Иуан 11
11
ЯПШӀЫКӀУЗЭНЭРЭШЪХЬ
Лазар зэрэлӀагъэр
1Лазар зыцӀэ лӀы горэ сымэджагъ. Ар къуаджэу Бет-Ание#11:1 къуаджэу Бет-Ание – Ерусалим километрищкӀэ пэчыжьэу, итемыр тыгъэ къокӀыпӀэ лъэныкъомкӀэ ит. щыщыгъ. Мерэми ышыпхъу Марти а къуаджэм щыпсэущтыгъэх. 2А Мерэмыр#11:2 А Мерэмыр – еплъ 12:1-8. ары осэшхо зиӀэ дагъэр Зиусхьаным ылъакъохэм ащифи, ышъхьацкӀэ зылъэкӀыжьыгъэр. Ащ ыш Лазар ары сымэджагъэр. 3Арыти, зэшыпхъуитӀум Исус лӀыкӀо фагъакӀуи, рырагъэӀуагъ:
– Зиусхьан, о шӀу плъэгъурэр сымадж.
4Исус ар зызэхехым, къыӀуагъ:
– А узыр лӀэныгъэ къызхэкӀырэ узэп, Тхьэм щытхъушхо фэзышӀыщт уз нахь. А узым къыхэкӀыкӀэ цӀыфхэм Тхьэм ы Къо щытхъушхо фашӀыщт.
5Марти, Мартэ ышыпхъуи, Лазари Исус шӀу ылъэгъущтыгъэх. 6Лазар зэрэсымаджэр Исус зызэхехым, зыдэщыӀэ чӀыпӀэм джыри мэфитӀукӀэ къэнагъ 7Ащ нэуж игъогу рыкӀохэрэм ариӀуагъ:
– Иудей хэкум тэжъугъэгъэзэжь.
8– Рабби, джуртхэр мыжъохэмкӀэ къыоонхэу, уаукӀынэу уауж зитыгъэхэр бэшӀагъап, джыри ащ окӀожьа? – къыраӀуагъ игъогу рыкӀохэрэм.
9– Мафэр сыхьат пшӀыкӀутӀу мэхъуба? – къыӀожьыгъ Исус. – Мафэм зекӀорэр лъэпаорэп, сыда пӀомэ, дунаим инэфынэ елъэгъушъ ары. 10Ау чэщым зекӀорэр мэлъэпао, сыда пӀомэ, нэфынэм хэтэпышъ ары.
11Исус а гущыӀэхэр зареӀохэ ужым, пигъэхъожьыгъ:
– Тиныбджэгъу Лазар хэчъыягъ, ау къэзгъэущыжьынэу сэкӀо.
12– Зиусхьан, хэчъыягъэмэ, хъужьыщт, – къыраӀуагъ игъогу рыкӀохэрэм. 13Ау Исус зыфиӀуагъэр Лазар зэрэлӀагъэр ары, ау игъусэхэм къызэрагурыӀуагъэр чъыен къызэрыкӀом Исус игугъу ышӀэу ары.
14Джащыгъум Исус нафэу ариӀуагъ:
– Лазар лӀагъэ. 15Ау шъощ пае сигуапэ ащ дэжьым сызэрэщымыӀагъэр, шӀошъхъуныгъэ шъуиӀэ хъуным пае. Ау некӀо, ыдэжь тыжъугъакӀу.
16Исус аущтэу зареӀом, Фомэу ТӀуазэкӀэ заджэхэрэм адрэ нэбгырэхэу Исус игъогу рыкӀохэрэм ариӀуагъ:
– НекӀох, тэри Исус тыдэрэкӀод.
Исус – лӀагъэхэр къэзгъэтэджыжьэу, щыӀэныгъэ язытырэр
17ЕтӀанэ ащ зынэсым, Лазар къэунэм зычӀалъхьажьыгъэр мэфиплӀ зэрэхъугъэр Исус къышӀагъ. 18Къуаджэу Бет-Ание стадие пшӀыкӀутфыкӀэ Ерусалим пэчыжь. 19Лазар зэрэлӀагъэм пае, джуртыбэ тхьаусхакӀо Мартэрэ Мерэмрэ къафэкӀуагъ. 20Мартэ Исус къызэрэкӀорэр зызэхехым, пэгъокӀыгъ, ау Мерэм унэм къинагъ.
21– Зиусхьан, – риӀуагъ Исус Мартэ. – О мыщ ущыӀагъэмэ, сэ сшы лӀэщтыгъэп. 22Ау о Тхьэм сыд щыщкӀи уелъэӀумэ, джыдэдэми ар къызэрэпфишӀэщтыр сэшӀэ.
