Matie 26

Ɛcüìcüì-bɔ̀ ke ji Zhezü ɛyri

(Nyɛ́n nyan Markɛ̀n 14:1-2; Lükɛ̀n 22:1-2; mán Zhan 11:45-53 wrú lɔ mɛ̀n)

1Ɛnvra léyi Zhezü yé ankà ndɔ hɔ̀n lɔ trɔ nɔn, nɛ dɔ́ n'ɛsɛ̀nkɛn-bɔ̀ le: 2“Nyɛ́n nyri ɔmu le Ɛẅɛnwrɔn-bemɛ̀n-cì koran bì lɔ wɔrɔ ɛbi-anhyrɛ̀: Yɛ lɛ ẅɛn ɔwrɔnẅì Ẅì, kɩ yɛ lɛ gɔ́n nɛ̀n brɛ́ ɛgbàn-hán-tɛ̀ tɔ̀n domɛ̀n.”

3Zɛtɛn Ɔwɔ-cice-bɔ̀ mán ɛcüìcüì-bɔ̀ léyi dú Zhüifɛ̀n-fɛcüè-bɔ̀ nɔn, borɛkru ɛcice-wrɔn cüìcüì Kahifɛ̀n bɩ́ lɔ mɛ̀n; 4ɔmùan krɔn yɔ, ô yɔ ẅɛn Zhezü ɛbán mɛ̀n, ô yɔ hán nɛ̀n, nɛ̀n wù. 5Yɔ dɔ̀ le: “Ke sɩ́ ji le bɔ̀ ẅɛn nɛ̀n ɔkoran bì lɔ, ke dú ɔmu lɔ hô, fɛcüè ke le sɩ́ n'edomɛ̀n ɛwú.”

Ɛnnyɔnwrɔn tɔ̀n ke ku Zhezü ɛnshi-bán ɛnkru

(Nyɛ́n nyan Markɛ̀n 14:3-9; mán Zhan 12:1-8 wrú lɔ mɛ̀n)

6Zhezü dú Betani anmàn, kokove-wrɔn Simɔn nanvrɛn ɛbemɛ̀n. 7Ɛnnyɔnwrɔn tɔ̀n sɔnba Zhezü ɛtɛ̀sɛ̀n, anhàn shishi shi-bán mɔɛn dú nɛ̀n antamɛ̀n: ɛnvra léyi Zhezü dú tɛbrɛ̀ wú ɛci-zîemɛ̀n nɔn, ɛnnyɔnwrɔn lɔ bɩ́ ɛnshi-bán lɔ ku nɛ̀n ɛnkruemɛ̀n. 8Ɛnvra léyi ɛsɛ̀nkɛn-bɔ̀ lɔ kán eci léyi ɛnnyɔnwrɔn lɔ hán nɔn, kè sɩ̀ zrɔ̀ yɔ, kɩ yɔ dɔ̀ le: “Cɛci kruhú kɛ yɛ jrɛ́ ɛnshi-bán ndɔ lɔa? 9Ke dú kɛ yɛ hɛ́ ɛnshi-bán ndɔ lɔ hô, ye le bɩ́ n'ɔkùa lɔ yɛ tán ɛmian-bɔ̀ tɛ̀!” 10Zhezü nyri y'ɛnbɔrɛ mɛ̀n ankà-tro kɩ kɛ dɔ́ yɔ le: “Cɛci kruhú kɛ nyɛ hán ankà ke bru ɛnnyɔnwrɔn ndɔ lɔ edomɛ̀n hɛ̀n? Eci léyi nɛ̀n hán nɛ̀n tán mɛ̀n nɔn zrɔ. 11Ɔmuhi nyɛ lɛ cɔ́ ɛnvra lɔ fɛn ɛmian-bɔ̀; tɛ́n mɛ tɛn, nyɛ́n sɩ̀ cɔ́ mɛ̀n ɛnvra lɔ fɛn nyɛ́n mɛhi bɔ̀ dù. 12Nɛ̀n ku mɛ̀n ɛnshi-bán lɔ edù, ô m'edùwrú lɔ kè nyrì dɛ́ ezhe-nànmàn mɛ̀n. 13Mɛ dɔ́ nyɛ̀n annànwɔrɛ mɛ̀n le: ɛyri lɔ fɛn léyi yɛ lɛ dɔ́ Ɛmɛẅi ankà Ankrànkràn lɔ nɔn, yɛ lɛ dɔ́ eci léyi ɛnnyɔnwrɔn ndɔ lɔ hán nɔn, kɩ yɛ lɛ ẅɛn n'ankà-tro.”

