នាវនតើម 46
46
យាកោប នទ្រែលមាក៝នឆៅពាង់ហាន់គុតាឞ្រីអេឆីប
1ជេសរីអីឆ្រាអែលអីឞូក្វាល់យាកោបដ៝ង់ ញអោតទឹងលែៈទ្រាប់នទើពាង់គែសហាន់នទ្រែលពាង់នើម។ ត៝ត់តាប៝នបេរឆេបារី ពាង់គុចញហើរនទើជានឞ្រាសមាកោរាញឞ្រាសអីឞ្រាសអីឆាក់ឞឹពាង់នើមយើកមឞាស។#២៦:២៣-២៥ 2កោរាញឞ្រាសងើយមាអីឆ្រាអែលតានាវតឹមឆៃនោកមាង់៖ “អើយាកោប! អើយាកោប!” អីឆ្រាអែលអើស៖ “ម៝សហាៈកោរាញឞ្រាស!” 3កោរាញឞ្រាសលាសមាពាង់៖ “គ៝ប់អ្យាកោរាញឞ្រាសអីឞ្រាសឞឹមៃយើកមឞាស។ មៃលើយអោសក្លាចហាន់តាឞ្រីអេឆីប យ៝រលាសតាឞ្រីអីនៃតៃគ៝ប់ជានអ៝ន់មៃជេងទូផូងក្វ៝ង់។#២៨:១៤; ៤៧:២៧; នង ១:៧ 4គ៝ប់ហាន់នទ្រែលមៃតាឞ្រីអេឆីប នៃ ជេសរីតៃគ៝ប់លែវមៃព្លឹឞើសឞ្រីអីនៃដ៝ង់។ ត៝ត់មៃខឹតយោឆែបឆើមរាទេបមាត់មៃ”។ 5ជេសរីយាកោបលោសឞើសបេរឆេបានៃ ផូងអ៝សក៝នអីឆ្រាអែលរាទែងឞឹខាន់ពាង់នើម នទ្រែលមាអូរក៝នខាន់ពាង់នើមមារាទែសកាដាច់ផារ៝នទែញជ្វាល់រីនើស។ 6ខាន់ពាង់ញអោតទឹងលែៈមពោមពា(ឆ្យុម)ទឹងលែៈទ្រាប់នទើខាន់ពាង់នើមគែសតាឞ្រីកានាន លែវនទ្រែលខាន់ពាង់នើមទាទេ។ យាកោបលែវរាន៝យទែសពាង់នើមលែៈផ្យៅហាន់តាឞ្រីអេឆីប ។#ការ ៧:១៥ 7យាកោបលែវក៝នឞូអូរក៝នឞូក្លោ ឆៅឞូអូរឆៅឞូក្លោ នទ្រែលមាទឹងលែៈរាន៝យទែសពាង់នើស ហាន់តាឞ្រីអេឆីប រីនទ្រែលពាង់នើមទាទេ។
8អ្យាជេងគែសរាញាឆាក់ផូងក៝នឆៅអីឆ្រាអែលហាន់តាឞ្រីអេឆីប ៖ យាកោប នទ្រែលមាទឹងលែៈអ៝សក៝នពាង់។ ក៝នឞោកទាកយាកោបរាញារូបេន។ 9ក៝នឞូក្លោរូបេន តានៃគែស៖ ហានុក គែសផាលូ គែសហេឆ្រុន នទ្រែលមាការមី។ 10ក៝នឞូក្លោឆីមោន៖ តានៃគែសយេមូអែល គែសយាមីន គែសអោហាត គែសយាកីន គែសឆោហារ នទ្រែលមាឆោល។ មេៈឆោលឞូអូរផូងកានាន។ 11ក៝នឞូក្លោលេវី៖ តានៃគែសកេរឆ៝ន គែសកេហាត នទ្រែលមាមរារី។ 12ក៝នឞូក្លោយូដា៖ តានៃគែសអេរ គែសអោនាន គែសឆេលា គែសពេរេស នទ្រែលមាឆេរាស។ (ក៝នឞារហៃអេរ នទ្រែលមាអោនានលែៈខឹតតាឞ្រីកានាន។) ក៝នឞូក្លោពេរេស៖ តានៃគែសហេឆ្រុន នទ្រែលមាហាមុល។ 13ក៝នឞូក្លោអីឆាខារ៖ តានៃគែសថោលា គែសពូវា គែសយោប នទ្រែលមាឆីមរោន។ 14ក៝នឞូក្លោឆាប់យូលោន៖ តានៃគែសឆេរែត គែសអេលោន នទ្រែលមាយាលៀល។ 15ទឹងលែៈខាន់ពាង់អីនៃជេងក៝នលេអាទាទេ ពាង់ឞាៈអ៝ន់មាយាកោបទោលគុតាឞ្រីពាដាន-អារាមនើស នទ្រែលមាដីនាក៝នឞូអូរពាង់។ ទឹងលែៈក៝នលេអា នអ៝ប់មាឆៅពាង់គែស ៣៣ នុយ្ស។
16ក៝នឞូក្លោកាត៖ តានៃគែសឆេផុន គែសហាកី គែសឆូនី គែសអេសប៝ន គែសអេរី គែសអារោដី នទ្រែលមាអារេលី។#២៩:៣១; ៣០:២៤; ៣៥:១៦-១៨; ៣៨:៦-៣០; ៤១:៤៥ 17ក៝នឞូក្លោអាឆើរ៖ តានៃគែសយិមនា គែសយីសវា គែសអីសវី គែសបេរីយា នទ្រែលមាឆេរាអ៝សឞូអូរ។ ក៝នបេរីយា៖ តានៃគែសហេបើរ នទ្រែលមាមាល់កៀល។ 18ទឹងលែៈខាន់ពាង់អីនៃជេងក៝នឆៅឆិលផាអីលាបានទែអ៝ន់មាលេអានើស។ ទឹងលែៈក៝នឆិលផា នអ៝ប់មាឆៅពាង់គែស ១៦ នុយ្ស។
