Yohanes Uram 18
18
Sun Yahudi yala nang aryi Er Yesus bisi talebmai uram
18:1-11
1Ura, Yesus biryi Er Nai Imtamnyi si weik eboka sirya molobmou ura, Er ab Er miliramnyi nang ab anaboka me duman si Kidron likoka binmai. Me si Kidron otam likoka binmai ura, co si zaitun kuramwe wa dam ai asi binmai. 2Yesus ab Er miliramnyi nang ara a wa dam liki ilinto baramnyi. Uca, Yudas Iskariot Yesus bisi kikibkwamunyi bira Er Yesus binmou dam sirya bikmou. 3Ura, Yudas biryi yandoka yin doun nang mer ab Er Imtamnyi kan ninyi kan noutam kuboka antanirdeirin deyok nang ab Farisi nang ab aryi bokdonokmai nang ab asi boyanmai. Ara, sunci, “Yesus bisi talebkwayeb,” tenen Er Yesus kuramwe co wa dam iyanmai. A nang ara uk ubna ab yuk berengna dinyi ab ninyi on ya taleboka yanmai. 4Ura, Yesus biryi Erti kubkwamwe dinyi nirya bikmou cok, anabdobmouci, a ninyi mer ab ebdanmai. Anabdobmou cok, Erci sun yanmai nang asi, “Unanyi bisi ingkiringmarum do?” eboka asibdenmou. 5Asibdenmou ba, sunci, “Yesus Nazaret ateinyi bisi talebkwayeb ati yanmab,” ebmai. Ebmai ba, Yesus biryi sunsi ato ebmou. “Nira anyi a kunum,” eboka lak ebdanmou. 6Ato ebmou ba, sun Er Yesus bisi taleryanmai nang ara kisibdoboka dongtam langakoka tukwetam dokoka sakmai. 7Ura, Erci tamuboka ato eboka asibdenmou. “Unanyi bisi ingkiringmarum do?” Ura, sunci tubto, “Nazaret ateinyi si Yesus bisi talebkwayeb ati yanmab.” 8Ebmai ba, Er Yesus biryi sunsi ato ebmou. “Nira Anyi a kunum ati sirya ebmasin. Sunci Nisi taleryanmanurum ati, Ni milin nang asi ur taklobdarur.” Yesus biryi ato ebmou. 9Ara, Yesus biryi minob eamwe to kunubkwamwe ati, Erci ato ebmou. Ara, Erci minob ura ato eamwe. “Kanda Imtamnyi biryi Nisi karebmanoumwe nang asi nirya kalingnanse uca, a nang kankan aryi ninyi tentok ababyi kum wanikminikmase,” ebmou. 10Ura, Simon Petrus biryi ninyi on ya bobmou cok, erci talebmou ura, ninyi si Malkhus amol sekwetebmou. Anyi Malkhus bira Er Imtamnyi kan ninyi kan noutam kuboka antanirdeirin sienyi wa irmilinanyi kuramwe. 11Ura, Yesus biryi Petrus bisi ato ebmou. “Ninyi on ya deiblobdum se. Er Imtamnyi biryi Nisi mambul dinyi karebkwanir ati, Niryi, ‘Mambul dinyi takuna ati Ni li,’ ebkwan do? Ato tenen kum,” ebmou.
Er Yesus bisi Yahudi yala nang erebdob kalingnanyi si Hanas bisi bobinmai uram
18:12-14
12-13A sirya ebmou ura, sun yin doun nang ab yin doun nang sienyi ab sun Yahudi yala nang bokdonokmai nang ab aryi Yesus bisi talebmai. Talebmai ura, sunci Yesus bisi tabwe deboka erebdobnyi si Hanas dam bobinmai. Hanas bira Kayafas yamal kuramwe. A kwalibmai kwalina ara Kayafas bira Er Imtamnyi kan ninyi kan noutam kuboka antanirdeirin sienyi kuramwe ba, er ner nai si Hanas bibabyi erebdob kalingnanyi kuramwe. 14Ura, Kayafas bira sun Yahudi yala nang sien nang yuk nang asi ato eamwe. “Nun Yahudi yala nang nirya asi lebkwayeb ati, ninyi tentok asi ur obkwanung.” Ara, “Yesus bisi obkwayeb,” tenen ato eamwe.
