Иуан 13
13
ЯПШӀЫКӀУЩЭНЭРЭШЪХЬ
Исус игъогу рыкӀохэрэм алъакъохэр зэритхьакӀыгъэхэр
1Ӏутыжъ зыцӀэ мэфэкӀ мэфэшхор къэсыщтыгъ. Дунаим ехыжьынышъ, Ты лъапӀэм дэжь зыщигъэзэжьыщт сыхьатыр къызэрэсыгъэр Исус ышӀэщтыгъ. Ежь ицӀыфхэу дунаим тетхэр шӀу ылъэгъущтыгъэх, кӀэухыми нэсыфэ шӀу ылъэгъущтыгъэх.
2Пчыхьэшъхьашхэ ашӀыщтыгъ. Исус тетыгъо зиӀэхэм аӀэкӀигъэхьанэу шэйтаным Симон Искариот ыкъоу Иудэ ыгу рилъхьэгъах. 3Исус ыӀэ Ты лъапӀэм зэкӀэ къызэрэрилъхьагъэри, Тхьэм зэрэщыщри, Тхьэм дэжь зэригъэзэжьыщтри ышӀэщтыгъ. 4Аущтэу Исус Ӏанэм пэкӀи, ищыгъын кӀыӀутелъ зыщихи, ӀэплъэкӀ къышти, ыбг къырищэкӀыгъ. 5ЕтӀанэ лэджэным псы ригъахъуи, игъогу рыкӀохэрэм алъакъохэр афитхьакӀыхэу, ӀэплъэкӀэу ыбг ещэкӀыгъэмкӀи афилъэкӀыжьхэу ыублагъ. 6Исус Симон Петрэ зыбгъодахьэм, Симон Петрэ ащ къыриӀуагъ:
– Зиусхьан, слъакъохэр о птхьакӀыхэ хъуна?
7– Сэ сшӀэрэр джы о къыбгурыӀорэп, ау етӀанэ къыбгурыӀощт, – риӀожьыгъ Исус.
8– Сэ слъакъохэр егъашӀэми озгъэтхьакӀынхэп, – къыриӀуагъ Петрэ.
– ПфэсымытхьакӀымэ, сигъогу рыкӀохэрэм уащыщэп, – риӀожьыгъ Исус.
9– О Зиусхьан, ащыгъум слъакъомэ ямызакъоу сӀэхэри сшъхьи сфэтхьакӀых, – къыриӀуагъ Симон Петрэ.
10– ЗызгъэпскӀыгъэм ылъакъохэр ары ныӀэп ытхьакӀын фаер, – риӀуагъ Исус, – сыда пӀомэ, ар зэкӀэ къабзэ; шъори шъукъабз, ауми шъо зэкӀэми шъукъабзэп.
11Исус «Шъо зэкӀэми шъукъабзэп» зыкӀиӀуагъэр ежь тетыгъо зиӀэхэм язгъэубытыщтыр зэрахэтыр ышӀэщтыгъэти ары.
12Исус ахэмэ алъакъохэр ытхьакӀыхи, ищыгъынхэр зыщилъэжьхи, зэтӀысыжьым, яупчӀыгъ:
– КъышъуфэсшӀагъэр шъошӀа? 13Шъо «Дин ГъэсакӀокӀэ», «ЗиусхьанкӀэ» шъукъысэджэ; шъуӀорэр тэрэз, аущтэуи сыщыт. 14Сэ шъуи Зиусхьанэу, шъуи ГъэсакӀоу сыщыт пэтми, шъо шъулъакъохэр къышъуфэстхьакӀыгъ. Шъори шъулъакъохэр зэфэшъутхьакӀыжьынхэ фае. 15ШъушӀэн фаер шъозгъэлъэгъугъ, сэ къышъуфэсшӀагъэм фэдэу, шъори шъушӀэным пае. 16Шъыпкъэ дэдэр шъосэӀо, Ӏофтабгэр итхьэматэ нахьи нахь инэп; ащ фэдэуи лӀыкӀор ар зыгъэкӀуагъэм нахьи нахь инэп. 17Мы Ӏофхэр къыжъугурыӀохэу, шъогъэцакӀэхэмэ, гъогу мафэ шъутеуцуагъ.
18– Ау шъо зэкӀэми къышъохьылӀагъэу ар къасӀорэп. Сэ къыхэсхыгъэхэр сэшӀэх, ау Тхьэм мы игущыӀэ тхыгъэхэр#13:18 Тхьэм игущыӀэ тхыгъэхэм арытхэр – яплъ Орэд ЛъапӀэхэм 40:10. къэшъыпкъэжьынхэ фае: «Сихьалыгъу зышхыгъэм ылъэдакъэ къысфигъэзэжьи, пый къысфэхъугъ».
19– Ар къэмыхъузэ, джы шъосэӀо, ар хъу зыхъукӀэ, сэ сызэрэ ХристосымкӀэ шӀошъхъуныгъэ шъуиӀэ хъуным пае. 20Шъыпкъэ дэдэр шъосэӀо, сэ къэзгъакӀорэр къезгъэблагъэрэм сэри сыригъэблэгъагъэ мэхъу, сэ сезгъэблагъэрэми сэ сыкъэзгъэкӀуагъэри ригъэблэгъагъэу мэхъу.
