Иуан 12
12
ЯПШӀЫКӀУТӀОНЭРЭШЪХЬ
Мерэм осэшхо зиӀэ дагъэр Исус ылъакъохэм зэращифагъэр
(Маттэ 26:6-13; Марк 14:3-9)
1МэфэкӀ мэфэшхоу Ӏутыжъ зыцӀэр къэсынкӀэ мэфих къэнагъэу, Исус къуаджэу Бет-Ание къэкӀуагъ. Лазарэу Исус лӀагъэхэм къахигъэтэджыкӀыжьыгъэр ащ щыпсэущтыгъ. 2Исус пчыхьэшъхьашхэ къыфагъэхьазырыгъ, Марти бысымгощагъ. Исус игъусэу Ӏанэм пэсыгъэхэм Лазари ахэсыгъ. 3Джащыгъум Мерэм нард дэгъэ#12:3 нард дагъ – Гималай къушъхьэхэм лъагэу (3500-5500 м) къащыкӀырэ нард зыфаӀорэ уцым ылъапсэ е чӀым нахь пэблэгъэ ыпкъ къыкӀафэу, мэ ӀэшӀу зыпихырэ дагъэр ары. Чыжьэу къызэрэращырэм а дагъэр лъэпӀэ дэдэ ышӀыщтыгъэ. къабзэу, осэшхо зиӀэу, мэӀэшӀу зыпихырэр зэрыт дэгъалъэр къышти, Исус ылъакъохэм ащифи, ышъхьацкӀи ылъэкӀыжьыгъэх. Дагъэм къыпихырэ мэ ӀэшӀур унэм изы хъугъэ.
4Ау Исус игъогу рыкӀохэрэм ащыщэу Иудэ Искариотэу, Исус тетыгъо зиӀэхэм язгъэубытыщтым къыӀуагъ:
5– Мы дагъэу осэшхо зиӀэр динар шъищкӀэ тщэу тхьамыкӀэхэм сыда зыкӀятымытыгъэр?
6Иудэ ар зыкӀиӀуагъэр тхьамыкӀэхэм ыгу афэгъукӀэ арэп, тыгъокӀуагъэти ары нахь. Ащ ахъщалъэр ыӀыгъыгъэти, ахъщэу ащ ралъхьэрэм хэтыгъухьэщтыгъ.
7– Мы бзылъфыгъэм ыуж икӀ, – къыӀуагъ Исус. – Сэ сызщычӀалъхьажьыщт мафэм пае мы дагъэр сфиӀыгъыгъ. 8Сыда пӀомэ, тхьамыкӀэхэр шъо къышъухэт зэпытых, ау сэ сышъухэт зэпытыщтэп.
9ЦӀыф купышхоу джуртхэм ащыщхэм Исус ащ дэжь зэрэщыӀэр зэхахыгъэти, къэкӀуагъэх, ау къызфэкӀуагъэхэр Исус изакъоп, Лазарэу лӀагъэхэм къахигъэтэджыкӀыжьыгъэри зэрагъэлъэгъунэу арыгъэ. 10Аущтэу дин пэщэшхохэм Лазари аукӀынэу рахъухьагъ, 11сыда пӀомэ, Лазар пае джуртыбэхэр ятхьэматэхэм агокӀыхи, ИсускӀэ шӀошъхъуныгъэ яӀэ хъугъэ.
Щытхъушхо иӀэу Исус Ерусалим зэрэдэхьагъэр
(Маттэ 21:1-11; Марк 11:1-11; Лука 19:28-40)
12ЯтӀонэрэ мафэм мэфэкӀ мэфэшхом пае къэкӀогъэ цӀыф купышхохэм Исус Ерусалим къызэрэкӀорэр зэхахыгъ. 13Зызэхахым, пальмэ чъыгым#12:13 пальмэ чъыгыр – хъурмэ чъыгыр ары. икъутамэхэр аштэхи, Исус пэгъокӀынхэу дэкӀыгъэх, мэкъэшхокӀэ къаӀозэ:
– Хьусаннэ!#12:13 Хьусаннэ – щытхъу гущыӀ. Израиль ипачъыхьэу Зиусхьаным ыцӀэкӀэ къакӀорэм щытхъушхор ий!
14ЕтӀанэ Исус зы щыд къунан къыгъоти, тетӀысхьагъ, Тхьэм игущыӀэ тхыгъэхэм зэрарытым фэдэу,#12:14-15 Тхьэм игущыӀэ тхыгъэхэм зэрарытым фэдэу – еплъ Пегъымбар Ешайа тхылъэу ытхыгъэм 40:9; Пегъымбар Зэчрей тхылъэу ытхыгъэм 9:9.
15«Умыщын, къалэу Цион. Мары, уипачъыхьэ щыд къунаным тесэу къэкӀо».
