Kisah Para Rasul Uram 4
4
Er Petrus ab Yohanes ab asi sun Yahudi yala nang uram sengkwetena nang dam bobinmai uram
4:1-22
1Er Petrus ab Yohanes ab aryi sun bulubmai nang asi ato enmarei bok, sun Er Imtamnyi kan ninyi kan noutam kuboka antanirdeirin sien nang ab, Bait Allah ai kalingna deyoknyi ab, sun Saduki nang ab tonkwa sun dam yanmai. 2A nang ara yu kanya boboka sun dam yanmai. Ara, er Petrus ab Yohanes ab aryi sun bulubmai nang asi, “Er Yesus bira kam bukokmou ati, sun diamingnyi nang neiktoto kam bukokwaming,” eboka eterebmarei deyok aryi, sun kanya yu kubmou. 3Yanmai ura, sunci er Petrus ab Yohanes ab asi taleboka sun malyi kun nang wenen ai asi bobinmai. Lukunda sirya kubmou ati, sunci, “Akai asi mabmaringnyi ani, ambutum belerukna kobdob berekci ura, a nang ara sun Yahudi yala nang asi uram sengkwetena nang asi bobinkwamib,” tenen bobinmai. 4Bobinmai bok, er Petrus ab Yohanes ab aryi eterebmarei uram asi kekebmai nang ilinto dib tenebkalibmai. Uca, sun Er Yesus bisi dib tenen nang ara ninyi lima ribu baryi kuramnyi.
5Mabmai ani, belerukna kobdob berekwe ura, sun Yahudi yala nang asi uram sengkwetena nang bulubmai. Ara, sun sien nang ab, sun deyok lilin nang ab, tonda sun Yerusalem atei aryi kuboka er Musa kerek sekamwe uram etereramnyi nang ab nirya bulubmai. 6Bulubmai ura, sunci Er Imtamnyi kan ninyi kan noutam kuboka antanirdeirin sienyi si Hanas ab, er yala nang Kayafas ab, Yohanes ab, Aleksander ab, tonda er yala nang yuk nang ab tonkwa uram sisingmai. 7Ura, sunci er Petrus ab Yohanes ab asi naboka, “Noutam tikdurum,” ebmai cok, sunci sunsi, “Unato mikib biriman aryi, unato si biriman aryi sunci a yan deneamunyi bisi kwetebmarurumwe do?” eboka asibdenmai.
8Ato eboka asibdenmai ba, er Petrus biryi er kanya dam asi Er Imtamnyi Kanya Roh Kudus langkibmou bok, sunsi ato ebmou. “Ni nai yabwe o, nun Yahudi yala nang sien nang ab, nun deyok lilin nang ab, ni ebkwinsin uram asi kekebdarur. 9Sunci ukuryok lilibmarum deyok ara nunci teleb dinyi kuboka yibinman kumnyi bisi kwetebmanoumwe ati, lilibmarum asi kekebman. 10Lilibmarum ati, sun a bulubmarum nang nirya ab, ton sun Israel yala nang nirya ab aryi ni lak ebkwinsin uram asi kekena teleb. Ara, Er Imtamnyi biryi wibmou ninyi Lemsinanyi Yesus bira Nazaret ateinyi si biriman aryi anyi bisi kwetebmanoumwe ati ebman. Ara, sunci co lase deici likniboka bing dakmandaunyi si biriman ara Er Imtamnyi biryi kam bukeibmounyi si biriman aryi kwetebmanoumwe ura, a yan deneamunyi teleb kuboka sun urasintam a tikmar ati, asing eibmarum. 11Anyi Yesus biti sunda ai don nang aryi, ‘Bai donongna keil,’ tenebmarum bok, Er Imtamnyi biryi Ersi wiboka, ‘Iya teleb keil,’ teneboka erebdeibmou.#Mzm. 118:22 12Nun Du Yesus biryok ninyi lebsute. Yuknyi si biriman aryi lebdobman kum. Erda Er Imtamnyi biryi, ‘Er Yesus si biriman aryok ninyi lebtinyi,’ tenen Erci sun im dangna tukwe dangna nang nirya asi Er Yesus si akwe karebsou.” Ato eboka er Petrus biryi ebmou.