23– О пшы къэтэджыжьыщт, – къыриӀуагъ Исус.
24– Аужырэ мафэу лӀагъэхэр къызщытэджыжьыщтым ари къызэрэтэджыжьыщтыр сэшӀэ, – къыриӀожьыгъ Мартэ.
25– ЛӀагъэхэр къэзгъэтэджыжьэу, щыӀэныгъэр язытырэр сэры; сэркӀэ шӀошъхъуныгъэ зиӀэр лӀэми, щыӀэщт; 26хэти ащ фэдэ щыӀэныгъэ зиӀэ хъоу, сэркӀэ шӀошъхъуныгъэ зиӀэр егъашӀэми лӀэжьыщтэп. Ар пшӀошъ мэхъуа? – къеупчӀыгъ Исус.
27– Ары, Зиусхьан, – риӀожьыгъ Мартэ. – Тхьэм ы Къоу дунаим къэкӀон фэегъэ Христосыр зэрэорыр сшӀошъ мэхъу.
28Мартэ ар къызеӀом, ыгъэзэжьи, ышыпхъу Мерэм къеджи, шъэфэу риӀуагъ:
– Дин гъэсакӀор къэкӀуагъэу къыоджэ.
29Мерэм ар зызэхехым, псынкӀэу къэтэджи, Исус дэжь кӀуагъэ. 30Исус джыри къуаджэм дэхьэгъэгъэгоп, Мартэ зыщыӀукӀагъэм дэжь щытыгъ. 31Джуртхэу тхьаусхакӀо къэкӀуагъэхэу Мерэм игъусэхэу унэм исыгъэхэм псынкӀэу тэджи, ар унэм икӀыгъэу залъэгъум, къэунэм кӀонышъ, ащ дэжь щыгъынэу ашӀошӀи, ыуж ихьагъэх. 32Ау Мерэм Исус зыдэщыӀэм кӀуи, Исус зелъэгъум, ылъакъохэм адэжь зыщыридзыхи, риӀуагъ:
– Зиусхьан, о мыщ ущыӀагъэмэ, сшы лӀэщтыгъэп.
33Исус Мерэм гъэу, ащ игъусэхэу къэкӀогъэ джуртхэри гъыхэу зелъэгъум, ыгу къеуи, лъэшэу къэчэфынчъагъ.
34– Тыда хьадэр зыщычӀэшъулъхьажьыгъэр? – яупчӀыгъ Исус.
– Зиусхьан, къакӀуи, еплъ, – къыраӀуагъ ахэмэ.
35Джащыгъум Исус къэгъыгъ.
36Ар залъэгъум, джуртмэ къаӀуагъ:
– Ащ шӀу зэрилъэгъущтыгъэм шъуеплъ!
37– Мы лӀэу нэшъум ынэхэр къэзгъэплъагъэм а лӀыр ымыгъэлӀэн ылъэкӀыщтыгъэба? – къаӀуагъ ахэмэ ащыщхэу заулэмэ.
Исус Лазар лӀагъэхэм къызэрахигъэтэджыкӀыжьыгъэр
38Исус ыгу лъэшэу хэкӀэу, къэунэм кӀуагъэ. Ар гъочӀэгъыгъ, мыжъуи Ӏуалъхьажьыгъагъ.
39– Мыжъор Ӏушъух, – къыӀуагъ Исус.
– Зиусхьан, – къыриуӀагъ лӀагъэм ыщыпхъу Мартэ Исус, – ар зылӀагъэр мэфиплӀ мэхъу, мэ Ӏае къыпихы хъугъэ.
40– ШӀошъхъуныгъэ уиӀэмэ, Тхьэм ищытхъушхо зэрэплъэгъущтыр къыосӀуагъэба? – риӀуагъ Исус.
41Аущтэу лӀагъэр зычӀэлъ гъочӀэгъым Ӏулъ мыжъор Ӏуахыгъ. Исуси уашъом дэплъыий, къыӀуагъ:
– Сэ ся Т! СилъэӀу укъызэредэӀугъэмкӀэ щытхъу къыпфэсэшӀы. 42Сыдигъуи силъэӀухэм укъызэрядэӀурэр сэшӀэ. О сыкъызэрэбгъэкӀуагъэмкӀэ мыщ дэжьым щыт цӀыф купышхом шӀошъхъуныгъэ яӀэ хъуным пае, мы гущыӀэхэр къэсӀуагъ.
43Исус ар къызеӀом ыуж, мэкъэшхокӀэ къыӀуагъ:
– Лазар, къычӀэкӀ!
