адал чан хкведайди заз чизва, – лагьана Мартади.

25– Уьмуьр гузвайдини, кьейила чан хкизвайдини Зун я, – лагьана Исади. – Захъ иман ийизвайди кьейитӀани, адал чан хкведа. 26Захъ иман ийиз уьмуьр тухузвайди са чӀавузни рекьидач. Вун и кардин чӀалахъ яни?

27– Эхь, Агъа! – лагьана Мартади. – Вун Аллагьдин Хва я, Вун и дуьньядиз атана кӀанзавай Месигь тирдахъ зун агъазва.

28И гафар лагьана, Марта вичин вах Майраман патав хъфена. Ада Майрамаз чинеба эверна, лагьана:

– Муаллим ина ава, Ада ваз эверзава.

29И гафар ван хьанмазни Майрам тадиз къарагъна, Исадин патав фена. 30Иса хуьруьз гьахьнавачир, Ам Мартадал гьалтай чкадал аламай. 31Майрамахъ галаз кӀвале ацукьна башсагълугъвал гузвай чувудар, Майрам тади кваз кӀваляй экъечӀуниз килигна, адан гуьгъуьна гьатна фена. Абуруз Майрама, кьейи стха динжарнавай кьветӀен патав фена, ишел ийизвай хьиз хьанай. 32Майрам Иса алай чкадал атана. Ам акурла, Майрам Адан кӀвачерик ярх хьана.

– Я Агъа! – лагьана ада. – Вун ина авайтӀа, рекьидачир зи стха.

33Майрам ва адахъ галаз атай чувудар шехьзаваз акурла, Исадиз Вичизни гьайифар хьана. 34Ада гъалаба кваз хабар кьуна:

– Куьне ам гьина эцигнава?

– Фена Жув килиг, я Агъа! – жаваб гана абуру.

35Исадик шел акатна. 36Гьанал чувудри лагьана:

– Аквазвани Адаз Лазар гьикьван кӀанзавайтӀа!

37Амма абурукай са бязибуру лагьана:

– Адавай буьркьуьбурун вилериз экв хкиз жезва, бес Адавай Лазар кьиникьикай хуьз жедачирни?

38Иса, гьайифди куз, мейит авай кьветӀин патав атана. КьветӀин сивел къван алай. 39Исади лагьана:

– Анлай къван алуд.

Рагьметдиз фенвайдан ваха, Мартади, Адаз лагьана:

– Я Агъа! Адак ни акатнава; ам ина аваз кьуд югъ я.

40– За ваз лагьаначирни, иман ийизватӀа, Аллагьдин баркалла аквада? – лагьана Исади.

41Кьейиди авай кьветӀелай къван алудна. Исади кьил виниз хкажна, лагьана:

– Шукур хьуй Ваз, Буба, Ваз Зи ван атана. 42Зи ван Ваз датӀана къведайди Заз чизва, амма и гафар За инал алай халкь патал лугьузвайбур я. Къуй абур Зун Вуна ракъурнавайдан чӀалахъ хьурай.

43И гафарилай гуьгъуьниз Ада ван алаз гьарайна:

– Лазар, экъечӀ анай!

44Кьейиди анай къецел экъечӀна. Адал гъилерни кӀвачер кутӀуннавай кафанар аламай, адан чинни ягълухдал кутӀуннавай. Анал алайбуруз Исади лагьана:

– Адан гъилерни кӀвачер ахъая, адавай къекъвез хьурай.

Исадин аксина къаст

45Майрамаз башсагълугъвал гуз атай чувудриз Исадин керемат-ишара акурла, гзафбур Адахъ ийизвай имандал атана. 46Абурукай са бязибур фарисейрин патав фена, Исади авурдакай абуруз ахъайна. 47Гьа чӀавуз чӀехи хахамарни фарисеяр Меслягьатдиз кӀватӀ хьана:

– Чна вуч авун лазим я? А касди гзаф керемат-ишараяр къалурзава; 48Ам чна гьакӀ туртӀа, Адахъ вири халкьди иман ийида, гьаниз килигна, римвийрини атана чи Аллагьдин КӀвал барбатӀда ва чи халкь тергда.

49Абурукай гьа йисуз кьилин хахамдин везифа хиве авай Каяф тӀвар алай касди лагьана:

– Квез са затӀни чизвач. 50Битав са халкь рекьидалди, са кас рекьин хъсан я. Гьа и кар куь кьиле гьатзавачни бес?

51И гафар Каяфади вичи вичелай лагьай гафар тушир. Ам гьа йисуз кьилин хахамвиле авайвиляй, халкь хилас авун патал Иса рекьидайдакай Ада пайгъамбардиз хас саягъда лагьанай. 52Амма Иса тек са чувуд халкь патал рекьин лазим тушир. Ада дуьньядиз чкӀанвай Аллагьдин вири веледрикай Вичин кьиникьалди са халкь авунни лазим тир. 53Гьа йикъалай чувудрин кьиле авайбуру Иса яна кьин меслят авуна. 54ГьакӀ хьайила Иса мад чувудриз аквадай чкайриз хъфенач, Ам кьурумдин патав гвай Ифраим лугьудай шегьердиз фена. Ана Ам Вичин тилмизарни галаз акъвазна.

55Чувудрин Песагь сувар мукьва жезвай. Ярусалимдиз вири уьлкведай, Песагь суварилай вилик авуна кӀандай михьивилер авун патал, гзаф инсанар атанвай. 56Гьа вахтунда чувудар Исадихъ къекъвез хьанай. Абуру Аллагьдин КӀвале сада садавай хабар кьазвай:

– Ваз чиз, Ам Песагь суварик къведани?

57ЧӀехи хахамрини фарисейри, чпивай Иса кьаз жедайвал, Ам авай чкадикай чпиз хабар ая лагьана виридаз тагькимнай.

Selectat acum:

Ягья 11: ЛезПК

Evidențiere

Partajează

Copiază