13Ura, er Petrus ab Yohanes ab ilil kum asa aryi ato ebmarei ura, sun Yahudi yala nang uram sengkwetena nang aryi, “A nang ara eterena lilina kum kuboka ur nang kuraming,” tenen bikmai cok, sunci “Nai e,” tenebmai. Ara, sunci, “A nang ara Er Yesus ab tonkwa kuramnyi nang,” tenen bikmai. 14Ato tenen bikmai asi, sunci er yan deneamunyi bira kwetebmareinyi bisi asing eibmai ati, sunci uram doboka ebman kum kubmai. 15Uram doboka ebman kum kubmai cok, sunci er Petrus ab Yohanes ab asi, “Nun uram sisingna dam aryi anaboka baitam dibde bukdurum,” ebmai ura, sun mamun uram sisikdanmai. 16Uram sisikdanmai cok, sunci, “A nang asi una kubkwayeb do? A nang aryi ilil tenen dinyi kiknibmarei ara sun Yerusalem atei nang nirya aryi bikmang. A dinyi lak kubmar ati, nunci, ‘Tola ati ebmarurum,’ ebman kum. 17Ato ebman kum asi, ‘Ninyi nirya aryi a deyok ati, kekebingnyei,’ tenen, nunci a nang asi, ‘Er Yesus si ara yuk nang tentok ababyi lak ebmunyei,’ ebkwayeb,” eboka sisikmai.
18Ato eboka uram sisikmai ura, sunci er Petrus ab Yohanes ab asi naboka, “Er Yesus si siboka eterebmunyei. A dinyi diboka taklobdarur,” ebmai. 19Ebmai bok, er Petrus ab Yohanes ab aryi uram doboka ato ebmarei. “Er Imtamnyi biryi ebdeibsou uram kekebkwanim do? Sunci nunsi ebdeibmarum uram asi kekebkwanim do? Dan dinyi ukuboka nunci Er Imtamnyi biryi, ‘Kikib,’ tenesurur dinyi kunubkwanim tenebmarum do? Sunci nunsi, ‘A si siboka eterebmunyei,’ ebmasurum bok, nunci sun takubdeibmasurum uram kum kekebkwanim ati ebman. 20Nun asing eibmoubwe dinyi ab nun kekebmoubwe dinyi ab ati, ‘Lak kum ebkwanim,’ tenebmatinimnyi ababyi, lak ebtinimnyi,” ebmarei.
21Er Petrus ab Yohanes ab ato ebmarei ura, sun Yahudi yala nang asi uram sengkwetena nang aryi, “Mem,” en uram ebtabakokabiryi, “Ur birurum,” eboka sunsi lobdeibmai. Ara, er Petrus ab Yohanes ab aryi malyi deyok kum eibmai ati, “A nang asi una kuboka wenebkwayeb do?” tenen kum bikmai. Ara, ninyi nirya aryi, “Yan deneamunyi bisi kwetebmou,” tenen Er Imtamnyi si weik ebmai ati, sun Yahudi yala nang uram sengkwetena nang aryi, “Er Petrus ab Yohanes ab asi wenebibyi ura, ninyi nirya aryi nunsi yu kubkwansing,” tenen ilil kanya bobmai. 22Er Petrus ab Yohanes ab aryi kwetebmareinyi bira kwalina empat puluh baryi bisibmunyi kuramwe ba, a ilil tenen dinyi ersi kubmou.
