Kisah Para Rasul Uram 5
5
Ananias ab er ner Safira ab kunusa dobmarei uram
5:1-11
1A talak aryi ninyi tentok si Ananias ab er ner Safira kurandei. A nang bitinyi ara sunbabyi sun wa ton yuk nang ati ebmarei ura, co bok dobdobmarei. 2Dobdobmarei ura, er Ananias biryi co bok ton dinyi kunusa dobmou ura, ton dinyi boboka sun Teleb Uram deyok kouboka eteren nang asi karebmou. Ara, ton dinyi kunusa dobmou asi er ner bikmou. 3Er Ananias biryi karerbinmou ura, er Petrus biryi ersi ato ebmou, “Se Ananias, unato ati isa sienyi si Iblis kan kanya asi wekmakir do? Kanci co bok ton dinyi kunusa dobmarim ati ebman. Ati, kanci unato ati, ‘Niryi Er Imtamnyi Kanya Roh Kudus asing kubdeibkwan,’ tenebmomwe do? 4Kanci kan wa yuk nang asi kum dekmoumwe talak ara kan wa kuramwe. Ani, sirya dekmoumwe ura, kan dobdobmoumwe co bok ara kan dinyi kibmakou. Ati, unato ati kanci, ‘Ton dinyi kunusa dobkwan,’ tenebmoumwe do? Ato kuboka kanci iya malyito kubmarim. Ara, kanci, ‘Ninyi asing kubdeibkwan,’ kum tenebmoumwe. Eda, ‘Er Imtamnyi bisi asing kubdeibkwan,’ tenebmoumwe ati iya malyito kubmarim,” ebmou. 5Ura, er Ananias bira er Petrus biryi ebmou to kekebmou ba, tukwe deici sakoka dibmou. Ura, sun er Ananias dibmou deyok kekebmai nang nirya ilil weik kubmou. 6Dibmou ura, sun kam nang yandoka er Ananias bisi aling akuboka tukwe dongorbinmai.
7Kiting winiryi bisibmou ura, Ananias ner ara er akenyi dibmou asi bingna kum cok, yanmou. 8Yanmou bok, er Petrus biryi ersi, “Safira, a wa dengna karebmasungwe co bok a kunum karebmasungwe do kum do?” Asibdenmou uca, er Safira biryi tola ati, “Nai, a kunum,” ebmou. 9Ebmou ura, er Petrus biryi ersi, “Unato ati sunci, ‘Er Imtamnyi Kanya Roh Kudus asing kubdeibkwanim,’ ebdanmarurumwe do? Kan kekerum. Kan akenyi tukwe dongorbinmang nang ara bublan dam yanganmang. A nang ara kanbabyi tukwe dongorbinkwinking,” ebmou. 10Er Petrus biryi ato ebmou bok, Ananias ner ababyi er Petrus urasintam aryi sakoka dibmou. Dibwe ura, sun kam nang wengyandokabiryi, a ner dibmou asi asing eibmai ura, sunci ersi boboka er akenyi dongoabyi lingkwa dam asi tukwe dongorbinmai. 11Ura, sun buluboka Er Imtamnyi Uram kekeramnyi nang ton sun yuk nang aryi a deyok ati kekebmaici, ilil weik kubmou.
Sun Teleb Uram eteren deyok nang aryi ilil tenen dinyi ilinto kikniramnyi uram
5:12-16
12Sun ninyi kanya ilil weik kunmou bok, sun Teleb Uram deyok kouboka eteren nang aryi ilil tenen dinyi ilinto kikniramnyi. Ara, sunci, “Sun ninyi aryi Er Imtamnyi bisi dib tenebkwaming,” tenen, “Nai e,” tenen dinyi ilinto kikniramnyi. Kikniramiryok, sun Er Imtamnyi Uram dib tenen nang nirya ara susuk akwe lelebdandoka weik ai si, “Salomo biryi doamwe ai,” buluboka kuramnyi. Akai ara abilinga imna kum uca, duma dem deibloamnyi ai asi buluboka kuramnyi. 13Kuramnyi bok, sun yuk nang ilil aryi sun ab urubdanmang kum kuramnyi. Urubdanman kum kuramiryok, sunci sun Er Imtamnyi Uram dib tenen nang ati kisal dangnamnyi. 14Ura, ninyi ilinto ara sal babyi ner babyi, Er Imtamnyi bisi dib tenebkalibmai uca, sun Er Imtamnyi bisi dib tenen nang tabangdongoramnyi. 15Sun Teleb Uram eteren deyok nang aryi ilil tenen dinyi kikniramnyi ati, sun ninyi aryi sun u yiramwe nang ab sun mikib kum nang ab asi man sokon deici boboka bisik iririkna dam asi burdeiramnyi. Ara, sunci, “Er Petrus yibaci ba, er kiting ula ababyi nunsi bol libsici ba, kekdobkwayeb,” tenen er Petrus bisi dibde buramnyi. 16Ara, Yerusalem dam-dam doramnyi atei aryi kuboka ninyi yubwa-yubwa yandoka sun Teleb Uram eteren deyok nang dam asi buluryangaramnyi. Bulubmai cok, sunci sun u yin nang ab ton sun isa wekamwe nang ab asi boyanmai. Boyanmai ura, sun nirya asi kwetebmai.