Zhüda ke ji kɛ̀ ẅɛn Zhezü kɛ tán Ɔwɔ-cice-bɔ̀ cüìcüì hɔ̀n

(Nyɛ́n nyan Markɛ̀n 14:10-11; mán Lükɛ̀n 22:3-6 wrú lɔ mɛ̀n)

14Zɛtɛn ɛsɛ̀nkɛn-bɔ̀ lɔ, ɔtɔ̀n léyi ye bi Zhüda Iskariɔtɛ̀n nɔn, hɔ́n cɔ́ Ɔwɔ-cice-bɔ̀ cüìcüì hɔ̀n 15kɩ kɛ dɔ́ yɔ le: “Ecitan de nyɛ lɛ tán mɛ̀n ke dú kɛ mɛ ẅɛn Zhezü mɛ tán nyɛ̀n nɛ́n?” Ɔwɔ-cice-bɔ̀ cüìcüì hɔ̀n krɛ́ ɔkùa ẅì kɔ̀prɛ̀ ɛẅia-ɛvà ku Zhüda antamɛ̀n. 16Bukru hɩ vra lɔ, Zhüda ke ji ɛyri ô kɛ̀ ẅɛn Zhezü kɛ̀ tán yɔ.

Zhezü mán n'ɛsɛ̀nkɛn-bɔ̀ mɛhi ke zî Ɛẅɛnwrɔn-bemɛ̀n-cì koran ci-zî

(Nyɛ́n nyan Markɛ̀n 14:12-21; Lükɛ̀n 22:7-14,21-23; mán Zhan 13:21-30 wrú lɔ mɛ̀n)

17Ɛnbì zri bì léyi yɛ nyanmán abùtùkumɛ́n-kɔ́ nɔn, ɛsɛ̀nkɛn-bɔ̀ lɔ nvà ke yrɛ Zhezü le: “Tɛyri de e ji bɔ̀ hɔ̀n bɔ̀ gbrɛ́ Ɛẅɛnwrɔn-bemɛ̀n-cì ci-zî lɔ nɛ́n?” 18Zɛtɛn Zhezü kɛ dɔ́ yɔ le: “Nyɛ́n hɔ́n anmàn, ɔwrɔn ndɔ ɔmu lɔ n'eyri ɛbemɛ̀n, ô nyɛ́n dɔ́ nɛ̀n le: ‘Ankà-yé-wrɔn kɛ dɔ̀ le: mɛ́n vra ncɔ̀a. V'eyri ɛbemɛ̀n de mɛ̀n mán m'ɛsɛ̀nkɛn-bɔ̀ mɛhi bɔ́ le zî Ɛẅɛnwrɔn-bemɛ̀n-cì ci-zî lɔ nɔn.’ ” 19Ɛsɛ̀nkɛn-bɔ̀ lɔ hán eci léyi Zhezü wá tán yɔ kɩ yɔ gbrɛ́ Ɛẅɛnwrɔn-bemɛ̀n-cì ci-zî lɔ. 20Ɛnvra léyi ɔwɔɛmɛ̀n ncɔ̀ nɔn, Zhezü mán n'ɛsɛ̀nkɛn-bɔ̀ mɛhi ci tɛbrɛ̀ wú. 21Ɛnvra léyi yɔ dú ɛci-zîemɛ̀n nɔn, Zhezü kɛ dɔ̀ le: “Mɛ dɔ́ nyɛ̀n annànwɔrɛ mɛ̀n le: ny'ɛmɛ̀n lɔ ɔwrɔn tɔ̀n kɛ lɛ hɛ́ mɛ̀n.” 22Ɛsɛ̀nkɛn-bɔ̀ lɔ dú obòto mɛ̀n kɩ ɔwrɔn zrizri ke yrɛ nɛ̀n le: “Kè sɩ̀ dù mɛ̀n hàn, Ɛẅɛnwrɔn?” 23Zhezü mrɛ́n ɔmùan le: “Ɔwrɔn léyi nɛ́n mán mɛ̀n mɛhi bɔ́ wá abùtùkumɛ́n ɛyri zri nɔn, nɛ́n de nɛ lɛ hɛ́ mɛ̀n nɔn. 24Ɔwrɔnẅì Ẅì ke le wù, hán ɔmu le Ɛwrú Prɔnprɔn hɔ̀n merɛ́n n'ɛwú nɔn. Tɛ́n muzhie tán ke le dù tán ɔwrɔn léyi kɛ lɛ hɛ́ ɔwrɔnẅì Ẅì nɔn! Zrɔ tán le, nɛ́n, ɔwrɔn ndɔ lɔ, ye bɩ́ bî nɛ̀n!” 25Zhüda, ɔwrɔn léyi kɛ hɛ́ nɛ̀n nɔn, mrɛ́n ɔmùan kɛ dɔ̀ le: “Kè sɩ̀ dù mɛ̀n hàn, Ankà-yé-wrɔn?” Zhezü mrɛ́n nɛ̀n ɔmùan le: “Vɛ́n de ɛ dɔ̀ nɔn.”