44ЛӀагъэм ыӀэхэми ылъакъохэми чэфынхэр къящэкӀыгъэу, ынэгуи шэкӀ фыжь ещэкӀыгъэу къычӀэкӀыгъ.
– Чэфынхэу ещэкӀыгъэхэр къытешъухыжьи, орэкӀожь! – ариӀуагъ Исус.
Тхьэмэтэ Хэсэшхом хэт тхьэматэхэм Исус тхьагъэпцӀыгъэкӀэ аукӀынэу гухэлъ зэрашӀыгъэр
(Маттэ 26:1-5; Марк 14:1-2; Лука 22:12)
45Исус Ӏофышхо гъэшӀэгъонэу ышӀагъэр залъэгъум, Мерэм дэжь къэкӀогъэгъэ джуртхэм ащыщхэу бэмэ ИсускӀэ шӀошъхъуныгъэ яӀэ хъугъэ. 46Ау а джуртхэм ащыщэу куп фарисеймэ адэжь кӀуи, Исус ышӀагъэр араӀотэжьыгъ. 47Дин пэщэшхохэмрэ фарисейхэмрэ хъугъэ-шӀагъэр зызэхахым, Тхьэмэтэ Хэсэшхом хэтхэр зэӀуагъэкӀагъэх.
– Сыда тшӀэщтыр? – аӀозэ, зэхэупчӀыхьажьыгъэх. – Мы лӀым нэшэнэ гъэшӀэгъон Ӏаджи къегъэлъагъо. 48Ащ тыпэмыуцоу къэдгъанэмэ, цӀыф пстэуми ежьымкӀэ шӀошъхъуныгъэ яӀэ хъущт. Рим къэралыгъошхом щыщхэу, мы хэгъэгур зыӀэ илъхэр къэкӀонхэшъ, Тхьэм иунэшхуи ттырахынышъ, тлъэпкъи агъэкӀодыщт.
49Джуртхэм ащыщэу, а илъэсым дин пэщэшхоу Кайафэ #11:49 Кайафэ – дин пэщэшхоу Аннэ имэхъулъагъ. Исус къызэхъу нэужым я 18-36-рэ илъэсхэм къакӀоцӀ дин пэщэшхуагъ. зыцӀэм адрэмэ ариӀуагъ:
– Шъо зи шъушӀахэрэп. 50Тэ тлъэпкъ зэкӀэ кӀодыным нахьи, лъэпкъым пае нэбгырэ закъо лӀэмэ, тэркӀэ зэрэнахьышӀур къыжъугурыӀорэба?
51Ар ежь-ежьырэу къыӀуагъэп, ау а илъэсым дин пэщэшхуагъэти, джурт лъэпкъым пае Исус ыпсэ зэритыщтыр Тхьэм ащ ыгу къырилъхьи, къыригъэӀуагъ. 52Исус ыпсэ зыфитыщтыр джурт лъэпкъым пае закъор армырэу, Тхьэм ибынхэу зэбгыридзыгъэхэр зы хъунхэуи зы чӀыпӀэ щиугъоижьынхэуи ары. 53Арыти, а мафэм щегъэжьагъэу Исус аукӀынэу рахъухьагъ.
54Ащ къыхэкӀэу цӀыфхэм алъэгъоу Исус джуртхэм къахэхьажьыгъэп, ау а чӀыпӀэм икӀи, шъоф нэкӀым ылъэныкъокӀэ ит къуаджэу Ефраим#11:54 къуаджэу Ефраим – Ерусалим километрэ 24-кӀэ пэчыжьэу, итемыр тыгъэ къокӀыпӀэ лъэныкъомкӀэ итыгъ. кӀуи, игъогу рыкӀохэрэр игъусэхэу ащ къэнагъ.
55Джуртхэм ямэфэкӀ мэфэшхоу Ӏутыжъ зыцӀэр къэблэгъагъэти, диным къызэриӀорэм тетэу, мэфэкӀ мэфэшхом ыпэкӀэ загъэкъэбзэжьынэу а хэкум щыщхэу цӀыфыбэхэр Ерусалим къэкӀуагъэх. 56Джащыгъум Исус лъыхъущтыгъэх, Тхьэм иунэшхо чӀэтхэуи зэхэупчӀыхьажьыщтыгъэх:
– Сыда шъуӀорэр шъо? МэфэкӀ мэфэшхом пае ар къэкӀонба?
57Ау дин пэщэшхохэмрэ фарисейхэмрэ Исус аубытыным пае, унашъо къыдагъэкӀыгъагъ:
– Хэти Исус зыдэщыӀэр зышӀэрэм макъэ къытигъэӀун фае.
Selectat acum:
Иуан 11: AdgNT14
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 1991, 1992, 2014. Стокгольм