Sun Teleb Uram eteren deyok nang asi wenebmai uram
5:17-25
17Sun Teleb Uram eteren deyok nang aryi ninyi kwetebmai ati, Er Imtamnyi kan ninyi kan noutam kuboka antanirdeirin sienyi ab er miliramnyi nang ara sun Saduki nang ab sun kanya dam aryi yu weik kubmou. 18Yu weik kubmou aryi sunci sun Teleb Uram deyok kouboka eteren nang asi talebmai cok, ninyi wenen ai dongorbinmai. 19Dongobmai ura, lukunda kibmou ura, Er Imtamnyi biryi Er uram eryuryangananyi tentok asi bokwetebmou. Bokwetebmou ura, anyi bira ninyi wenen ai bindoka bublan kukeiboka sun Teleb Uram eteren deyok nang asi baitam bobinmou. Bobinmou ura, erci sunsi ato ebmou. 20“A nang, sunci Bait Allah ai ara Er Imtamnyi biti ninyi dama deirin ai dam bindoka a kam kuna deyok uram eterebdarur,” ebmou. 21Ura, belerukna kobdob berekmou ba, sunci a uram kunuboka Bait Allah ai dam bindoka eterebmai. Eterenmai ba, sun Er Imtamnyi kan ninyi kan noutam kuboka antanirdeirin sienyi ab er miliramnyi nang ab yanmai. Yanmai ura, sunci sun Israel yala nang uram sengkwetena nang ab sun Israel yala nang sien nang ab asi nabmai ura, uram sisingmai. Uram sisingmai cok, sunci sun arungna nang asi, “A Teleb Uram eteren deyok nang asi boyandarur,” ebmai. 22Ebmai ura, sun arungna nang aryi ninyi wenen ai bindoka dinmai uca, a nang asi kum eibmai. Ura, sunci tamuryandoka ato ebmai. 23“Nai yabwe, nunda ninyi wenen ai binmab ura, bublan diboka tirikdongobmou asi asing eibmab. Tonda, sun ninyi wenen ai kalingna nang ara bublan asi kalikmang asi asing eibmab. Ura, bublan kukeiboka wekmab uca, ninyi ton kum eibmab,” ebmai. 24Ato ebmai ba, sun Bait Allah ai kalingnamnyi yin doun nang sienyi ab sun Er Imtamnyi kan ninyi kan noutam kuboka antanirdeirin deyok nang ab sun kanya aryi, “Nong e, una kubmar do?” teneboka sun kanya kankana kubmou. 25Kankana kubmou bok, ninyi tentok aryi sun dam yandoka erci sunsi, “Nai yabwe kekendarur, sunci ninyi wenen ai dongobdau nang ara Bait Allah ai dam kuboka ninyi asi eterenmang,” ebmou.
Sun Teleb Uram eteren deyok nang asi sun Yahudi yala nang asi uram sengkwetena nang urasintam bobinmai uram
5:26-42
26Ebmou ba, sun yin doun nang sienyi ab er arungnamwe yin doun nang ab bindoka sun Teleb Uram eteren deyok nang asi borbinmai. Ara, “Ninyi aryi keil doboka nunsi obsingnyei,” tenen ilil kubmou ati, mikib asa kum boyanmai.
27Sirya boyanmai ura, sunci sun Teleb Uram eteren deyok nang asi sun Israel yala nang asi uram sengkwetena nang dam tingdeiriryanmai. Ara, sun Er Imtamnyi kan ninyi kan noutam kuboka antanirdeirin sienyi Imam Besar biryi asiboka sun deyok lilibkou ati, tingdeiriryanmai. 28Tingdeiriryanmai ura, Imam Besar biryi sunsi ato ebmou, “A nang se, unato ati, nunci, ‘Mem,’ ebmasoubwe dinyi asi dakbisibmarum do? Ara, nunci sunsi, ‘Anyi Yesus si siboka eterena mem,’ ebmasoubwe bok, sunci tataboka eterendarur. Sunci eterendarur aryi sun Yerusalem atei nang nirya a deyok akwe erdaraming. Ara, sunci nunti, ‘Er Yesus dibmoua asi sunci malyi kubdau,’ tenen tatab-tatab eransurum ati, sunci eterendarur,” ebmou.
