JUAN 12
12
Si Jesus Ginahaplas sa Betania
(Mat. 26:6-13; Mar. 14:3-9; Luc. 7:36-50)
1Sang anum ka adlaw sa wala pa ang Pascua nag-abut si Jesus sa Betania, diin si Lazaro, nga ginbanhaw ni Jesus. 2Ginhimoan nila sia sing panihapon didto; si Marta nag-alagad, apang si Lazaro isa sang mga naglingkod sa pagkaon kaupud niya. 3Si Maria nagkuha sing isa ka libra nga ihalaplas nga tunay nga nardo nga daku sing bili kag ginhaplasan niya ang mga tiil ni Jesus kag ginpahiran ang iya mga tiil sang iya bohok; kag ang balay natugub sang kaamyon sang ihalaplas. 4Apang si Judas Iscariote, isa sang iya mga gintoton-an (nga magatugyan sa iya), nagsiling, 5“Ngaa bala wala pag-ibaligya ining ihalaplas sing tatlo ka gatus ka denario,#12:5 Isa ka denario mga P.40. kag ihatag sa mga imol?” 6Nagsiling sia sini, indi kay nabalaka sia sa mga imol kondi kay makawat sia, kag subong nga yara sa iya ang poyo sang cuarta ginkuha niya ang ginsulud sini. 7Si Jesus nagsiling, “Tuguti ninyo sia sa pagtago sini sa adlaw sang paglubung sa akon. 8Ang mga imol kaupud ninyo sa gihapon,#Deut. 15:11. apang ako indi kaupud ninyo sa gihapon.”
Ang Himbon batok kay Lazaro
9Sang nakahibalo ang dakung kadam-an sang mga Judio nga yadto sia didto, nag-abut sila, indi bangud kay Jesus lamang kondi sa pagtan-aw kay Lazaro man, nga ginbanhaw niya. 10Gani ang puno nga mga sacerdote nagsinapul agud nga mapatay nila si Lazaro man, 11kay bangud sa iya madamu sang mga Judio ang nagabiya kag nagatoo kay Jesus.
Ang Madaugon nga Pagsulud sa Jerusalem
(Mat. 21:1-11; Mar. 11:1-11; Luc. 19:28-44)
12Sa adlaw nga madason ang daku nga kadam-an nga nag-abut sa piesta nakabati nga si Jesus nagapakari sa Jerusalem. 13Gani nagkuha sila sing mga paklang kag naggowa sa pagsugata sa iya, kag nagsinggit, “Hosanna!#Sal. 118:25. Pagdayawon ang nagakari sa ngalan sang Ginoo,#Sal. 118:26. ang Hari sang Israel!” 14Kag si Jesus nakakita sing bataon nga asno kag nagsakay sa sini; sono sa nasulat,
15“Dili ka mahadluk, babaying anak sang Sion;
yari karon, ang imo Hari nagakari,
nga nagasakay sa tinday sang asna!”#Zac. 9:9.
16Ang iya mga gintoton-an wala makahangup sini anay; apang sang nahimaya si Jesus, niyan nadumduman nila nga ini nasulat nahanungud sa iya kag ginhimo nila sa iya. 17Ang kadam-an nga nag-upud sa iya sang pagtawag niya kay Lazaro gikan sa lulubngan kag pagbanhaw sa iya nagsaksi. 18Sa sining kabangdanan man ang kadam-an nagkadto kag nagsugata sa iya kay nakabati sila nga nahimo niya ining tanda. 19Niyan ang mga Fariseo nagsinilingay, “Tan-awa wala kamo sing mahimo; yari karon, ang kalibutan nagsonod sa iya.”
Mga Greciahanon Nagapangita kay Jesus
20Karon may pila ka Greciahanon nga nagtaklad sa pagsimba sa piesta. 21Gani ini sila nagkadto kay Felipe, nga taga-Betsaida sa Galilea, kag nagpangayo sa iya, nga nagasiling, “Ginoo, buut kami magpakigkita kay Jesus.” 22Si Felipe nagkadto kag nagsugid kay Andres; si Andres nagkadto upud kay Felipe kag nagsugid sila kay Jesus. 23Kag si Jesus nagsabat sa ila, “Nag-abut na ang takna nga ang Anak sang tawo paghimayaon. 24Sa pagkamatuud, sa pagkamatuud, nagasiling ako sa inyo, kon ang binato sang trigo indi maholog sa duta kag mapatay, nagapadayon ini nga isa lamang; apang kon mapatay ini, nagapamunga sing madamu. 25Ang nagahigugma sang iya kabuhi nagadula sini, kag ang nagadumut sang iya kabuhi sa sining kalibutan magatipig sini sa kabuhi nga walay katapusan.#Mat. 10:39; 16:25; Mar. 8:35; Luc. 9:24; 17:33. 26Kon ang bisan sin-o nga tawo mag-alagad sa akon, magsonod sia sa akon; kag kon diin ako, didto man ang akon alagad; kon ang bisan sin-o nga tawo mag-alagad sa akon, sia padunggan sang Amay.
