JUAN 13
13
Si Jesus Nagahinaw sang mga Tiil sang Iya mga Gintoton-an
1Karon sa wala pa ang piesta sang Pascua, si Jesus nga nakahibalo nga nag-abut na ang iya takna nga magtaliwan sia sining kalibutan pakadto sa Amay, sang nakahigugma sang mga iya nga yari sa kalibutan, ginhigugma niya sila tubtub sa katapusan. 2Kag sa tion sang panihapon, ang yawa nga nakapasulud na sa tagiposoon ni Judas Iscariote, nga anak ni Simon, sang painoino sa pagtugyan sa iya, 3si Jesus, nga nakahibalo nga ang Amay nakatugyan sang tanan nga butang sa iya mga kamut, kag nga sia naggikan sa Dios kag nagakadto sa Dios, 4nagtindug sa panihapon, ginhal-id ang iya mga kunup, kag nagkuha sia sing inugpamahid kag ginwagkus niya. 5Niyan nagbobo sia sing tubig sa batiya, kag nagsugud sa paghinaw sang mga tiil sang mga gintoton-an, kag sa pagpahid sa ila sang inugpamahid nga nawagkus niya. 6Nag-abut sia kay Simon Pedro; kag si Pedro nagsiling sa iya, “Ginoo, hinawan mo bala ang akon mga tiil?” 7Si Jesus nagsabat sa iya, “Ang ginahimo ko wala mo mahibaloi karon, apang mahangpan mo ugaling.” 8Si Pedro nagsiling sa iya, “Dili ka gid maghinaw sang akon mga tiil.” Si Jesus nagsabat sa iya, “Kon indi ako maghinaw sa imo, wala ikaw sing bahin sa akon.” 9Si Simon Pedro nagsiling sa iya, “Ginoo, indi ang akon mga tiil lamang kondi ang akon mga kamut kag olo man!” 10Si Jesus nagsiling sa iya, “Ang nakapaligos indi kinahanglan magpanghinaw, luwas sa iya mga tiil lamang, kay matinlo sia sing bug-os; kag kamo matinlo, apang indi tanan kamo.” 11Kay nakilala niya ang matugyan sa iya; busa nagsiling sia, “Indi tanan kamo matinlo.”
12Sang nakahinaw sia sang ila mga tiil, kag nakasuklub sang iya mga kunup, kag nakalingkod liwat, nagsiling sia sa ila, “Nakahangup bala kamo sang nahimo ko sa inyo? 13Kamo nagatawag sa akon Manunudlo kag Ginoo; kag husto ang ginasiling ninyo, kay amo ako. 14Niyan kon ako, ang Ginoo kag Manunudlo ninyo, naghinaw sang inyo mga tiil, kamo man dapat maghinaway sang inyo mga tiil. 15Kay naghatag ako sa inyo sing solondan, agud nga kamo man maghimo sono sa nahimo ko sa inyo.#Luc. 22:27. 16Sa pagkamatuud, sa pagkamatuud, nagasiling ako sa inyo, ang ulipon indi daku pa sa iya agalon;#Mat. 10:24; Luc. 6:40; Juan 15:20. ukon ang ginpadala daku pa sa nagpadala sa iya. 17Kon nakahibalo kamo sining mga butang, bulahan kamo kon ginahimo ninyo sila. 18Ako wala nagapamolong nahanungud sa inyo tanan; ako nakakilala sang akon ginpili; apang agud nga matuman ang kasulatan, ‘Ang nagakaon sang akon tinapay nagbayaw sang iya tikod batok sa akon.’#Sal. 41:9. 19Karon nagasiling ako sa inyo sini, sa wala pa mahanabu, agud nga kon mahanabu ini magtoo kamo nga ako amo sia. 20Sa pagkamatuud, sa pagkamatuud, nagasiling ako sa inyo, ang nagabaton sa bisan kay sin-o nga ginapadala ko nagabaton sa akon; kag ang nagabaton sa akon nagabaton sa nagpadala sa akon.#Mat. 10:40; Mar. 9:37; Luc. 9:48; 10:16.”