Исус игъогу рыкӀохэрэм ащыщ горэм ежь тетыгъо зиӀэхэм зэраригъэубытыщтыр къызэриӀуагъэр
(Маттэ 26:20-25; Марк 14:17-21; Лука 22:21-23)
21Исус а гущыӀэхэр къызеӀохэм ыуж, къэгумэкӀи, къыушыхьатэу къыӀуагъ:
– Шъыпкъэ дэдэр шъосэӀо, шъуащыщ горэм тетыгъо зиӀэхэм саригъэубытыщт.
22Ар къызеӀом, Исус ахэмэ ащыщэу зыфиӀорэр игъогу рыкӀохэрэм амышӀэу зэплъыжьыгъэх.
23Игъогу рыкӀохэрэм ащыщэу Исус анахь шӀу ылъэгъурэр ежь къыбгъодэсэу Ӏанэм пэсыгъ. 24Симон Петрэ а нэбгырэу Исус къыбгъодэсым Ӏэ фишӀыгъ, Исус зыфиӀорэмкӀэ еупчӀынэу.
25А лӀым Исус ыбгъэгу зычӀидзи, еупчӀыгъ:
– Зиусхьан, хэта а зыфапӀорэр?
26– Мы хьалыгъу Ӏулъхьэр апсым хэзгъэонышъ, зэстыщтыр ары зыфасӀорэр, – пэгъокӀ ытыжьыгъ Исус. ЕтӀанэ хьалыгъу Ӏулъхьэр апсым хигъауи, Симон Искариот ыкъо Иудэ ритыгъ. 27Иудэ а хьалыгъу Ӏулъхьэр зештэм, ыгу шэйтаныр къихьагъ.
– ПшӀэнэу о угу илъыр шӀэхэу шӀэ! – риӀуагъ Исус Иудэ.
28Ау Исус ащ аущтэу зыкӀыриӀуагъэр Ӏанэм пэсыгъэмэ ащыщэу зыми къыгурыӀуагъэп. 29Иудэ ахэмэ яахъщалъэ ыӀыгъыгъэти, е «Ӏутыжъ мэфэшхом пае тищыкӀагъэр къэщэф», е «ТхьамыкӀэхэм зыгорэ ят» Исус ащ риӀуагъэу заулэмэ къашӀошӀыгъ. 30Иудэм хьалыгъу Ӏулъхьэр Исус къызэрэӀихэу, унэм икӀыгъ. Чэщыгъэ.
УнэшъуакӀэр
31Иудэ унэм зекӀым, Исус къыӀуагъ:
– Джы цӀыфхэм ЦӀыф Лъэпкъым ы Къо ищытхъушхо алъэгъущт, ежьыри Тхьэм ищытхъушхо аригъэлъэгъущт. 32Ащ Тхьэм ищытхъушхо цӀыфхэм арегъэлъэгъушъ, ежь Тхьэми ЦӀыф Лъэпкъым ы Къо ищытхъушхо цӀыфхэм аригъэлъэгъущт. Бэ темышӀэуи Тхьэм ащ ищытхъушхо аригъэлъэгъущт.
33– Сибынхэр, сышъуигъусэнэу къэнэжьырэр бэп. Шъо шъукъыслъыхъущт, ау «СыздакӀорэм шъо шъукъэкӀон шъулъэкӀыщтэп» сӀуи, джуртмэ зэрясӀуагъэм фэдэу, джы шъори шъосэӀо.
34– УнэшъуакӀэ шъосэты: ШӀу шъузэрэлъэгъу. Сэ шӀу шъузэрэслъэгъугъэм фэдэу, шъори шӀу шъузэрэлъэгъу. 35Шъо шӀу шъузэрэлъэгъумэ, шъо сигъогу шъузэрэрыкӀорэр цӀыф пстэуми ашӀэщт.
«Сэ сызыщыщыр умышӀэу къэпӀощт» Исус Петрэ зэрэриӀуагъэр
(Маттэ 26:31-35; Марк 14:27-31; Лука 22:31-34)
36Симон Петрэ Исус къыриӀуагъ:
– Зиусхьан, тыда уздакӀорэр?
– Сэ сыздакӀорэм джы укъыскӀэлъыкӀон плъэкӀыщтэп, ау етӀанэ укъыскӀэлъыкӀощт, – риӀожьыгъ Исус.
37– Зиусхьан, – къыриӀуагъ Петрэ. – Сыд джы сыкъыпкӀэлъыкӀон зыкӀэсымылъэкӀыщтыр? Ощ пае сэ спсэ стыщт.
38– Сэщ пае о ппсэ птыщта? – джэуап ытыжьыгъ Исус. – Шъыпкъэ дэдэр осэӀо, атакъэр Ӏоным ыпэкӀэ сэ сызыщыщыр умышӀэу гъогогъуищэ къэпӀощт!
Selectat acum:
Иуан 13: AdgNT14
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© Институт перевода Библии, 1991, 1992, 2014. Стокгольм
