នាវនតើម 45

1 យោឆែបមោហោមអោសទើយអ៝ត់រាទ៝ង់នូយ្សនហ៝ម់តានាប់ផូងគុកេងពាង់រី ជេសរីពាង់ដាៈឞូទូលោសឞើសនតុកនៃលែៈផ្យៅ។ នោកយោឆែបញហើឆាក់ពាង់នើមអ៝ន់មាអ៝សនោពាង់នាល់ ឞូអាបាៈមោអោសគុតានៃ។#ការ ៧:១៣ 2យោឆែបញុមលុងល៝ចងាន់ តាង់ត៝ត់តាផូងអេឆីប នទ្រែលមាផូងគុតាជៃកាដាច់ផារ៝នរីងាន់។ 3យោឆែបលាសមាអ៝សនោពាង់៖ “គ៝ប់អ្យាយោឆែប! អាសឞឹគ៝ប់ហោមរេសដ៝ង់?” មពោលអ៝សនោពាង់មោហោមអោសឞ្លាវអើស ខាន់ពាង់ក្លាចទាទេ យ៝រលាសលែៈឆៃយោឆែបឞើសនាប់ខាន់ពាង់នើមរី។ 4យោឆែបលាសមាខាន់ពាង់៖ “គ៝ប់ទាន់ខាន់មៃហាន់ទាច់អាគ៝ប់អ្យា” ខាន់ពាង់ហាន់ទាច់អាយោឆែបត៝។ ជេសរីលាសមាខាន់ពាង់៖ “គ៝ប់អ្យាយោឆែបអ៝សខាន់មៃ អីខាន់មៃតាច់អ៝ន់មាផូងអេឆីប នើស។ 5អើនោ ខាន់មៃលើយរាវៃ លើយហោមអោសរាង៝តនាវខាន់មៃលែៈតាច់គ៝ប់អ្យានើស យ៝រលាសជេងកោរាញឞ្រាសនើមញជុនអ៝ន់គ៝ប់ហាន់ល៝រតាអ្យា គៃមាកើលខាន់មៃ។#៥០:២០; នម ១០៥:១៧ 6ល៝ង់អាបៃអ្យានាវជីង៝តក្វ៝ង់អីនៃលែៈគែសឞារនាម់ យើនមាហោមព្រាម់នាម់ជឹតនាប់ជឹត មោអោសគែសឞូនុយ្សមាតូចតាម់ មាកាច់រ៝យ្ស។ 7កោរាញឞ្រាសញជុនអ៝ន់គ៝ប់ហាន់ល៝រតាអ្យា គៃមារាគូមព្រាប់ព្យាង់ឞាមាអ៝ន់ខាន់មៃហោមរេសតានែសនតូអ្យា អ្យាជេងនាវរាក្លាយ្សទុតក្វ៝ង់ងាន់។ 8លាសនទ្រីមោគែសអោសខាន់មៃញជុនគ៝ប់ហាន់តាអ្យា កោរាញឞ្រាសអីនាក់ញជុនគ៝ប់ កោរាញឞ្រាសអ៝ន់គ៝ប់ជានកោរាញទុតក្វ៝ង់មាកាដាច់ផារ៝ន អ៝ន់គ៝ប់ម៝ត់អ្វាញ់ទឹងលែៈតាញីសជៃពាង់ នទ្រែលមាអ៝ន់គ៝ប់ជានកោរាញម៝ត់អ្វាញ់លាមឞ្រីអេឆីប អ្យា។#៤១:៤១ 9អើនោ ខាន់មៃហាន់ព្លឹអាឞឹរីអ៝ន់គើញហ៝ម់ មឞើសងក៝ចមាពាង់កើតនអា៖ «អើឞឹ យោឆែបក៝នមៃទាន់នតិញ កោរាញឞ្រាសអ៝ន់ក៝នជានកោរាញម៝ត់អ្វាញ់លាមឞ្រីអេឆីប ទាន់ឞឹហាន់តឹមម៝ប់ដាសក៝នតាអ្យារ៝ លើយអោសក៝ប់ជ៝ៈ។#ការ ៧:១៤ 10មៃគុតាឞ្រីកោឆែនតឹមទាច់ដាសនតុកគ៝ប់គុ នអ៝ប់មាមៃនើម នអ៝ប់មាក៝នមាឆៅមៃ នអ៝ប់មានទ្រោកមាឞែឞ្យាប់មៃ នទ្រែលមាទឹងលែៈនទើមៃគែស។ 11តៃគ៝ប់ពេតឆ្យាម់មៃតាឞ្រីអីនៃ នទ្រែលមារានាក់វ៝ល់មៃ មោអោសអ៝ន់ខាន់មៃខឹតជីង៝តឆា យ៝រលាសហោមព្រាម់នាម់ជឹតនាវជីង៝តក្វ៝ង់អ្យា»។ 12អើនោ ទឹងលែៈខាន់មៃ នទ្រែលមាអ៝សបែនយាមឹនលែៈឆៃជេសគ៝ប់តាអ្យា គ៝ប់ងាន់ងើយនទ្រែលខាន់មៃ។ 13អើនោ ខាន់មៃមឞើសងក៝ចមាឞឹឞ៝ន់រីតៃ ទឹងលែៈនាវទើយគ៝ប់ជានតាឞ្រីអេឆីប អ្យា នទ្រែលមាទឹងលែៈនទើខាន់មៃលែៈឆៃ។ អ៝ន់គើញខាន់មៃលែវឞឹហាន់តាអ្យា”។ 14យោឆែបអូតបែនយាមឹននហ៝មាញុមតាអ៝សពាង់រី បែនយាមឹនកើតនទ្រីដ៝ង់។ 15យោឆែបអូតនោៗពាង់ទឹងលែៈ ញុមដ៝ង់ ជេសរីខាន់ពាង់តឹមមឞើសងើយងក៝ចឞ្រីដាសពាង់។