Petrus biryi Er Yesus biti, “Anyi bira ni walwal,” ebmou
18:15-18
15Yesus bisi taleboka bobinmai ba, Simon Petrus ab Er Yesus bisi miliramnyi nang kankan yuknyi ab asing dinmai cok, milibmarei. A miliramunyi bira Er Imtamnyi kan ninyi kan noutam kuboka antanirdeirin sienyi dam kunanyi kuramwe ati, erci Hanas ai umbura ur wengbinmou. 16Ura, Petrus bira, “Wengbana ati ni ilil,” tenen baitam bublan dam tikmou ati, Yesus miliramunyi yuknyi bira antanirdeirin sienyi bingnamunyi biryi tamuboka yanmou. Ara, bublan dam kalingna ner asi, “Ni kwit bibabyi ur wengbinkur do?” eboka molobmou ura, erci Petrus bisi ai wengbobinmou. 17Ura, a ner aryi er Petrus bisi ato ebmou. “Kanbabyi Yesus bisi milirandimnyi kurum do kum do?” Asibdenmou ba, Petrus biryi, “Ni kuma,” ebmou. 18Lukunda arum kubmou deyok aryi, sun wa irmiliramnyi nang ab yuk Yahudi yala nang ab ara, “Uk eikwayeb,” tenen aknabdongoboka uk dam aryi tikmai. Tikmai cok, er Petrus bibabyi, “Uk eikwan,” tenen sun ab tonkwa uk dam tikmou.
Er Imtamnyi bisi dama deirin ai sienyi biryi Yesus bisi dibliliboka asirdena yuk-yuk asibdenmou uram
18:19-24
19Ato kubmou bok, Er Imtamnyi kan ninyi kan noutam kuboka antanirdeirin sienyi biryi Er Yesus bisi dibliliboka asirdena yuk-yuk asibdenmou. Ara, “Kan milin nang ara una nang do?” eboka asibdenmouci, “Kan eterena ara una eboka etererandim do?” eboka asibdenmou. 20Ato eboka asibdenmou bok, Er Yesus biryi ersi ato ebmou. “Niryi sunda tukwetam kurandum nang asi laktoto etereransise. Tonda, sun Musa Uram eteren ai wengbindoka laktoto etereransise. Tonda, Bait Allah ai dam kuranse ba, laktoto etereransise. Akai ara sun Yahudi yala nang nirya aryi bulurandum ai kuboka lak etereransise. Inirdeirin dinyi ton kum etereranse. 21Ati, unato ati kanci Nisi asibdenmanirim do? Sun Ni eterena uram kekeraningnyi nang asi asibderum. A nang ara Niryi etereranse uram diboka bikting,” ebmou. 22Er Yesus biryi ato ebmou ba, sun buluryanmai Yahudi nang sien nang kankan aryi tonyi biryi yu wekmouci, taruk iniboka Yesus bisi u molokdongobmou. U molokdongobmouci, erci Yesus bisi ato ebmou. “Nun Nai Hanas bira Er Imtamnyi kan ninyi kan noutam kuboka antanirdeirin sienyi kuramwe ati Kanci ersi ina ngilingna uram ebminyei,” ebmou. 23Ebmou ba, Er Yesus biryi ersi ato ebmou. “Nira malyi dinyi utotoa kum ebman. Malyi dinyi ebtinyi uca, kanci Nisi, ‘Ato-ato eboka malyi uram ebmarim,’ eboka lak ebnurum. Niryi dib en uram ebmasin ati, kanci Nisi unato ati u molokdongobmanirim do?” ebmou. 24A sirya ura, Hanas biryi, “Ni yamal Kayafas dam bobindarur,” eboka arukdeibmou. Arukdeibmou ura, sunci Yesus bisi taleboka Er Imtamnyi kan ninyi kan noutam kuboka antanirdeirin sienyi si Kayafas dam bobinmai.
Er Petrus bira Yesus biti, “Ni walwal,” ebmou ara liki bitinyi dinyi ab liki winiryi dinyi ababyi ebmou uram
18:25-27
25Ura, Simon Petrus biryi, “Uk eikdobkwan,” tenen uk dam tuba tikmou ba, tonyi biryi ersi ato ebmou. “Kanbabyi Yesus milirandimnyi kurandim tenebman. Dib do kum do?” Ato eboka asibdenmou ba, Petrus biryi, “Ni kuma,” ebmou. 26Ura, yuknyi biryi ato ebmou. “Nunda co si zaitun kurande wa in dam bindoka Yesus bisi talebmabiryok, niryi asing dinman ara kanbabyi Yesus ab kubmarum asi asing eibmakin. Dib do kum do?” A asibdenmounyi bira Er Imtamnyi kan ninyi kan noutam kuboka antanirdeirin sienyi Kayafas wa irmilinanyi kuramuryi. Tonda, asibdenmounyi bira Petrus biryi amol sekwetebmounyi si Malkhus yalanyi kuramwe. 27Ato eboka asibdenmou bok, er Petrus biryi, “Ni kuma,” tubto ebmou. Ebmou bok, maka kirim aryi ngalukalibmou.