Si Jesus Nagatagna sang Pagtugyan sa Iya
(Mat. 26:20-25; Mar. 14:17-21; Luc. 22:21-23)
21Sang nakasiling sini si Jesus, nalisang sia sa espiritu, kag nagpamatuud, “Sa pagkamatuud, sa pagkamatuud, nagasiling ako sa inyo, ang isa sa inyo magatugyan sa akon.” 22Ang mga gintoton-an nagtinolokay, nga nagaduhaduha kon nahanungud kay sin-o nagpamolong sia. 23Ang isa sang iya mga gintoton-an, nga ginhigugma ni Jesus, nagaidag sa dughan ni Jesus; 24gani si Simon Pedro nagsinyas kag nagsiling sa iya, “Sugiri kami kon nahanungud kay sin-o nagapamolong sia.” 25Sia nga nagaidag sa dughan ni Jesus nagsiling sa iya, “Ginoo, sin-o bala sia?” 26Si Jesus nagsabat, “Amo sia ang hatagan ko sang tinipik sang tinapay nga natusmug ko.” Gani sang natusmug niya ang tinipik sang tinapay, ginhatag niya ini kay Judas, ang anak ni Simon Iscariote. 27Niyan sang nakaon niya ang tinapay, si Satanas nagsulud sa iya. Si Jesus nagsiling sa iya, “Ang imo ginahimo, himoa sing madali.” 28Karon walay tawo sa latok nga nakahibalo sa ano nga katuyoan ginpamolong niya ini sa iya. 29Kay ang iban naghunahuna, bangud nga yara kay Judas ang puyo, nga si Jesus nagsiling sa iya, “Bakal ka sang kinahanglan ta sa piesta”; ukon, nga maghatag sia sa mga imol. 30Gani, sang nakabaton sia sang tinapay, naggowa sia sa gilayon; kag gab-i sadto.
Ang Bag-ong Sogo
31Sang nakagowa sia, si Jesus nagsiling, “Karon ang Anak sang tawo ginahimaya, kag ang Dios ginahimaya sa iya; 32kon ang Dios ginahimaya sa iya, ang Dios magahimaya man sa iya sa iya kaugalingon, kag sa gilayon himayaon niya sia. 33Mga anak, sa diotay pa nga tion kaupud ako ninyo. Kamo magapangita sa akon; kag sono sa ginsiling ko sa mga Judio gani karon ginasiling ko sa inyo, ‘Kon diin ako makadto indi kamo makakadto.’#Juan 7:34. 34Ako nagahatag sa inyo sing bag-ong sogo, nga maghigugmaanay kamo;#Juan 15:12, 17; 1 Juan 3:23; 2 Juan 5. subong nga ako naghigugma sa inyo, nga kamo man maghigugmaanay. 35Sa sini ang tanan nga tawo makahibalo nga kamo mga gintoton-an ko, kon maghigugmaanay kamo.”
Ang Pagpanghiwala ni Pedro Ginatagna
(Mat. 26:30-35; Mar. 14:26-31; Luc. 22:31-34)
36Si Simon Pedro nagsiling sa iya, “Ginoo, diin bala ikaw makadto?” Si Jesus nagsabat, “Kon diin ako makadto indi ka makasonod sa akon karon; apang magasonod ka ugaling.” 37Si Pedro nagsiling sa iya, “Ginoo, ngaa bala indi ako makasonod sa imo karon gid? Ihatag ko ang akon kabuhi tungud sa imo.” 38Si Jesus nagsabat, “Ihatag mo bala ang imo kabuhi tungud sa akon? Sa pagkamatuud, sa pagkamatuud, nagasiling ako sa imo, ang manuk indi pa makapamalo, tubtub nga mapanghiwala mo ako sing makatlo.
Selectat acum:
JUAN 13: ABHIL82
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Ang Biblia ©1982 Philippine Bible Society
