Yohanes Uram 17
17
Er Yesus biryi Er Imtamnyi si weik eboka molobmou uram
17:1-26
1Yesus biryi ato ebmou ura, Erci imtam dibweleboka ato eboka molobmou. “Nai Imtamnyi o, Kanci Nira Kan Mi bisi erebdeibkwanirim uki tum sirya yanmar ati, Kanci Nisi erebdeibnurum. Kanci Nira Kan Mi bisi erebdeibniminyi uca, Niryi Kanda Ni Nai si weik erebdeibkwankin ati ato eboka molobkin. 2Kanci Nisi mikib karebmanunoumwe uca, Niryi weik sienyi kuboka sun im dangna tukwe dangna nang nirya asi arungdeirinun. Tonda, Kanci Ni taruk dam karebmanunoumwe nang asi iya kam kun dinyi karebkwan ati tikeibmanunoumwe. Ato deyok aryi, Niryi Kansi, ‘Nai, erebdeibnurum,’ eboka ati molobkin. 3Iya kam kun dinyi karebkwan ara ato kurur. Kanda Imtamnyi Iya Mikibnyi tentoknyi bisi diboka bikwanking ara iya kam kun dinyi deyok kurur. Tonda, Nira Yesus Kristus Kanci bokwetebnoumnyi bisi diboka bikwaning ara iya kam kun dinyi deyok kurur. 4Kanci Nisi takubdeibmanoumwe wa ara tukwetam kuboka iranse ani, sirya kunubman. A wa ibde kunuranse biriman aryi Niryi Kanti, ‘Iya Erebdobnyi kurur,’ tenen dinyi tukwetam nang urasintam aryi lak kimdeiriranse. 5Ura, ukuryok Kanci Nisi weik erebdeibnurum ati molobkin. Imtam tukwetam kum kikniamoumwe talak ara Ni ab Kan ab tonkwa kuranoumwe ba, iya erebdob si tonkwa boranoumwe. Ati, Kanci Nisi ato kuboka Kan urasintam aryi iya erebdob si tamuboka karebnurum.
6Niryi Kan si ninyi urasintam aryi lak kimnanse. Ara, tukwetam nang kankan aryi Kanci Nisi karebmanoumwe nang asi etereransiryok, Kan si lak kimnanse. A nang ara Kanci taleramoumwe nang kuramnyi ani, Ni taruk dam karebmanoumwe. Uca, a nang ara Kan Uram kunubde baramnyi ani, ukuryok ababyi kunubde baraming. 7A nang ara ukuryok aryi ato tenen bingnunung. Kanda Imtamnyi biryi Nisi mikib nirya karebmanoumwe uca, Nira iya mikibnyi kunun. Ato tenen bingnunung. 8Kanda Imtamnyi biryi Nisi eterebmanoumwe to, Niryi Kan Uram ebmuruboka a nang asi etereranse. A deyok aryi a nang aryi Niti, ‘Er Imtamnyi mikib dobdobmounyi kurur,’ tenen bingnunung. Niryi Kan Uram ebmuruboka etereranse uca, a nang aryi Kan Uram ati, ‘Dib en uram,’ tenen dororamnyi. Tonda, sunci Niti, ‘Er Imtamnyi biryi Bokwetebmounyi,’ teneraning. 9Kanci Nisi karebmanoumwe nang ati Niryi molobmilibman. Sun malyi kun dinyi kunurmurun nang ati Niryi kum molobmilibman. Eda, Kanci Nisi karebmanoumwe nang ati molobmilibman. A nang ara Kanci talerandim nang kunung deyok aryi, Niryi sunsi molobmilibman. 10Ni taruk dam kunurur dinyi nirya ara Kan dinyi kurur. Tonda, Kan taruk dam kukurur dinyi ara Ni dinyi kurur ati ebman. Nira Iya Erebdobnyi kunun lak kimdur ara a nang aryi Nisi dib teneraning biriman aryi lak kimdur ati ebman. 11Nira anaboka tukwetam tuba kum kubmurubkwan bok, a nang ara tukwetam tuba kubkwaming. Nira Kanda Imtamnyi dam weleyankwan ati ato ebman. Ati, Nai Imtamnyi. Kanci a nang ati, ‘Ni mabwe,’ tenen miliboka kalikdum. Kan si mikib deici aryi Kanci sunsi miliboka kalikdum. Kanci Nisi mikib si karebmanoumwe deici aryi Kanci sunsi kalikdum. Kanci kalikminyi uca, a nang ara neik kanya boboka antaniboka kubkwaming ati molobmilibmakin. Ara, Kan ab Ni ab neik kanya boboka antaniboka kununum to, a nang ababyi antaniboka kubting. 12Nira a nang ab tonkwa kuramoubwe ba, Niryi miliboka sunsi kalingnanse ani, ukuryok ababyi kalingnun. Ara, Kanci Nisi karebmanoumwe si mikib deici aryi Niryi sunsi kalingnanse. Kalingnanse uca, Kanci Nisi karebmanoumwe nang tentok ababyi kum wanikminiknou. Ba, Ni milin nang kankan aryi wanikminikwamunyi bitikwa wanikminikdau. Ara, Er Imtamnyi Uram minob ebmou to kunubkwamwe ati anyi wanikminikdau.