16Исус игъогу рыкӀохэрэм а хъугъэ-шӀагъэм къикӀырэр къагурыӀуагъэп, ау Исус щытхъушхо иӀэ хъугъэу, уашъом зыдэкӀоежьым ыуж, Исус ехьылӀагъэу Тхьэм игущыӀэ тхыгъэхэм а гущыӀэхэр зэрарытхэри, а гущыӀэхэм атетэу цӀыфхэр Исус зэрэдэзекӀуагъэхэри агу къэкӀыжьыгъ.
17ЦӀыфхэу купышхом хэтхэу Исус игъусагъэхэм адрэ цӀыфхэм араӀуатэ зэпытыщтыгъ, Исус Лазар еджи, къэунэм къычӀигъэкӀыжьи, лӀагъэхэм къызэрахигъэтэджыкӀыжьыгъэр. 18А нэшэнэ гъэшӀэгъоныр къызэригъэлъэгъуагъэр цӀыфыбэмэ зэхахыгъэти, Исус пэгъокӀынхэу дэкӀыгъэх. 19Ар залъэгъум, фарисеймэ зэраӀожьыгъ:
– Шъуеплъ, ащ зи ешъушӀэн зэрэшъумылъэкӀырэр шъолъэгъу. Мары, дунаим ицӀыф пстэури ащ ыуж ехьэ.
Исус ежь зэраукӀыщтыр къызэриӀуагъэр
20МэфэкӀ мэфэшхом Тхьэм елъэӀунхэу къэкӀуагъэхэм алыдж цӀыф заулэхэр ахэтыгъэх. 21Ахэр Галилей хэкум ит къалэу Бет-Сайдэ#12:21 къалэу Бет-Сайдэ – еплъ 1:44. щыщ Филипп дэжь кӀохи, елъэӀугъэх:
– Тхьэматэ, Исус тлъэгъунэу тыфай.
22Филиппи кӀуи, Индрыс риӀуагъ. ЕтӀанэ Филиппрэ Индрысрэ кӀохи, Исус раӀуагъ.
23– ЦӀыф Лъэпкъым ы Къо ищытхъушхо цӀыфхэм зыщалъэгъущт сыхьатыр къэсыгъ, – къариӀуагъ Исус. 24– Шъыпкъэ дэдэр шъосэӀо, коцыцэр чӀыгум хафэу мылӀэмэ, изакъоу къэнэжьы, ау чӀыгум хафэу зылӀэкӀэ, гъэбэжъушхо къыхьыщт. 25Зыпсэ шӀу зылъэгъурэм ыпсэ шӀокӀодыщт, ау зыпсэ мы дунаим щызыуджэгъурэм сыдигъуи щыӀэнэу къыгъэнэжьыщт. 26Сэ къысфэлажьэрэр сауж къырэрэкӀу. Сэ сыздэщыӀэми къысфэлажьэрэри щыӀэщт. Сэ зыгорэ къысфэлажьэмэ Ты лъапӀэм ащ лъытэныгъэ фишӀыщт.
27– Джы сэгумэкӀы. Сыд сӀона? Сэ ся Т, мы къиныгъом сыхэхыжь есӀона? Мы къиныгъор сщэчынэу ары дунаим сыкъызфэкӀуагъэр. 28Сэ ся Т, о пцӀэ ищытхъушхо цӀыфхэм ягъэлъэгъу. Исус ар зеӀом, уашъом макъэ къиӀукӀыгъ:
– Сэ сцӀэ ищытхъушхо цӀыфхэм язгъэлъэгъугъ, джыри язгъэлъэгъущт.
29ЦӀыф купышхом хэт цӀыфхэу ащ дэжьым щытхэм ар зызэхахым, аӀуагъ:
– Ар шыблэ гъогъо макъ.
– МэлэӀич горэ ащ къыдэгущыӀагъ, – аӀуагъ нэмыкӀхэм.
30– Мы макъэр сэщ пае къэӀугъэп, шъощ пае нахь, – къыӀуагъ Исус. 31– Джы Тхьэм дунаим ицӀыфхэм хьыкум атыришӀыхьащт. Джы Тхьэм мы дунаим ипщ#12:31 мы дунаим ипщ – шэйтаныр ары. тыридзыщт. 32Ау цӀыфхэм сэ сыкъызаӀэтыкӀэ,#12:32 сыкъызаӀэтыкӀэ – еплъ 3:14. цӀыф пстэури садэжь къэсщэщт.
33Ежь зэрэлӀэщт шӀыкӀэр ахэмэ агуригъэӀоным пае, Исус а гущыӀэхэр къыӀуагъ.
34– Христос егъашӀэми зэрэщыӀэщтыр Тэурат хабзэм тигъэшӀагъ, – къыриӀуагъ цӀыф купышхом. – ЦӀыфхэм ЦӀыф Лъэпкъым ы Къо къызэраӀэтыщтыр къэоӀо, ар сыдэу хъура? ЦӀыф Лъэпкъым ы Къоу зыфапӀорэр хэта?
