Иуан 20
20
ЯТӀОКӀЭНЭРЭШЪХЬ
Исус лӀагъэхэм къызэрахэтэджыкӀыжьыгъэр
(Маттэ 28:1-10; Марк 16:1-8; Лука 24:1-12)
1Тхьэмафэм иапэрэ мафэм#20:1 Тхьэмафэм иапэрэ мафэр – тхьаумафэ мафэр ары., пчэдыжьым жьэу, джыри мэзахэу, Магдалэ щыщ Мерэм къэунэм кӀуагъэ. ЗэкӀом, мыжъошхор къэунэм ӀугъэукӀорэикӀыгъэу ылъэгъугъ. 2Мерэм Симон Петрэрэ игъогу рыкӀохэрэм ащыщэу Исус анахь шӀу ылъэгъурэмрэ адэжь чъи, ариӀуагъ:
– Зиусхьаныр къэунэм чӀахыгъ, зыдахьыгъэри тшӀэрэп.
3Петрэрэ адрэ лӀэу Исус игъогу рыкӀорэмрэ унэм икӀыхи, къэунэмкӀэ ежьагъэх. 4ТӀури зэгъусэхэу чъагъэх, ау адрэ лӀэу Исус игъогу рыкӀорэр Петрэ нахьи нахь псынкӀэу чъи, апэ къэунэм нэсыгъ. 5Зиуфи, чӀаплъи, чэфынхэр щылъхэу ылъэгъугъ, ау къэунэм чӀэхьагъэп. 6Ащ ыуж итэу, Симон Петрэ къэси, къэунэм чӀэхьагъ. ЗычӀахьэм, чэфынхэр ащ дэжьым щылъхэу ылъэгъугъ, 7ау Исус ышъхьэ ещэкӀыгъэгъэ чэфыныр адрэ чэфынхэм абгъодэмылъэу, зэкӀоцӀыщыхьагъэу чӀыпӀэ шъхьаф щылъыгъ. 8ЕтӀанэ адрэ лӀэу Исус игъогу рыкӀорэу апэ къэсыгъагъэр къэунэм чӀэхьагъ. Ащи зэкӀэ ылъэгъуи, ышӀошъ хъугъэ; 9сыда пӀомэ, Тхьэм игущыӀэ тхыгъэхэм зэрарытым фэдэу, Исус лӀагъэхэм къахэтэджыкӀыжьын зэрэфэягъэр ахэмэ къагурыӀогъагъэгоп. 10ЕтӀанэ а лӀыхэу Исус игъогу рыкӀохэрэм ядэжь агъэзэжьыгъ.
Исус Магдалэ щыщ Мерэм зыкъызэрэригъэлъэгъугъэр
(Марк 16:9-11)
11Мерэм къэунэм дэжь щытэу гъыщтыгъ. Гъызэ къэунэм чӀэплъэнэу зызеуфэм, 12мэлэӀичӀитӀу фыжьыкӀэ фэпагъэхэу, Исус ихьадэ зыдэщылъыгъэм дэжь, зыр ышъхьэкӀэ адрэр ылъапэкӀэ, щысхэу ылъэгъугъ.
13– О бзылъфыгъ! Сыда узкӀэгъырэр? – къыраӀуагъ ахэмэ Мерэм.
– Си Зиусхьан ихьадэ чӀахыгъ, зыдахьыгъэри сшӀэрэп, – ариӀожьыгъ Мерэм.
14Ар къыӀуагъэу зыкъызызэрегъэзэкӀым, Исус щытэу ылъэгъугъ, ау ар зэрэ Исусыр ышӀагъэп.
15– О бзылъфыгъ, сыда узкӀэгъырэр? – къыриӀуагъ Исус. – Хэта узлъыхъурэр? Мерэм хатэм пэсырэ лӀыр арэу къышӀошӀи, риӀуагъ:
– Тхьэматэ, орымэ ар чӀэзыхыгъэр, зыдэпхьыгъэр къысаӀуи, сэ схьыжьыщт.
16– Мерэм! – къыриӀуагъ Исус. Ар зеӀом, Мерэм зыкъызэригъэзэкӀи, джуртыбзэкӀэ риӀуагъ:
– Раббуни! (Раббуним къикӀырэр «Дин ГъэсакӀор» ары.)
17– Укъызнэмыс, – къыӀуагъ Исус, – сыда пӀомэ, Ты лъапӀэм дэжь джыри сыдэкӀоежьыгъэгопышъ ары, ау сшыхэм#20:17 сшыхэр – зы диныр зылэжьыхэрэр ары. адэжь кӀуи, яӀу: «Сэ ся Тэ шъори шъуя Тэу, сэ си Тхьэу, шъори шъуи Тхьэм дэжь сыдэкӀоежьыщт».