16នាវអីនៃតាង់ត៝ត់តាជៃកាដាច់ផារ៝នរីងាន់ លាសអ៝សនោយោឆែបលែៈត៝ត់តារី ផារ៝ន នទ្រែលមាផូងកោរាញពាង់រាម់មអាកងាន់។ 17កាដាច់ផារ៝នលាសមាយោឆែប៖ “មៃលាសមាអ៝សនោមៃកើតនអា៖ «នទ្រាប់ឆែសលៀខាន់មៃនៃព្លឹឆឹតហ៝ម់តាឞ្រីកានានរី‌ 18ជេសរីលែវឞឹ នទ្រែលមារានាក់វ៝ល់ខាន់មៃហាន់តាអ្យា តៃគ៝ប់អ៝ន់នតុកអ្វែសរាលាវឞូតាឞ្រីអេឆីប អ្យាមាខាន់មៃ ជេសរីខាន់មៃឆានទើអីកាសរាលាវឞូដ៝ង់តាឞ្រីអ្យា»។ 19មៃលាសដ៝ង់មាខាន់ពាង់៖ «អ៝ន់ខាន់មៃញអោតរាទែសឞើសឞ្រីអេឆីប អ្យាមាញច្វាន់រាទែងអូរក៝នខាន់មៃ នទ្រែលមាឞឹខាន់មៃហាន់តាអ្យា។ 20លើយអោសពើសទ្រាប់នទើខាន់មៃ យ៝រលាសនទើអ្វែសរាលាវឞូតាឞ្រីអេឆីប អ្យាជេងនទើខាន់មៃ»”។

21ជេសរីមពោលអ៝សក៝នអីឆ្រាអែលជានតឹងកើតនៃ។ យោឆែបឆ៝ៈរាទែសអ៝ន់មាខាន់ពាង់កើតនាវផារ៝នលាសមាពាង់ នទ្រែលមាអ៝ន់នទើខាន់ពាង់ឆោងឆារ៝ៈត្រ៝ងដ៝ង់។ 22យោឆែបអ៝ន់ឞ៝កអាវមហែមានោៗពាង់ទូឞ្លាសទូហ្វេទូហ្វេ យើនមាពាង់អ៝ន់ព្រាក់មាបែនយាមឹន ៣០០ កាក់ព្រាក់ នទ្រែលមាព្រាម់ឞ្លាសឞ៝កអាវ។ 23ពាង់ញជ្វាល់នទើមាឞឹពាង់ ឆែសលៀជឹតអឹ គែសនអ៝ប់មានទើអ្វែសៗតាៈឞើសឞ្រីអេឆីប ឆែសលៀមែជឹតអឹ គែសនអ៝ប់មាឞាទាប់តាកាលើរី នទ្រែលមានទើអ៝ន់ឞឹពាង់ឆោងឆារ៝ៈត្រ៝ងតៃ។ 24ជេសរីយោឆែបអ៝ន់អ៝សនោពាង់ឆឹត នហ៝មានតិញខាន់ពាង់៖ “លើយតាខាន់មៃតឹមរាលាច់តឹមល៝ក់រ៝ៈត្រ៝ងរីតៃ”។

25ខាន់ពាង់លោសឞើសឞ្រីអេឆីប ឆឹតតាយាកោបឞឹខាន់ពាង់នើម តាឞ្រីកានានរី។ 26ត៝ត់តាឞ្រីនៃ ខាន់ពាង់មឞើសងក៝ចមាឞឹខាន់ពាង់៖ “ក៝នមៃយោឆែបហោមរេស ពាង់ជានកោរាញម៝ត់អ្វាញ់លាមឞ្រីអេឆីប ងាន់”។ យើនមាយាកោបមោអោសជីឞោកជីតោរ យ៝រលាសពាង់មោអោសអ្យាត់នាវខាន់ពាង់មឞើសងក៝ចនៃ។ 27ត៝ត់មាខាន់ពាង់មឞើសងក៝ចទឹងលែៈនាវយោឆែបទែនតិញរីនើស ឆៃរាទែសយោឆែបទែញជ្វាល់គៃមារាទែងពាង់ហាន់តាឞ្រីអេឆីប រីមើយាកោបនតើមនទ្រ៝ត់ឆាក់។ 28ជេសរីអីឆ្រាអែលអីឞូក្វាល់យាកោបដ៝ង់លាស៖ “លែៈគ៝ប់អ្យាត់ហើយ្ស! យោឆែបក៝នគ៝ប់ពាង់ហោមរេស គ៝ប់អុចហាន់ម៝ប់ពាង់អេល៝រមាគ៝ប់ខឹត”។

Versete biblice populare din
នាវនតើម 45

Biblia:

Bunong

Versiune: Bunong - cmoK