19ក៝នឞូក្លោរាចែលអូរយាកោប៖ តានៃគែសយោឆែប នទ្រែលមាបែនយាមឹន។ 20តាឞ្រីអេឆីប យោឆែបគែសឞារហៃក៝នឞូក្លោ៖ តានៃគែសមានាឆេ នទ្រែលមាអេប្រាអីម។ អាសនាតក៝នឞូអូរផោថីផេរាឞូនុយ្សជានឞ្រាសតាប៝នអោនឞាៈខាន់ពាង់មាយោឆែប។#នន ៤១:៥០-៥២ 21ក៝នឞូក្លោបែនយាមឹន៖ តានៃគែសបេលា គែសបេកើរ គែសអាសបេល គែសកេរា គែសនាមាន គែសអេហី គែសរោស គែសមូផីម គែសហូផីម នទ្រែលមាអារើត។ 22ទឹងលែៈខាន់ពាង់អីនៃជេងក៝នឆៅរាចែលទាទេ ក៝នឆៅរាចែលទឹងលែៈគែស ១៤ នុយ្ស។
23ក៝នឞូក្លោដាន៖ តានៃគែសហូឆីម។ 24ក៝នឞូក្លោនាប់តាលី៖ តានៃគែសយាឆៀល គែសកូនី គែសយេឆើរ នទ្រែលមាឆីលេម។ 25ទឹងលែៈខាន់ពាង់អីនៃជេងក៝នបិលហាអីលាបានទែអ៝ន់មារាចែលនើស។ ក៝នឆៅបិលហាអ៝ន់មាយាកោបទឹងលែៈគែស ៧ នុយ្ស។
26ទឹងលែៈក៝នឆៅយាកោបហាន់នទ្រែលពាង់នើមតាឞ្រីអេឆីប គែស ៦៦ នុយ្ស មោអោសកើបបាន់ៗពាង់។ 27លាសកើបនអ៝ប់មាក៝នយោឆែបឞារហៃទែសតាឞ្រីអេឆីប រីដ៝ង់ ទឹងលែៈឞូនុយ្សតារានាក់វ៝ល់យាកោបហាន់គុតាឞ្រីអេឆីប គែស ៧០ នុយ្ស។#នង ១:១-៥; ការ ៧:១៤
យាកោប នទ្រែលមាអ៝សក៝នពាង់គុតាឞ្រីអេឆីប
28 យាកោបដាៈយូដាហាន់ល៝រម៝ប់យោឆែប គៃមាអោបត្រ៝ងហាន់ជឹតឞ្រីកោឆែន ជេសរីយាកោបនទ្រែលមារានាក់វ៝ល់ពាង់ហាន់ត៝ត់តាឞ្រីកោឆែន។ 29យោឆែបអ៝ន់ឞូនទ្រាប់រាទែសឆែសពាង់នើម ជេសរីញច៝ហាន់ច្វាៈយាកោបអីឞូក្វាល់អីឆ្រាអែលឞឹពាង់នើមតាឞ្រីកោឆែន ត៝ត់តារីពាង់អូតឞឹពាង់ នហ៝មាញុមជ៝ងងាន់។ 30អីឆ្រាអែលលាសមាយោឆែប៖ “អាបៃអ្យាលាសគ៝ប់ខឹតមោច្រាវអោស យ៝រលាសលែៈគ៝ប់ឆៃមុសមាត់មៃហោមអែរេស”។#៤៥:២៨ 31យោឆែបងើយមាអ៝សនោពាង់ នអ៝ប់មាទឹងលែៈឞូនុយ្សអីហាន់នទ្រែលខាន់ពាង់៖ “គ៝ប់ហាន់មឞើសងក៝ចមាកាដាច់ផារ៝នលាស៖ «ទឹងលែៈអ៝សនោគ៝ប់ នទ្រែលមារានាក់វ៝ល់ឞឹគ៝ប់ឞើសឞ្រីកានាន អាបៃអ្យាខាន់ពាង់លែៈត៝ត់តាអ្យា។ 32ខាន់ពាង់លែវនអ៝ប់មានទ្រោក មាឞែឞ្យាប់ នទ្រែលមាទឹងលែៈមពោមពា(ឆ្យុម)ខាន់ពាង់គែស យ៝រលាសខាន់ពាង់ជេងឞូនុយ្សច្យាប់ នាវរេសខាន់ពាង់នើសគុម៝ត់មពោមពា(ឆ្យុម)ទើម»។ 33លាសកាដាច់ផារ៝នអោបខាន់មៃ៖ «ខាន់មៃម៝សបាៈវៃជាន?» 34អ៝ន់ខាន់មៃអើសមាពាង់កើតនអា៖ «អើកោរាញ ហេនវៃច្យាប់នតើមឞើសជេៈនហ៝មាត៝ត់អាបៃអ្យា កើតផូងចែហេនកាល់អែនើសដ៝ង់»។ លាសខាន់មៃអើសមាពាង់កើតនៃ ខាន់មៃគែសគុតានតុកឞ្រីកោឆែនអ្យារ៝ យ៝រលាសផូងអេឆីប មឺចហោងាន់មាផូងច្យាប់”។
Selectat acum:
នាវនតើម 46: cmoK
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
© (Active) Wycliffe Bible Translators, Inc. All rights reserved.