Bruă Mơnuă 8
8
Sôl Ngă Sat Phung Sang Ơi Adai
1Sôl ăt tŭ ư mơ̆n amăng tơlơi arăng pơdjai Êtiên. Amăng hrơi anŭn arăng čơdơ̆ng kơtư̆ juă ngă sat kơ Phung Sang Ơi Adai amăng plei Yêrusalem kơtang biă mă. Abih bang ƀing đaŏ bru bra čơlah čơlap amăng tring Yuđa hăng tring Samari. Kơnơ̆ng ƀing khua ding kơna đôč ăt dŏ amăng plei Yêrusalem. 2Ƀing đaŏ kơjăp tŏng ten dơr Êtiên hăng čŏk hia rơngot biă mă kơ gơ̆. 3#Bruă 22:4,5; 26:9-11.Bơ Sôl phara hơjăn ñu, ñu sem hơduah pơrai Phung Sang Ơi Adai, mŭt rĭm boh sang mă čaŏ ƀing đah rơkơi, đah kơmơi hăng ba krư̆ ƀing gơ̆ amăng sang mơnă.
Tơlơi Phrâo Hiam Truh Pơ Samari
4Tui anŭn, hơdôm ƀing mơnuih čơlah bra hyu tar ƀar anih gơñu pơtô Tơlơi Phrâo Hiam. 5Philip trŭn nao pơ sa boh plei#8:5 sa boh plei; đơđa Hră Ơi Adai Pơhiăp so đưm hmâo sa boh plei phŭn. amăng tring Samari, ră ruai Yang Krist kơ ƀing gơñu. 6Ƀing mơnuih lu hmư̆ tơlơi Philip pơtô hăng ƀuh gru kơnăl mơyang ñu ngă. Tui anŭn gơñu sa pran jua dŏ kơčăng hmư̆ ñu. 7Lu yang bơngăt grĭ hơƀak ur kraih tơbiă mơ̆ng lu mơnuih gơñu hmâo ngă; laih anŭn hmâo lu ƀing mơnuih rơwen hăng jo ăt suaih mơ̆n. 8Yua kơ anŭn yơh amăng tring Samari hmâo tơlơi mơak mơai biă mă.
9Hlăk anŭn amăng plei anŭn hmâo sa čô đah rơkơi anăn ñu Simôn, hlâo adih ngă bruă pơjâu mơnăn laih anŭn ngă brơi ană plei pla Samari kơtuă hling, pơang ñu pô jing sa čô hing ang prŏng. 10Abih bang mơnuih mơ̆ng čơđai truh pơ tha leng kơ hmư̆ tui ñu soh sel hăng laĭ: “Mơnuih anai jing tơlơi dưi mơyang Ơi Adai arăng pia Tơlơi Mơyang Prŏng.” 11Gơñu hmư̆ tui ñu, yua kơ mơ̆ng sui laih ñu yua tơlơi mơsêh pơjâu ngă kơ arăng kơtuă hling. 12Samơ̆ tơ gơñu đaŏ kơ tơlơi Philip, mơnuih pơtô Tơlơi Phrâo Hiam kơ dêh čar pơtao Ơi Adai laih anŭn anăn Khua Yang Yêsu Krist kơ ƀing gơñu, abih bang ƀing gơñu đah rơkơi wơ̆t đah kơmơi tŭ ƀatem. 13Wơ̆t Simôn pô ăt đaŏ kar kaĭ mơ̆n. Giơ̆ng kơ ñu tŭ ƀatem laih, ñu dŏ hrŏm hơbĭt hăng Philip. Tơ ñu ƀuh lu tơlơi mơsêh mơyang hăng gru kơnăl mơyang, ñu kơtuă biă mă.
