Иуан 21
21
ЯТӀОКӀЫРЭ ЗЫНЭРЭШЪХЬ
Исус игъогу рыкӀохэрэм ащыщхэу нэбгыриблымэ зыкъызэраригъэлъэгъугъэр
1Ащ нэуж Тибериадэ зыцӀэ псыхъураем#21:1 Тибериадэ зыцӀэ псыхъураер – Галилей псыхъураер ары. игъогу рыкӀохэрэм джыри зэ Исус зыкъаригъэлъэгъугъ. Ар зэрэхъугъэр мары: 2Симон Петрэрэ, Фомэу ТӀуазэкӀэ заджэхэрэмрэ, Галилей хэкум ит къуаджэу Канэ щыщ Натанаилрэ, Зебедей ыкъуитӀурэ, нэмыкӀ нэбгыритӀоу Исус игъогу рыкӀохэрэмрэ зэгъусагъэх.
3– Пцэжъыяшэ сыкӀощт, – ариӀуагъ Симон Петрэ адрэхэм.
– Тэри тыкъыбдэкӀощт, – къыраӀожьыгъ ахэмэ. ЕтӀанэ ежьэхи, къуашъом итӀысхьэхи, кӀуагъэх. А чэщым зи къаубытыгъэп.
4Нэф къызэшъым, Исус псыӀушъом Ӏутыгъ, ау ар зэрэ Исусыр игъогу рыкӀохэрэм ашӀэжьыгъэп.
5– Ныбджэгъухэр, – ариӀуагъ Исус, – пцэжъые къэшъуубытыгъа?
– Хьау, зи къэтыубытыгъэп, – къыраӀожьыгъ ахэмэ.
6– Къуашъом иджабгъу лъэныкъокӀэ хъытыур хэшъудзи, къэшъуубытыщт, – ариӀуагъ Исус. Ар къызеӀом, хъытыур хадзи, пцэжъыябэ хъытыум къызэрихьагъэм пае, хъытыур къыхахыжьын алъэкӀыгъэп.
7Игъогу рыкӀохэрэм ащыщэу Исус анахь шӀу ылъэгъурэм Петрэ риӀуагъ:
– Мыр Зиусхьаныр ары. Симон Петрэ ар зэрэ Зиусхьаныр зызэхехым, ищыгъын кӀыӀутелъ зыщихыгъагъэти, ар къызэрищэкӀыжьи, псым зыхидзагъ. 8Адрэ лӀыхэу Исус игъогу рыкӀохэрэм пцэжъыехэр зэрылъ хъытыур къыздалъэшъузэ, къуашъом исхэу къэсыгъэх, сыда пӀомэ, псыӀушъом пэчыжьэу щытыгъэхэп, Ӏэнтэгъу шъитӀум фэдиз ныӀэп зэрэпэчыжьагъэхэр. 9ПсыӀушъом къэзынэсхэм, шӀомыкӀ машӀор хэгъэнагъэу, ащ пцэжъые телъэу, хьалыгъуи бгъодэлъэу алъэгъугъ.
10– Джы къэшъуубытыгъэ пцэжъыехэм ащыщ къэшъухь, – ариӀуагъ Исус.
11Симон Петрэ къуашъом дэжь кӀуи, пцэжъые инхэр зэрыз хъытыур Ӏушъом къытырилъэшъуагъ. Пцэжъыехэу хъытыум илъыгъэхэр шъэрэ шъэныкъорэ щырэ хъущтыгъэ. Ащ фэдиз илъыгъэми, хъытыур зэӀэтхъыгъэп.
12– ШъукъакӀуи, пчэдыжьышхэ шъушӀы, – ариӀуагъ Исус.
– О хэт ущыща? – ыӀоу, игъогу рыкӀохэрэм ащыщэу зи Исус къеупчӀынэу тегушхуагъэп. Ар зэрэ Зиусхьаныр ашӀагъ. 13Исус къакӀуи, хьалыгъур къышти, аритыгъ. Ащ фэдэу пцэжъыехэри аритыгъ. 14Исус лӀагъэхэм къызахэтэджыкӀыжь ужым, игъогу рыкӀохэрэм зыкъызэраригъэлъэгъугъэр мыр ящэнэрагъ.
Исус Петрэ зэрэдэгущыӀагъэр
15Зэшхэхэм ыуж, Исус Симон Петрэ еупчӀыгъ:
– Иуан ыкъо Симон, мыхэм сызэралъэгъурэм нахьи нахь шӀу сыолъэгъуа?