Ɛẅɛnwrɔn ci-zî prɔnprɔn

(Nyɛ́n nyan Markɛ̀n 14:22-26; Lükɛ̀n 22:15-20; mán 1 Korɛntɛ̀n anmàn-bɔ̀ 11:23-25 wrú lɔ mɛ̀n)

26Ɛci-zîemɛ̀n lɔ, Zhezü bɩ́ abùtùkumɛ́n kɩ ɛnvra léyi nɛ̀n tán Ɔwɔ ɔkùɛn trɔ nɔn, nɛ̀n voyan abùtùkumɛ́n lɔ kɩ nɛ̀n tán n'ɛsɛ̀nkɛn-bɔ̀; nɛ dɔ́ yɔ le: “Nyɛ́n bɩ nyɛ́n rá, ndɔ lɔ dú m'edùwrú.” 27Zɛtɛn nɛ̀n bɩ́ ɛntàn wɔnsɛ́n grashɛ̀n zri kɩ, ɛnvra léyi nɛ̀n tán Ɔwɔ ɔkùɛn trɔ nɔn, nɛ́n bɩ tán yɔ kɩ nɛ dɔ̀ le: “Nyɛ lɛ fɛn nyɛ́n bɩ nyɛ́n mì, 28ɔmuhi ndɔ lɔ dú m'ɛnkrɛ̀, ɛnkrɛ̀ léyi ke di Ɔwɔ mìrɛ̀n lɔ dalɛfuɛ, hɩ cüe anwrɔn bobrebe gbàn-wɔɛ̀n-dì kruhú nɔn. 29Mɛ dɔ́ nyɛ̀n le: bukru zɛtɛ̀ lɔ, mɛ́n sɩ̀ vru mi ɛntàn ndɔ lɔ hàn kɩ kɛ lɛ cɔ́ ɛnvra léyi nyɛ́n mɛhi bɔ́ le mi ɛntàn wrù Dade nɛ̀ncüì-dúyri lɔ nɔn.” 30Zɛtɛn yɔ krɛ́, Ɔwɔ-mrɛ́n-cɔ̀ léyi dú ɔkoran bì lɔ tɛn nɔn, kɩ yɔ hɔ́n ɛẅì-shi-tɛ̀ kɛ̀tɛ̀ léyi dú ɛnkpò wú nɔn mɛ̀n.

Zhezü kɛ dɔ̀ le Piɛrɛ̀n kɛ lɛ crɔn ɔmùan n'ɛtɛ̀sɛ̀n

(Nyɛ́n nyan Markɛ̀n 14:27-31; Lükɛ̀n 22:31-34; mán Zhan 13:36-38 wrú lɔ mɛ̀n)