14Tơ ƀing khua ding kơna dŏ pơ plei Yêrusalem hmư̆ hing kơ ƀing Samari hmâo mă tŭ boh pơhiăp Ơi Adai, gơñu pơkiaŏ nao Pêtrôs hăng Yôhan nao pơ gơñu. 15Tơ dua gơñu truh pơ anŭn laih, gơñu iâu laĭ brơi kơ ƀing mơnuih đaŏ anŭn kiăng kơ gơñu mă tŭ Yang Bơngăt Hiam; 16yua kơ Yang Bơngăt Hiam aka trŭn ôh kơ hlơi hlơi amăng ƀing gơñu, gơñu kơnơ̆ng hmâo tŭ ƀatem amăng anăn Khua Yang Yêsu đôč. 17Pêtrôs hăng Yôhan ah tơngan ƀơi ƀing gơñu, laih anŭn gơñu dưi tŭ mă Yang Bơngăt Hiam yơh. 18Tơ Simôn ƀuh Ơi Adai brơi Yang Bơngăt Hiam yua mơ̆ng ƀing khua ding kơna ah tơngan, ñu pơyơr prăk kơ gơñu hăng laĭ, 19“Brơi kơ kâo bĕ tơlơi mơyang anŭn kiăng kơ hlơi pô kâo ah tơngan, pô anŭn dưi tŭ mă Yang Bơngăt Hiam.”
20Samơ̆ Pêtrôs laĭ glaĭ: “Prăk ih răm rai hrŏm hơbĭt hăng ih, yua kơ ih pơmĭn dưi blơi tơlơi Ơi Adai pha brơi hăng prăk mah! 21Ih ƀu hmâo sa črăn hơgĕt ôh hrŏm hơbĭt amăng bruă anai, yua kơ pran jua ih ƀu tơpă ôh ƀơi anăp Ơi Adai. 22Tui anŭn kơhmal hĭ bĕ tơlơi soh sat ih anai, hăng iâu laĭ kơ Khua Yang, kiăng kơ tơlơi pơmĭn pran jua ih năng ai či hmâo tơlơi pap brơi mơ̆n thâo. 23Yua kơ kâo ƀuh ih ăt dŏ amăng tơlơi phĭ rơañ hăng amăng čuăk tơlơi soh akă ih.”
24Simôn laĭ glaĭ: “Rơkâo kơ ƀing gih iâu laĭ kơ Khua Yang brơi kơ kâo, kiăng kơ tơlơi ƀing gih hmâo laĭ anŭn ƀu lĕ kơ kâo ôh.”
25Giơ̆ng kơ Pêtrôs hăng Yôhan hmâo ngă gơ̆ng jơlan pơklă tơlơi đaŏ hăng pơtô laĭ boh pơhiăp Khua Yang, gơñu glaĭ pơ plei Yêrusalem, gơñu rơbat rah, ră ruai pơtô rah Tơlơi Phrâo Hiam amăng lu boh plei ƀing mơnuih Samari.
Philip Hăng Khua Êthiôpi
26Hlăk anŭn sa čô ling jang Khua Yang laĭ kơ Philip: “Tơgŭ bĕ hăng nao pơ gah dơnŭng#8:26 pơ gah dơnŭng; ƀôdah hlăk yang hrơi dơ̆ng. ƀơi jơlan mơ̆ng plei Yêrusalem trŭn nao pơ plei Gasa.” Jơlan anŭn hyăl amal biă mă.#8:26 Jơlan anŭn amăng tơdrŏn har; ƀôdah Jơlan anŭn ră anai ƀu hmâo yua dơ̆ng tah. 27Philip tơgŭ hăng nao mơtam. Anai nê, hmâo sa čô khua mơnuih Êthiôpi arăng kriao ñu laih, ñu ngă khua mă bruă kơ HʼKandas, pơtao đah kơmơi čar Êthiôpi. Ñu wai lăng abih kong ngăn pơtao anŭn. Ñu hmâo nao laih pơ plei Yêrusalem kiăng kơkuh pơpŭ Ơi Adai, 28Tơdang ñu đĭ rơdeh aseh wơ̆t glaĭ, ñu dŏ lăng hơdrôm hră pô laĭ lui hlâo Êsai. 29Yang Bơngăt Hiam laĭ kơ Philip: “Đuaĭ tui hơmao rơdeh aseh anŭn hăng nao jĕ bĕ.” 30Tui anŭn Philip đuaĭ nao pơ ñu, laih anŭn hmư̆ ñu dŏ đŏk hơdrôm hră pô laĭ lui hlâo Êsai, Philip tơña kơ ñu: “Ih thâo hluh mơ̆ tơlơi ih hlăk dŏ đŏk anŭn?”