Sun dib tenen nang aryi Er Imtamnyi bisi, “Nun kanya katabum ebdeibsurum,” eboka molobmai uram
4:23-31
23Ura, er Petrus ab Yohanes ab asi sirya lobdeibmai ura, sunci sun kwit yabwe dib tenen nang dam binmarei. Binmarei ura, sunci sun kwit yabwe asi, “Sun Er Imtamnyi kan ninyi kan noutam kuboka antanirdeirin deyok nang ab sun deyok lilin nang ab aryi ato-ato ebmasing,” eboka lak ebmarei. 24Lak ebmarei ba, sun kwit yabwe kekebmai cok, sunci antaniboka sun uram erebdeiboka Er Imtamnyi bisi molobmai. Ara, sunci, “Nun Nai Imtamnyi o, Kanda im dangna tukwe dangna me kwan ababyi kikniamumnyi kurum. Kan utotoa nirya kikniamumnyi kurum. 25Kanda Kan Kanya Roh Kudus biriman aryi nun abwe Daud bisi ebdeibmunyi bisi nabkib. Kan arungnamumnyi Daud biryi ato ebmou,
‘Unato ati, sun Israel yala kum nang yu weik kubmai do? Unato ati, sun yuk yala nang aryi mar moun talyi yibmai do? 26Sun im dangna tukwe dangna weik sien nang kiknibminikdanmai. Sun sien nang aryi buluboka ebdanmai. Ara, “Er Imtamnyi ab Erci wiboka Bokwetebmounyi ab asi obkwayeb,” tenen bulubmai,’ ebmou. (Mazmur 2:1-2)
27Nai Imtamnyi o, nun abwe Daud biryi ebmou to, dib kunubmou. Ara, er sienyi Herodes ab, ton er sienyi Pontius Pilatus ab, sun Israel yala kum nang ab, ton sun Israel yala nang ab akatei kuboka antaniboka bulubmai. Ara, Kan wibmoumwe Arungnanyi si Yesus bira Kanci tikeibmoumnyi biti, ‘Obkwayeb,’ tenen mar moun yibmai. 28Mar moun yibmai asi, Kanda mikibnyi biryi minob teneibmoumwe to kunubkwamnyi ati, ato kubmai. 29Ati, ukuryok, Nai Imtamnyi, a nang aryi nunsi, ‘Mambul kubdeibsitibyi,’ ebmasing asi Kanci bikmarim. Tonda, nunda Kan arungna nang aryi ilil kum kuboka Kan uram ebkwamib ati, Kanci katabum kanya kareboka milibsurum. 30Ara, Kanci Kan taruk ninikmin ba, Kanci Kan wibmoumwe Arungnanyi Yesus si biriman aryi ninyi kwetebmincok, ilil tenen dinyi kiknibdum,” eboka molobmai.
31Ato eboka molobmai ura, sun bulubmai dam ara lulukmou ba, sun nirya asi Er Imtamnyi Kanya Roh Kudus aryi langkibmou. Langkibmou bok, sun kanya katabum ebmou bok, sunci Er Imtamnyi Uram lak eramnyi.
Sun dib tenen nang aryi sun bona karerdaramnyi uram
4:32-37
32Sun dib tenen nang nirya ara kanya tentok boramnyi. Sun nirya ara sun bona ati, “Ni dinyi ni dinyi,” tenena kum kuramnyi. Eda, sunci sun kubmaci dinyi asi bokeiboka mamun karerdaramnyi. 33Karerdaramnyi ba, sun Teleb Uram deyok kouboka eteren nang aryi ilil weik tenen dinyi kikniboka, “Nun Du Yesus kam bukokmou,” eboka lak eramnyi. Ba, Er Imtamnyi biryi sun dib tenen nang nirya asi kisal dangdoramwe. 34-35Sun kankan aryi ninyi tentok ara, “Ton atabmanir,” enanyi kum kuramwe. Sun kankan aryi kuboka wa deyok nang ara sun wa dekoka sun dororamnyi co bok asi sun Teleb Uram deyok kouboka eteren nang dam boboka dama deiriramnyi. Sun ai dam nang ababyi neiktoto sun ai dekoka sun dororamnyi co bok asi sun Teleb Uram deyok kouboka eteren nang dam boboka dama deiriramnyi. Deiriramnyi ura, ninyi nirya ara sun atanmanto bongdeiriramnyi. 36-37A talak ara ninyi tentok si Yusuf kuramwe. Anyi bisi sun Teleb Uram deyok kouboka eteren nang aryi uruma si doboka, “Barnabas,” eramnyi. A si ara nun uram aryi danguboka, “Ninyi kanya teleb kurdeirinanyi,” eramnyi. Anyi bira Lewi yalanyi kuramuryok Siprus mutuk deiamunyi kuramwe. Anyi bira wa deyoknyi biryi er wa dekmouci, er dobdobmou co bok asi sun Teleb Uram deyok kouboka eteren nang dam boboka dama deibmou.
Selectat acum:
Kisah Para Rasul Uram 4: MTG
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
@LAI 2007 (New Testament), @LAI2022 (Old and New Testament)