29Er Imtamnyi kan ninyi kan noutam kuboka antanirdeirin sienyi biryi ato ebmou ba, er Petrus ab er kwit yabwe ab aryi ersi ato ebmai, “Nunci Er Imtamnyi biryi ebmaci to kunuboka sun ninyi aryi ebmangnyi to barwetam kimna teleb. 30Nun Nai Imtamnyi bira nun abwe yabwe aryi moloraminyi biryi Er Yesus bisi kam bukeibmou. Anyi bira sunci co lase likniboka obmandaunyi dibmou asi Er Imtamnyi biryi kam bukeibmou. 31Bukeibmou ura, Er Imtamnyi biryi Ersi erebdeiboka Lemna Deyok Sienyi tikeibwe. Ara, sun Israel yala nang aryi sun malyi dinyi takoka Er Imtamnyi kanya asi teleb kubdeibkwaming ati, Erci sun malyi kun dinyi kilibkwande. 32Nunda a dinyi ara dib kubmou dinyi asi asing eibmoubwe ati lak ebmab. Tonda, Er Imtamnyi Kanya Roh Kudus ara Er Imtamnyi biryi nunda Ersi dib tenen nang asi karebmasou Kanya ababyi a dinyi dib eboka lak kimdur,” ebmai.
33Ebmai ura, sun a uram kekebmai sien nang aryi sun kanya dam aryi yu weik kubmouci, “A nang asi obkwayeb,” teneboka uram sisingmai. 34Uram sisingmai bok, ninyi tentok Farisinyi si Gamaliel biryi uram ton ebmou. Anyi bira Musa kerek sengna etereramunyi kuramuryok, sun Israel yala nang nirya aryi kisal dangdaminyi kuramwe. Anyi biryi, “A nang asi baitam bobinabmum ba, uram ton ebkun ati,” ebmou. 35Uca, baitam bobinmai ura, Gamaliel biryi sunsi ato ebmou. “Ni kwit yabwe Israel yala nang kekebnindarur. Sunci, ‘A nang asi una kubkwayeb,’ tenen diboka teneibdarur. 36Minob talak aryi ninyi tentok si Teudas biryi, ‘Nira sienyi,’ eboka erdamnyi erebdeibdanmou. Erebdeibdanmou ura, ninyi empat ratus baryi ersi milinmai ani, yuk nang aryi ersi obmai ura, er miliramnyi nang yuk-yuk binsekdobmai. 37Ura, a mutuk nang si sekmai talak aryi neiktoto dinyi anabmou. Ara, Galilea mutuknyi si Yudas biryi erdamnyi erebdeibdanmou ura, erci ninyi ilinto asi bokwebminikmou. Ura, yuk nang aryi ersi obmai ura, er milinmai nang neiktoto yuk-yuk binsekdobmai. 38A deyok aryi, niryi sunsi ato ebkwinsin, sunci a nang asi taklobmunci, malyi kubmunyei. A nang aryi tenen dinyi ab sun ukuraming dinyi ab ara ninyi aryok kurdeirin dinyi kubci ura, a dinyi kum dankwande. 39Ba, a dinyi ara Er Imtamnyi biryi kurdeirin dinyi kubci ura, sunci kum daneibman kum. Ati, sunci, ‘Er Imtamnyi ab obdabibyei,’ tenen a nang asi ur taklobdarur.” Er Gamaliel biryi ato ebmou ba, sun uram sisingmai nang aryi er uram asi kekebmai.
40Ara, sunci sun Teleb Uram deyok kouboka eteren nang ara tabwe debmai nang asi naboka sunci sunsi, “Er Yesus si aryi eterena mem,” ebmai ura, tabwe lobdeiboka taklobmai.
41Ura, sun eteren deyok nang ara sun kanya kilkil kuboka sun Yahudi yala nang sien nang dam aryi binsekmai. Ara, sunci, “Nun Du Yesus biti alyi kubdeibmasing ara nun kanya teleb kubmasir,” tenen binsekmai. 42Ura, uki nirya Bait Allah ai dam wengbindoka sun ninyi yuk-yuk ai ton wengbindoka sunci tanglona kum etereboka Er ninyi Lemsururnyi si Yesus uram Teleb Uram lak eramnyi.
Selectat acum:
Kisah Para Rasul Uram 5: MTG
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@LAI 2007 (New Testament), @LAI2022 (Old and New Testament)