31Khua anŭn laĭ glaĭ: “Tơdah ƀu hmâo hlơi pơblang brơi kâo ôh, hyư̆m kâo dưi thâo hluh lĕ?” Giơ̆ng anŭn ñu jak Philip đĭ amăng rơdeh hrŏm hăng ñu. 32#Êsai 53:7,8.Anai jing črăn Hră Ơi Adai Pơhiăp ñu dŏ đŏk anŭn:
“Arăng hmâo dui ba gơ̆ kar hăng triu nao pơ anih kiăng čuh ƀơ̆ng,
Kar hăng sa drơi ană triu ƀu ur ôh hlăk arăng yuă blâu ñu, Ñu ƀu pơhiăp hơgĕt gĕt ôh.
33Tơdang Ñu tŭ tơlơi arăng pơmlâo Ñu, arăng ƀu phat kơđi tơpă kơ Ñu ôh.
Ƀu hmâo hlơi dưi ră ruai djơ̆ kơ ană tơčo Ñu ôh.
Yua kơ arăng mă pơđuaĭ hĭ laih tơlơi hơdip Ñu mơ̆ng lŏn tơnah.”
34Khua anŭn laĭ hăng Philip: “Kâo tơña kơ ih, pô laĭ lui hlâo laĭ tơlơi anŭn kiăng laĭ nao kơ hlơi lĕ? Laĭ nao kơ ñu pô hă, ƀôdah kơ sa čô pô pơkŏn?” 35Tui anŭn Philip ha pơhiăp, čơdơ̆ng mơ̆ng čăl Hră Ơi Adai Pơhiăp anŭn Philip pơtô Tơlơi Phrâo Hiam Yêsu kơ ñu. 36Tơdang dua gơñu rơbat ƀơi rŏk jơlan, gơñu ƀuh ia, ding kơna kriao laĭ: “Anai hmâo ia, hmâo tơlơi hơgĕt khă kâo kiăng tŭ ƀatem mơ̆?”#8:36 Đơđa Hră Ơi Adai Pơhiăp so đưm thim jơlan 37: Philip laĭ: “Tơdah ih đaŏ hăng abih pran jua, ih dưi tŭ ƀatem yơh.” Ñu laĭ glaĭ: “Kâo đaŏ, kâo đaŏ kơ Yêsu Krist jing Ană Ơi Adai.”
38Ñu pơđar brơi dơ̆ng glaĭ hĭ rơdeh aseh, laih anŭn abih dua gơñu trŭn amăng ia, laih anŭn Philip ngă ƀatem brơi kơ ñu. 39Tơ gơñu đĭ mơ̆ng ia, Yang Bơngăt Hiam Khua Yang mă pơđuaĭ hĭ Philip. Ding kơna kriao anŭn ƀu ƀuh ñu dơ̆ng tah, laih anŭn ñu hơ̆k mơak rơbat nao dơ̆ng ƀơi jơlan ñu pô. 40Arăng ƀuh Philip pơ plei Asôt, mơ̆ng plei anŭn ñu nao pơ plei Sêsarê, ră ruai Tơlơi Phrâo Hiam amăng abih plei ñu găn nao.
Selectat acum:
Bruă Mơnuă 8: JRA2016
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© 2016 United Bible Societies. All rights reserved.