13Nai. Ni Kan dam weleyankwan. Ba, tukwetam tuba kuran cok, a uram nirya ebmakin. Ara, ‘Ni kanya kilkil weik kurande to, Ni milin nang kanya ababyi langdeiboka kilkil kubkwande,’ tenen Niryi Ni milin nang urasintam aryi ato ebmakin. 14Niryi Ni milinin nang asi Kan uram etereranse ba, sun malyi kunurmurun nang aryi sunti, ‘Nun li,’ tenen bimsa yariraming. A nang ara malyi kun nang ati milin nang kum kunung ati, sun malyi dinyi kunurmurun nang ara sunti, ‘Nun li,’ teneraming. Nira malyi kun nang milinanyi kum kunun to, Ni milin nang ababyi malyi kun nang milin nang kum kuraming ati ato ebman. 15Ati, Niryi Ni milin nang ati molobmilibman cok, ‘Miliboka kalikdum,’ eboka molobmilibman. Ara, ‘Ni milin nang ara tukwetam aryi kuboka imtam ai anmalakoka boyarum,’ eboka kum molobmakin. Eda, ‘Tukwetam tuba kubkwaming ba, isa sienyi Iblis biryi malyi kibcei,’ tenen Kanci kalikdum ati molobmakin. 16Ni milinin nang ara malyi kurmurun nang milin nang kum kuraming. Nira malyi kurmurun nang milinanyi kum kunun to, sunbabyi neiktoto malyi kurmurun nang milin nang kum kunung. 17Ati, Kanci dib en uram karebmoumwe biriman aryi a nang asi Kan uram kunubde baraming nang asi kibdeibdum. Kan uram ara dib en uram kurur ati ebman. 18Kanci Nisi tukwetam bokwetebnoumwe ara malyi kurmurun nang kankan asi bokwetebnoumwe to, Niryi neiktoto Ni milin nang asi bokdonokman uca, malyi kurmurun nang kankan asi tuba kubkwaming. 19Niryi Ni damnyi Kanti karebdanmakin ara, ‘Ni milin nang ababyi Er Imtamnyi biti sun damnyi diboka karebdandoka Er Uram kunubkwanting,’ tenen karebdanmakin.
20Nai, Niryi Kansi molormilibmakin ara Ni miliranei nang atikwe kum molormilibmakin. Eda, Ni miliraning nang aryi lak ebkwaming uram deici aryi Nisi dib tenebkwaningnyi nang nirya ababyi Ni molobmilibman. 21‘A nang nirya neik kanya boboka antaniboka kubting,’ tenen Ni molobmilibman. Nai, Kan ab Ni ab ara tanglona kum uca antaniboka kununum to, sunbabyi neiktoto antaniboka kuna teleb. A nang ara Nun dam kun nang kubingnyi uca, sun tukwetam aryi kuboka malyi kun nang aryi Niti, ‘Er Imtamnyi bokwetebnunyi,’ tenen dib tenebniting. 22Kanci karebnumnyi uca, Niryi Kan kiknirandim ilil tenen dinyi lak kimdeirinun to, Nibabyi neiktoto sunsi karebman uca, nun kikniranim ilil tenen dinyi lak kimdeirinung. Ara, ‘Antaniboka kubting,’ tenen Niryi a dinyi karebman. 23Nira a nang dam kunanyi kunun ba, Kanda Imtamnyi bira Ni dam kunanyi kurum ati ebman. A nang ara diboka antaniboka kubting uca, sun tukwetam aryi kuboka malyi kun nang ara Niti, ‘Er Imtamnyi Bokwetebmounyi,’ tenen bikdobkwaning. Tonda, Kanda Imtamnyi biryi Nisi iya boukwe weik kunurum to, Nibabyi a nang asi iya boukwe weik kunun tenen bikwaning.
24Nai, Kanci Nisi karebmanoumwe nang ati Niryi ato eboka molobmilibkwinkin. Ni bina kubkwan dam ara a nang ababyi bina kubkwaming. Tonda, Kanci Ni si weik erebdeibkwandim asi asing eibting ati molobman. Im ton tukwe ton kum kiknibmoumwe talak ara boukwe weik aryi Nisi iya erebdob si karebmanoumwe. Ati, Kanci neiktoto tamuboka erebdob si karebkwanurum ati molobdobmakin.
25Nai, Kanda dib dinyi deici aryok deyok lilirandimnyi bisi sun tukwetam nang kuramingnyi nang kum bingkunung bok, Niryi Kansi bingkunun. Tonda, Ni milin nang ara Niti, ‘Er Imtamnyi biryi Bokwetebmounyi,’ tenen bingnunung. 26Niryi Kanda Imtamnyi biti, ‘Ato-ato kururnyi kurur,’ eboka a nang asi lak kimdeiriranse ani, aminda ababyi lak kibdeibkwan. Ara, ‘Ni Nai Imtamnyi biryi Nisi iya boukwe kunurur to sunbabyi iya boukwe weik kubting,’ tenen Niryi Kansi lak kibdeibmurubkwan. Tonda, Niryi, ‘Sun kanya dam kubkwan,’ tenen Kanda Imtamnyi bisi a nang ara Nisi dib tenebningnyi nang asi lak kibdeibmurubde binkwan,” ebmou.
Selectat acum:
Yohanes Uram 17: MTG
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@LAI 2007 (New Testament), @LAI2022 (Old and New Testament)