31Zɛtɛn Zhezü kɛ dɔ́ n'ɛsɛ̀nkɛn-bɔ̀ le: “Ɛnnyran ndɔ lɔ mɛ̀n, nyɛ lɛ fɛn nyɛ lɛ srɛ́ teze mɛ̀n hàn, ɔmuhi yɛ krɛ́ Ɛwrú Prɔnprɔn hɔ̀n lɔ mɛ̀n le: ‘Me le wri kɔ̀kɔ̀sɛ̀-kua-wrɔn lɔ kɩ kɔ̀kɔ̀sɛ̀ kà lɔ fɛn ke le bonyì.’ 32Tɛ́n Zhezü vru kɛ dɔ̀ le: Ɛnvra léyi me le vru mɛ̀n dú ɔkɔrɛ-bɔ̀ mɛ̀n nɔn, mɛ lɛ hɔ̀n mɛ̀n vrá nyɛ̀n Galile kpɔsɔ wú.” 33Piɛrɛ̀n mrɛ́n ɔmùan, kɩ ke dɔ́ nɛ̀n le: “Ke dú kɛ anwrɔn lɔ fɛn ke teze mɛ́n, mɛ tɛn, mɛ́n sɩ̀ teze mɛ́n mrìmrì.” 34Zhezü mrɛ́n nɛ̀n ɔmùan le: “Mɛ dɔ́ mɛ́n annànwɔrɛ mɛ̀n le: ɛnnyran ndɔ lɔ mɛ̀n, ɔkɔ̀sɔ̀-cüì ke sɩ̀ di nkù kɩ ɛ lɛ crɔn ɔmùan andɛ̀n-anhɔ̀n le, è sɩ̀ nyri mɛ̀n.” 35Piɛrɛ̀n kɛ dɔ̀ le: “Mɛ́n sɩ̀ dɔ́ mrìmrì le, mɛ́n sɩ̀ nyrì mɛ́n, ke dú kɛ owù dú ɛmɛ̀n, mɛ̀n mán vɛ́n mɛhi bɔ́ le wù.” Kɩ ɛsɛ̀nkɛn-bɔ̀ lɔ fɛn kɛ dɔ́ ankà zri lɔ.

Zhezü kɛ sɛ́n Ɔwɔ ɛyri léyi ye bi Zhɛtsemane nɔn

(Nyɛ́n nyan Markɛ̀n 14:32-42; mán Lükɛ̀n 22:39-46 wrú lɔ mɛ̀n)

36Zɛtɛn Zhezü mán n'ɛsɛ̀nkɛn-bɔ̀ cɔ́ ɛyri léyi ye bi *Zhɛtsemane kɩ nɛ dɔ́ yɔ le: “Nyɛ́n vrìyɛ́ ɛnu lɔ, mɛ hɔ́n ɔhɔnán mɛ̀n sɛ́n Ɔwɔ.” 37Zɛtɛn nɛ̀n bɩ́ Piɛrɛ̀n mán Zebede ẅì hɔ̀n anhyrɛ̀ lɔ yɔ hɔ̀n. Owù jansù mán obòtò bukru ke ku nɛ̀n edù. 38Zɛtɛn nɛ dɔ́ yɔ le: “Owù jansù yɩ́ m'ɛnbɔrɛ lɔ; nyɛ́n yɛ́ ɛnu lɔ, ô bɔ̀ kpri ɛvɛ̀.” 