– Ары, Зиусхьан, – къыриӀожьыгъ Петрэ. – ШӀу узэрэслъэгъурэр о ошӀэ.
– Сэ сишъынэхэр гъэхъух, – риӀуагъ Исус.
16– Иуан ыкъо Симон, шӀу сыолъэгъуа? – еупчӀыгъ ятӀонэрэу Исус Петрэ.
– Ары, Зиусхьан, – къыриӀожьыгъ Петрэ. – ШӀу узэрэслъэгъурэр о ошӀэ.
– Сэ симэлхэм Ӏахъо афэхъу, – риӀуагъ Исус.
17– Иуан ыкъо Симон, шӀу сыолъэгъуа? – еупчӀыгъ ящэнэрэу Исус Петрэ. «ШӀу сыолъэгъуа?» ыӀуи, ящэнэрэу Исус зэреупчӀыгъэм пае, Петрэ ыгу къеуи, къыриӀожьыгъ:
– Зиусхьан, зэкӀэри о ошӀэ, шӀу узэрэслъэгъурэри ошӀэ.
– Симэлхэр гъэхъух, – риӀуагъ Исус. 18– Шъыпкъэ дэдэр осэӀо, уикӀэлэгъум ор-орэу убг бгырыпх иплъхьэти, узыфаем укӀощтыгъ. Ау жъы узыхъукӀэ, о пӀэхэр фэпщэйхэзэ, нэмыкӀ горэм бгырыпхыр убг къырилъхьанышъ, уздэкӀонэу узыфэмыем уищэщт.
19Исус ащ фэдэу зыкӀыриӀуагъэр лӀакӀэу Петрэ фэхъущтэу#21:19 лӀакӀэу Петрэ фэхъущтыр – Петрэ къащым тыраӀулӀэнышъ, агъэлӀэныр ары; сыда пӀомэ, зыгорэ къащым зытыраӀулӀэрэм, кӀапсэкӀэ е бгырыпхыкӀэ ыӀэхэр къащым тырапхэщтыгъэх., Тхьэм щытхъушхо зэрыфишӀыщт шӀыкӀыр гуригъэӀоныр арыгъэ. Исус ащ етӀанэ риӀуагъ:
– Сэ сауж къырыкӀу.
Исусрэ игъогу рыкӀохэрэм ащыщэу анахь шӀу ылъэгъурэмрэ
20Петрэ зыкъызызэрегъэзэкӀым, игъогу рыкӀохэрэм ащыщэу Исус анахь шӀу ылъэгъурэр ауж итэу къакӀоу ылъэгъугъ. А лӀыр ары пчыхьэшъхьашхэм дэжь Исус къыбгъодэсэу Ӏэнэм пэсэу къезыӀогъагъэр:
– Зиусхьан, хэт тетыгъо зиӀэхэм уязгъэубытыщтыр?
21Петрэ а лӀыр зелъэгъум, Исус къеупчӀыгъ:
– Зиусхьан, мы лӀыр сыдэу хъущт?
22– Сэ дунаим къэсэгъэзэжьыфэ, ар щыӀэнэу сыфаемэ, сыда уиӀофэу ащ хэлъыр? – риӀожьыгъ Исус. – О сауж къырыкӀу!
23Аущтэу, «А лӀэу Исус игъогу рыкӀорэр лӀэщтэп» зыӀорэ къэбар шӀошъхъуныгъэ зиӀэ къошхэм ахэхьагъ. Ары шъхьакӀэ, «Ар лӀэщтэп» ыӀоу, Исус Петрэ къыриӀогъагъэп. Исус къыриӀогъагъэр мары: «Сэ къэсэгъэзэжьфэ, ар щыӀэнэу сыфаемэ, сыд уиӀофэу ащ хэлъыр?»
24А лӀэу Исус игъогу рыкӀорэр ары мы Ӏофхэр къэзыушыхьатырэри ахэр зытхыгъэри. Ащ къыушыхьатырэр зэрэшъыпкъэр тэ тэшӀэ.
25Исус нэмыкӀ Ӏофыбэхэри ышӀагъ. СызэрэгугъэрэмкӀэ, ахэр зэкӀэ зырызэу тхыгъэхэмэ, тхыгъэн фэе тхылъхэр дунаим тефэщтыгъэхэп. Амин.
Selectat acum:
Иуан 21: AdgNT14
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 1991, 1992, 2014. Стокгольм