Er Yesus bisi taleboka Roma weik sienyi si Kaisar amwetam bunanyi si Pilatus bobinmai uram
18:28-40
28A sirya ura, sun Yahudi yala nang aryi Yesus bisi bobinmaici, Kayafas weik ai aryi anaboka Kaisar amwetam bunanyi si Pilatus er weik ai bobinmai. Ara, belerukna kobdob kubmou ba, sun Yahudi yala nang aryi, “Er Imtamnyi Uram walwal anyi ai wengbibyei,” tenen Pilatus ai bublan dam dibde bukmai. Ara, sun Yahudi yala nang aryi Er Imtamnyi Uram walwal nang ai wektingiryok, weik kwalina si Paskah kwalina ati sunti mem kubsute. A deyok aryi, sunci Pilatus ai kum wengbinmai. Eda, bublan dam tikoka dibde bukmai. 29Bublan dam tikmai ati, er Pilatus biryi er ai aryi kuboka anabmou ura, erci sunsi ato eboka asibdenmou. “Anyi bisi ni dam boyanmanurum ati sunci una deyok aryi boyanmarum do?” Ato eboka asibdenmou. 30Ato eboka asibdenmou bok, sun Yahudi yala nang aryi ato ebmai. “Anyi bira malinyi kurur ati ebmab. Malyi deyok kum kubte ura, nunci Ersi kan dam boyana kum kubmatibyi.” 31Ato ebmai ba, Pilatus biryi sunsi ato ebmou. “Ato kubte ura, sunci Anyi bisi bobindoka sunsi Yahudi yala nang aryi wenerdarandum to kuboka wenebdarur.” Ebmou bok, sun Yahudi yala nang aryi Pilatus bisi ato ebmai. “Nunci Anyi biti, ‘Weneboka obtibyi,’ tenebmabiryok, sunda Roma nang aryi, ‘Mem,’ esina uram deici aryi nunci Ersi weneboka obman kum kunub. Eda, sunda Roma nang aryi Anyi bisi weneboka obsindate,” ebmai. 32Ara, Er Yesus biryi, “Co lase deici deibkwaning biriman aryi obkwaning,” ebmou to kunubkwamnyi ati ato ebmai.
33Ura, Pilatus er ai wengbinmou ura, erci Yesus bisi ato eboka asibdenmou. “Kanda sun Yahudi yala nang asi arungdeirirandim Weik Sienyi kurum do?” 34Ato ebmou ba, Er Yesus biryi ersi ato ebmou. “Kan kanya aryi ato tenebmanirim deyok aryi, ato eboka asibdenmanirim do? Yuk nang aryi Niti ato eboka nukmaking deyok aryi, asibdenmanirim do?” 35Asibdenmou ba, Pilatus biryi ato ebmou. “Nira Yahudi yala nang kum kunun ati ni kum bikman. Kan yala nang ab Er Imtamnyi kan ninyi kan noutam kuboka antanirdeirin deyok nang ab ara Kansi ni taruk dam karebmaning. Ati, una deyok kubmakir do?” 36Pilatus biryi ato eboka asibdenmou ba, Yesus biryi ersi ato ebmou. “Nira Weik Sienyi kunun cok, Ni dobdobse mikib ara tukwetam kuraming weik sien nang mikib kum dobdobse. Nira tukwetam sien nang mikib dinyi dobdobmatinyi ura, Niryi Ni milin nang asi, ‘Yin mar doboka obkwayeb,’ eboka arukdeibtinyi uca, sunci mikib kuboka bisik sekmatingnyi uca, sun Yahudi yala nang ara Nisi talebman kum kubmaniting. Nira Mikibnyi kunun cok, tukwetam sien nang mikib kum dobdobse.” 37Ebmou ba, Pilatus biryi Ersi ato ebmou. “Ati, Kanda Weik Sienyi kurandim ati ebdanmarim do?” Ura, Yesus biryi ersi ato ebmou. “Nira Weik Sienyi kunun ati kan diba ati ebmanirim. Ni tukwetam yuryase ara dib en uram lak ebkwanse ati yuryase. Sun dib en uram bingna nang ara Ni eterenun to kekeraming.” 38Ura, Pilatus biryi, “Dib dinyi ara diboka kurur do?” ebmou. Ato ebmou ura, erci baitam bindoka sun Yahudi yala nang bulubmai asi ato ebmou. “Anyi bira deyok kum kubmar ati ebmasin.” 39Ebmurubmou cok, erci sun Yahudi yala nang asi ato ebmou. “Weik kwalina si Paskah kwalin tum berengnande ara tabwe debunyi tentok asi lordeirinun. Ati, niryi Anyi bisi lobdeibkwankin do? Sun Yahudi yala nang kalingnansir weik sienyi lobdeibkwansin do?” 40Ebmou bok, sun Yahudi yala nang bulubmai aryi ato ebmai. “Anyi bisi lobdeibsiminyei. Eda, yuknyi si Barabas lobdeibsurum.” Ura, Barabas bira, “Nunda Yahudi yala nang aryi sun Roma nang yakdonokoka yuk tikwayeb,” teneramuryi, Roma nang onanyi kuramwe.
Selectat acum:
Yohanes Uram 18: MTG
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@LAI 2007 (New Testament), @LAI2022 (Old and New Testament)