39Zhezü sɔnba ɔhɔnán jan kɩ bore, kɛ́n ezì ɛnhi kɛ sɛ́n Ɔwɔ kɛ dɔ̀ le: “Dade, ke dú kɛ kɛ lɛ krɔn tɛ̀ hô, è sɩ́ ɛgbànkàn grashɛ̀n ndɔ lɔ ɔhɔnán. Ɛnvra lɔ fɛn kè sɩ̀ dù hɩ le me ji nɔn, tɛ́n hɩ le ɛ cüɛ̀n nɔn de kɛ̀ hán nɔn.” 40Zhezü vru vá cɔ́ ɛsɛ̀nkɛn-bɔ̀ anhɔ̀n lɔ ɛndà wrì. Nɛ dɔ́ Piɛrɛ̀n le: “Ɔmu lɔ nyɛ́n sɩ̀ cɔ́ mɛ̀n bɔ̀ kprì ɛvɛ̀ wacɛ̀n zri mán hán? 41Nyɛ́n kpri ɛvɛ̀, nyɛ́n sɛ̀n, ô nyɛ́n bɩ́ bru ɔwɔɛ̀nnyan mɛ̀n. Ɔwrɔnẅì hɛ́n ẅɛn edùyì, tɛ́n n'anẅia ẅɛn ɛjɛ̀.” 42Zhezü vru sɔnba ɔhɔnán anhyrɛmɛ̀n kɩ kɛ sɛ́n Ɔwɔ kɛ dɔ̀ le: “Dade, ke dú kɛ grashɛ̀n ndɔ lɔ ke sɩ̀ cɔhɔ́ mɛ̀n ezìwú, kɩ ke ji le mɛ̀n mi nɛ̀n tɛ̀ hô, ke ji le eci léyi ɛ cüɛ̀n nɔn kɛ̀ hán!” 43Nɛ̀n vru nɛ̀n vá n'ɛsɛ̀nkɛn-bɔ̀ ɛtɛ̀sɛ̀n kɩ nɛ̀n cɔ́ yɔ ɛndà wri yɔ; yɔ sɩ́ gbɛ́ anvɛ̀ rɔ́a. 44Zhezü vru teze yɔ, hɔ́n ɔhɔnán kɩ kɛ sɛ́n andɛ̀n-anhɔnmɛ̀n Ɔwɔ-sɛ̀n zri lɔ. 45Zɛtɛn nɛ̀n vru nɛ̀n vá n'ɛsɛ̀nkɛn-bɔ̀ ɛtɛ̀sɛ̀n kɩ nɛ dɔ́ yɔ le: “Nyɛ́n dú ɛmɛ̀n nyɛ di ɛndà kɩ nyɛ wrɔncüɛ? Zɛtɛ̀ lɔ wacɛ̀n ncɔ̀a kɩ ye le bɩ́ ɔwrɔnẅì Ẅì yɛ wá ɛgbàn-hán-bɔ̀ antamɛ̀n. 46Nyɛ́n tɔhú, bɔ̀ hɔ́n nyɛ̀n! Nyɛ́n nyan, ɔwrɔn léyi kɛ hɛ́ mɛ̀n nɔn, dú ɛnu lɔ!”