35– Нэфынэр джыри зы тӀэкӀурэ къышъухэтыщт, – ариӀуагъ Исус ахэмэ. – ШӀункӀыр къышъутемыоу нэфынэр шъуиӀэфэ шъукӀу. ШӀункӀым хэтэу зекӀорэм зыдакӀорэр ышӀэрэп. 36Нэфынэм ибын шъухъуным пае, нэфынэр шъуиӀэфэ, нэфынэмкӀэ шӀошъхъуныгъэ зижъугъаӀ. А гущыӀэхэр Исус къызеӀохэм ыуж, ахэмэ ахэкӀи, амылъэгъужь хъугъэ.
Джуртхэм яшӀошъмыхъуныгъ
37Исус ащ фэдиз нэшэнэ гъэшӀэгъонхэр ахэмэ апашъхьэ къыщигъэлъэгъуагъэхэми, ежьыркӀэ шӀошъхъуныгъэ яӀэ хъугъэп. 38Аущтэу зыфэхъугъэр мы гущыӀэхэу пегъымбар Ешайа къыӀуагъэхэр#12:38 пегъымбар Ешайа къыӀуагъэхэр – еплъ Пегъымбар Ешайа тхылъэу ытхыгъэм 53:1. къэшъыпкъэжьынхэр ары:
«Зиусхьан, къэбарэу дгъэӀугъэр хэта зышӀошъ хъугъэр? Тхьэу Зиусхьаным ыкӀочӀэшхуи хэта нафэ зыфэхъугъэр?»
39А гущыӀэхэр шъыпкъэх. А цӀыфхэм шӀошъхъуныгъэ яӀэ хъун алъэкӀыщтыгъэп, сыда пӀомэ, пегъымбар Ешайа итхылъ итэу нэмыкӀ чӀыпӀэм къызэрэщиӀуагъэм фэдэу,#12:39-40 пегъымбар Ешайа къызэриӀуагъэм фэдэу – еплъ Пегъымбар Ешайа тхылъэу ытхыгъэм 6:10.
40«Тхьэм ахэмэ анэхэр нэшъоу къыгъэхъугъэх, агухэри гуркъэхэу къыгъэхъугъэх. Аущтэу анэхэмкӀэ алъэгъурэп, агухэмкӀи къагурыӀорэп, ыгъэхъужьынхэм паий, Тхьэм дэжь агъэзэжьрэп».
41Пегъымбар Ешайа Исус щытхъушхоу иӀэн фэягъэр зэрилъэгъугъэм пае, а гущыӀэхэр къыӀуагъ. Зигугъу ышӀыгъэр Исус ары.
42Ау щытми, джурт тхьэматэхэм ащыщхэу бэмэ ИсускӀэ шӀошъхъуныгъэ яӀэ хъугъэ, ау цӀыфмэ апашъхьэ ар къыщаӀуагъэп, «Синэгогум тыкъычӀафыщт» аӀозэ, фарисейхэм ащыщынэщтыгъэхэти. 43Сыда пӀомэ, Тхьэм ищытхъу нахьи цӀыфмэ ящытхъу нахь шӀу алъэгъущтыгъ.
44ЕтӀанэ Исус мэкъэшхокӀэ къыӀуагъ:
– СэркӀэ шӀошъхъуныгъэ зиӀэ хъурэм шӀошъхъуныгъэ зыфыриӀэ хъурэр сизакъоу арэп, сыкъэзгъэкӀуагъэмкӀи шӀошъхъуныгъэ иӀэ мэхъу. 45Сэ сызылъэгъурэм сыкъэзгъэкӀуагъэри елъэгъу. 46СэркӀэ шӀошъхъуныгъэ зиӀэр шӀункӀым къыхэмынэным пае, нэфынэу дунаим сыкъэкӀуагъ.
47– Сэ сигущыӀэхэр зэхэзыххэу, ахэмэ ямыдэӀурэр згъэмысэщтэп. Сыда пӀомэ, дунаим ицӀыфхэр згъэмысэнхэу арэп сыкъызфэкӀуагъэр, ахэр мыкӀодхэу къэзгъэнэжьынхэу ары нахь. 48Сэ сызэзымыпэсэу сигущыӀэхэри зымыдэрэм ежь зыгъэмысэн иӀ. ГущыӀэхэу къэсӀуагъэхэм ахърэт мафэм а цӀыфыр агъэмысэщт. 49Сыда пӀомэ, сэр-сэрэу сигущыӀэхэр къэсӀуагъэхэп, ау Ты лъапӀэу сыкъэзгъэкӀуагъэм къэсӀощтхэр унашъо къысфишӀыгъ. 50Ащ иунашъо цӀыфхэм мыкӀодыжьын щыӀэныгъэ яӀэ зэригъэхъурэр сэшӀэ. Арышъ, къасӀохэрэр зэкӀэ Ты лъапӀэм къызэриӀуагъэм тетэу сэ къэсэӀожьых.
Selectat acum:
Иуан 12: AdgNT14
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 1991, 1992, 2014. Стокгольм