27“Karon nalisang ang akon kalag. Kag ano bala ang isiling ko, ‘Amay, luwasa ako sa sining takna’? Indi, tungud sa sining katuyoan nag-abut ako sa sining takna. 28Amay, himayaa ang imo ngalan.” Niyan nag-abut ang isa ka tingug gikan sa langit, “Ginhimaya ko na, kag himayaon ko ini liwat.” 29Ang kadam-an nga nagtindug didto nakabati sini kag nagsiling nga nagdaguub. Ang iban nagsiling, “Ang manugtunda naghambal sa iya.” 30Si Jesus nagsabat, “Ining tingug wala mag-abut bangud sa akon, kondi bangud sa inyo. 31Karon amo ang paghukom sining kalibutan, karon ang punoan sini nga kalibutan sobolon; 32kag ako, kon bayawon gikan sa duta, magabuyuk sang tanan nga tawo sa akon kaugalingon.” 33Ini ginsiling niya sa pagpakita kon sa anong kamatayon sia mapatay. 34Ang kadam-an nagsabat sa iya, “Nabatian namon sa kasogoan nga ang Cristo nagapadayon sa gihapon.#Sal. 110:4; Isa. 9:7; Ezeq. 37:25; Dan. 7:14. Paano nga nagasiling ka nga ang Anak sang tawo dapat bayawon? Sin-o bala ining Anak sang tawo?” 35Si Jesus nagsiling sa ila, “Sa diotay pa nga tion ang kapawa yara sa tunga ninyo. Lakat sa may kapawa pa kamo, agud nga ang kadudulman indi maglambut sa inyo; ang nagalakat sa kadudulman wala makahibalo kon diin sia nagakadto. 36Sang yara sa inyo ang kapawa, magtoo kamo sa kapawa, agud nga mangin-anak kamo sang kapawa.”
Ang Pagkadimatinoohon sang mga Judio
Ini ginpamolong ni Jesus, kag nagtaliwan sia kag nagpanago gikan sa ila. 37Apang bisan nakahimo sia sing tama kadamu nga tanda sa atubangan nila, wala gid sila magtoo sa iya; 38ini agud nga matuman ang polong ni Isaias nga manalagna nga ginpamolong niya:
“Ginoo, sin-o bala ang nagtoo sang amon balita,
kag kay sin-o bala napahayag ang butkon sang Ginoo?”#Isa. 53:1.
39Busa indi sila makatoo. Kay si Isaias nagsiling,
40“Ginbulag niya ang ila mga mata kag ginpatig-a ang ila tagiposoon,
basi kon makakita sila sa ila mga mata kag makahantup sa ila tagiposoon,
kag magliso agud nga ayohon ko sila.”#Isa. 6:10.
41Ini ginsiling ni Isaias bangud nga nakita niya ang iya himaya kag nagpamolong nahanungud sa iya. 42Walay sapayan bisan sa mga manugdumala madamu ang nagtoo sa iya, apang bangud sang mga Fariseo wala sila magtu-ad sini, basi kon sikwayon sila sa sinagoga; 43kay ginhigugma nila ang pagdayaw sang mga tawo sing labi pa sa pagdayaw sang Dios.
44Kag si Jesus nagsinggit kag nagsiling, “Ang nagatoo sa akon, wala nagatoo sa akon kondi sa nagpadala sa akon. 45Kag ang nakakita sa akon nakakita sa nagpadala sa akon. 46Nagkari ako nga kapawa sa kalibutan, agud nga ang bisan sin-o nga nagatoo sa akon indi magpabilin sa kadudulman. 47Kag kon ang bisan sin-o nga tawo magpamati sang akon mga polong kag wala magbantay sa ila, wala ako nagahukom sa iya; kay ako wala magkari sa paghukom sang kalibutan kondi sa pagluwas sang kalibutan. 48Ang nagasikway sa akon kag wala nagabaton sang akon mga polong may isa nga nagahukom sa iya; ang polong nga akon ginpamolong amo ang magahukom sa iya sa katapusan nga adlaw. 49Kay ako wala nagpamolong gikan sa akon kaugalingon; kondi ang Amay nga nagpadala sa akon nagsogo sa akon kon ano ang akon isiling kag kon ano ang akon ipamolong. 50Kag nakilala ko nga ang iya sogo kabuhi nga walay katapusan. Busa ang akon ginapamolong, ginapamolong ko sono sa ginsiling sa akon sang Amay.”
Selectat acum:
JUAN 12: ABHIL82
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Ang Biblia ©1982 Philippine Bible Society