18Ар къызыреӀом, Магдалэ щыщ Мерэм Исус игъогу рыкӀохэрэм адэжь кӀуи, Зиусхьаныр зэрилъэгъугъэри мы гущыӀэхэр къызэриӀуагъэхэри ариӀотэжьыгъ.
Исус игъогу рыкӀохэрэм зыкъызэраригъэлъэгъугъэр
(Маттэ 28:16-20; Марк 16:14-18; Лука 24:36-49)
19А тхьэмафэм иапэрэ мэфэ дэдэм пчыхьэм Исус игъогу рыкӀохэрэр унэ горэм щызэрэугъоигъэх. Джуртмэ ащыщынэщтыгъэхэти, унэу зыщызэӀукӀагъэхэм ипчъэхэр агъэпытагъэх. Джащыгъум Исус адэжь къакӀуи, пчэгум къиуцуи, къариӀуагъ:
– Гупсэф шъуиӀэу шъопсэу!
20Ар къызеӀом, ыӀэхэри ычапи къаригъэлъэгъугъ. Зиусхьаныр залъэгъум, игъогу рыкӀохэрэр гушӀуагъэх.
21– Гупсэф шъуиӀэу шъопсэу! – къариӀуагъ Исус джыри зэ. – Ты лъапӀэм сэ сыкъызэригъэкӀуагъэм фэдэу, сэри шъусэгъакӀо.
22Ар къызеӀо ужым, игъогу рыкӀохэрэм япщи, ариӀуагъ: – Тхьэм ы Псэ ЛъапӀэ шъугухэм арысэжъугъалъхь. 23ПсэкӀодхэр шъо зыфэжъугъэгъурэм фэгъущтых, зыфэшъумыгъэгъурэми фэгъущтхэп.
«О уси Зиусхьан ыкӀи уси Тхь» Фомэ Исус зэрэриӀуагъэр
24Исус игъогу рыкӀорэ нэбгырэ пшӀыкӀутӀумэ язэу Фомэу ТӀуазэкӀэ заджэхэрэр Исус къызэкӀом, адрэмэ ягъусагъэп.
25Адрэ лӀыхэу Исус игъогу рыкӀохэрэм къыраӀуагъ:
– Зиусхьаныр тлъэгъугъэ.
– ГъучӀыӀунэ опӀэ гъуанэхэр Исус ыӀэмэ атесымылъагъохэу, сэ сӀэхъуамбэ а гъучӀыӀунэ уапӀэ гъуанэхэм атесымылъхьэу, сэ сӀи Исус ычапэ тесымылъхьэу сшӀошъ хъущтэп, – ариӀуагъ Фомэ ахэмэ.
26Мэфий зытешӀэм ыуж, Исус игъогу рыкӀохэрэр джыри унэм исыгъэх, Фоми ягъусагъ. Пчъэхэр агъэпытагъэхэ пэтми, Исус къакӀуи, пчэгум къиуцуи, къариӀуагъ:
– Гупсэф шъуиӀэу шъопсэу!
27ЕтӀанэ Исус Фомэ риӀуагъ:
– О пӀэхъуамбэ моу къытелъхь, сӀэмэ къяплъ. ПӀи къэщэий, сэ счапэ къытелъхь, пшӀошъ мыхъоу ущымыт, шӀошъхъуныгъэ зигъаӀ.
28– О уси Зиусхьан ыкӀи уси Тхь! – риӀуагъ Фомэ Исус.
29– Сэ сыплъэгъугъэти, пшӀошъ хъугъэ, – къыриӀуагъ Исус. – Мы Ӏофхэр амылъэгъугъэхэ пэтми, шӀошъхъуныгъэ зиӀэ хъугъэхэр гъогу мафэ теуцуагъэх.
Мы тхылъыр зыкӀэттхыгъэр
30Мы нэшэнэ гъэшӀэгъонхэм анэмыкӀэу Исус игъогу рыкӀохэрэм апашъхьэ мы тхылъым имытхэу, нэшэнэ гъэшӀэгъон Ӏаджыхэри къыгъэлъэгъуагъэх. 31Ау мы Ӏофхэр зыкӀэттхыгъэр Исус Христос Тхьэм зэры КъомкӀэ шӀошъхъуныгъэ шъуиӀэ хъуныр ары, а шӀошъхъуныгъэмкӀи Исус ыцӀэкӀэ мыкӀодыжьын щыӀэныгъэ шъуиӀэ хъуныр ары.
Selectat acum:
Иуан 20: AdgNT14
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 1991, 1992, 2014. Стокгольм