Zhezü ẅɛn vra

(Nyɛ́n nyan Markɛ̀n 14:43-50; Lükɛ̀n 22:47-53; mán Zhan 18:3-12 wrú lɔ mɛ̀n)

47Zhezü dú ankà-dɔ́ mɛ̀n kɩ Zhüda, Zhezü sɛ̀nkɛn-bɔ̀ lɔ ɔtɔ̀n nvà. Nɛ́n mán fɛcüè bobrebe mɛhi, anhà-kɔ́n-nyan mán antɛ̀ dú yɔ antamɛ̀n yɔ và. Ɔwɔ-cice-bɔ̀ cüìcüì hɔ̀n mán Zhüifɛ̀n-fɛcüè-bɔ̀ cüìcüì hɔ̀n de wá yɔ ɔkɔ̀hɔ̀n nɔn. 48Zhüda léyi kɛ hɛ́ Zhezü nɔn, yé yɔ ɔmu léyi nɛ lɛ hán ô yɔ nyri Zhezü nɔn: “Ɔwrɔn léyi mɛ lɛ wá angbàmɛ̀n nɔn, nɛ́n, nyɛ́n ẅɛn nɛ̀n.” 49Ɛnvra zri lɔ Zhüda sɔnba Zhezü ɛtɛ̀sɛ̀n kɩ kɛ dɔ́ nɛ̀n le: “Me bi mɛ́n nyan Ankà-yé-wrɔn!” Zɛtɛn nɛ̀n wá yi angbàmɛ̀n. 50Zhezü mrɛ́n nɛ̀n ɔmùan le: “M'annyran, eci léyi ɛ̀ vá-hán-yri nɔn, ɛ̀ hán nɛ̀n kpràkprà.” Zɛtɛn anwrɔn sɔnba Zhezü ɛtɛ̀sɛ̀n kɩ ku nɛ̀n ankɔ̀rɛ̀ ɛwú, bɩ́ nɛ̀n hɔ̀n. 51Zhezü sɛ̀nkɛn-bɔ̀ lɔ, ɔtɔ̀n bɩ́ n'anhà-kɔ́n-nyan lɔ wí Ɔwɔ-cice-wrɔn cüìcüì ci-bɩtan-wrɔn nukù. 52Zɛtɛn Zhezü kɛ dɔ́ n'ɛsɛ̀nkɛn-wrɔn lɔ le: “Bɩ v'ɛnyan lɔ hɛ̀n n'ɛhɛ́n-yriɛ, ɔmuhi anwrɔn hɔ̀n léyi ke bɩ́ annyan nɔn, ke le wú annyan mɛ̀n. 53È sɩ̀ nyrì ɔmu le me le bi Dade tɛ̀, ô kɛ̀ wá mɛ̀n ɛkɔrɛ̀ kɩ kpatakpata lɔ ne le yüre mɛ̀n Ɔwɔ-kùyüre-bɔ̀ anhà-kɔ́n fɛcüè, ke le wi ɛvà-anhyrɛ̀ hà? 54Tɛ́n ke dú ɔmu lɔ hô, anhɔntan de Ɛwrú Prɔnprɔn hɔ̀n ankà-dɔ̀ lɔ kɛ lɛ hán kɛ̀ sá nmù nɛ́n? Ɛwrú hɔ̀n lɔ kɛ dɔ̀ le: Zɛtɛn ɔmu de ke ji le eci lɔ kɛ hán nɔn.” 55Zɛtɛn Zhezü kɛ dɔ́ fɛcüè le: “Ke ji le nyɛ́n và anhà-kɔ́n-nyan mán antɛ̀ kè dú nyɛ̀n antamɛ̀n nyɛ́n ẅɛn mɛ̀n, kɛ̀ hán le mɛ̀n dú ɔwrɔn-wri-wrɔn hɔ́a? Ɛnbì lɔ fɛn, mɛ yɛ́ Ɔwɔ-cice-wɔn lɔ mɛ̀n, me yé ankà, kɩ nyɛ́n sɩ̀ ẅɛ̀n mɛ̀n. 56Tɛ́n eci ndɔ lɔ wɔɛ̀n, ô Ɔwɔ-mùanwú-ankà-dɔ́-bɔ̀, ankà-dɔ̀ lɔ dú Ɛwrú Prɔnprɔn hɔ̀n lɔ mɛ̀n nɔn kɛ̀ sá nmù.” Zɛtɛn n'ɛsɛ̀nkɛn-bɔ̀ lɔ fɛn teze nɛ̀n kɩ srɛ́.

Ye sɩ́ Zhezü ankà-dɔ̀-trɔ-bɔ̀ zìwú

(Nyɛ́n nyan Markɛ̀n 14:53-65; Lükɛ̀n 22:54-55,63-71; Zhan 18:13-14,19-24 wrú lɔ mɛ̀n)

57Anwrɔn hɔ̀n léyi ẅɛn Zhezü nɔn, sɩ́ nɛ̀n Ɔwɔ-cice-wrɔn cüìcüì, kahifɛ̀n nanvrɛn, ɛyri léyi ɛnyànmàn-gbànvri-ankà-yé-bɔ̀ mán ɛcüìcüì-bɔ̀ borɛkru nɔn. 58Piɛrɛ̀n kɛ kɛ́n Zhezü ɛsɛ̀n esù-she, hàn kɩ cɔ́ Ɔwɔ-cice-wrɔn cüìcüì bɩ́ vri lɔ mɛ̀n. Nɛ̀n bru ebɩ́ vriemɛ̀n kɩ nɛ̀n yɛ́ gɔliɛ-bɔ̀ lɔ ɛtɛ̀sɛ̀n ô nɛ̀n kán ankà lɔ n'ɔtrɔmɛ̀n.

59Ɔwɔ-cice-bɔ̀ cüìcüì hɔ̀n mán ankà-dɔ̀-trɔ-bɔ̀ ke ji ankà, ke dú kɛ ɛyɔ̀n ankà mán, yɔ ku Zhezü ɛwú, ô yɔ di nɛ̀n owúemɛ̀n; 60tɛ́n yɔ sɩ̀ cɔ́ ankà zriɛmɛ́n, hɩ lɔ mán kɩ anwrɔn bobrebe ndɔ hɔ̀n nvà sɩ́ ɛyɔ̀n ankà ku nɛ̀n ɛwú. Ɔtrɔmɛ̀n lɔ, anwrɔn anhyrɛ̀ srɔ 61kɩ kɛ dɔ̀ le: “Ɔwrɔn ndɔ lɔ, ndɔ̀ le: ‘Me le gbe Ɔwɔ-cice-wɔn lɔ tɛ̀, kɩ me le vru mɛ̀n ku nɛ̀n ɛbi-anhɔ̀n granmɛ̀n.’ ” 62Ɔwɔ-cice-wrɔn cüìcüì tɔhú kɩ kɛ dɔ́ Zhezü le: “E sɩ́ dɔ́ ankà zriɛmɛ́n ankà léyi anwrɔn kɛ dɔ́ ku mɛ́n ɛwú nɛ́n?” 63Tɛ́n Zhezü kɛ kɛ́n ɔmùan hɛ́n. Zɛtɛn Ɔwɔ-cice-wrɔn cüìcüì kɛ dɔ́ nɛ̀n le: “Ɔkɔrɛ Wɔ lɔ n'ebɩ́ mɛ̀n, mɛ wá tán mɛ́n, è shri bɔ̀ anmùan mɛ̀n, ɔmùan-wá mɛ̀n: è dú Ebɩdie-wrɔn, Ɔwɔ Ẅì lɔa?” 64Zhezü mrɛ́n nɛ̀n ɔmùan le: “Vɛ́n de ɛ dɔ̀ nɔn. Tɛ́n mɛ dɔ́ nyɛ̀n le: bukru zɛtɛ̀ lɔ nyɛ lɛ kán ɔwrɔnẅì Ẅì kɛ lɛ yɛ́ ɛkɔrɛ̀srɔn Wɔ zì-kɔrɛ̀ kɔrɛ̀a; nye le vru nyɛ́n kán nɛ̀n ne le dú anhobɩ́ nwì-gbúemɛ̀n nɛ lɛ và.” 65Zɛtɛn Ɔwɔ-cice-wrɔn cüìcüì shá n'ɛceci hɔ̀n lɔ kɩ kɛ dɔ̀ le: “Nɛ̀n wora Ɔwɔ! Bɔ́ sɩ́ vru ji dalɛfuɛ-di-wrɔn zriɛmɛ́n! Nyɛ́n yá, Ɔwɔ wora-ankà léyi nɛ́n dɔ̀ nɛ́n? 66Anhɔntan nyɛ hán tro hɛ̀?” Yɔ mrɛ́n ɔmùan le: “Nɛ̀n hán ɛgbàn, ke ji le ye wri nɛ̀n.” 67Zɛtɛn yɔ fɛ́ nɛ̀n andà anvɛmɛ̀n kɩ yɔ sroan nɛ̀n ɛnsugru; anwrɔn ndɔ hɔ̀n ke di nɛ̀n ansa anvɛmɛ̀n 68kɩ kɛ dɔ̀ le: “Vɛ́n léyi è dú Ebɩdie-wrɔn nɔn, è yé bɔ̀ ɔwrɔn léyi gɔ́n mɛ́n nɔn!”

Piɛrɛ̀n kɛ wrɔ́n-anmánta

(Nyɛ́n nyan Markɛ̀n 14:66-72; Lükɛ̀n 22:56-62; mán Zhan 18:15-18,25-27 wrú lɔ mɛ̀n)

69Piɛrɛ̀n yɛ́ ɛntrɛ, ebɩ́ vriemɛ̀n. Ɔwɔ-cice-wrɔn cüìcüì ci-bɩtan-hi tɔ̀n sɔnba nɛ̀n ɛtɛ̀sɛ̀n kɩ kɛ dɔ́ nɛ̀n le: “Vɛ́n mán, è dú Zhezü, Galile-wrɔn ndɔ lɔ ɛtɛ̀sɛ̀n.” 70Tɛ́n Piɛrɛ̀n kɛ *wrɔ́n-anmánta anwrɔn lɔ fɛn zìwú kɛ dɔ̀ le: “Mɛ́n sɩ́ nyri ankà léyi e ji ɛ̀ dɔ̀ nɔn.” 71Zɛtɛn nɛ̀n hɔ́n ebɩ́ vri gbàtà mùan. Eci-bɩtan-hi nyàntɛn kán nɛ̀n kɩ kɛ dɔ́ anwrɔn hɔ̀n léyi dú nanvrɛn nɔn le: “Ɔwrɔn ndɔ lɔ mán Nazarɛtɛ̀n wrɔn Zhezü mɛhi ndù.” 72Kɩ Piɛrɛ̀n vru wrɔ́n-anmánta kɛ dɔ̀ le: “Mɛ wá ɔmùan le, mɛ̀n sɩ̀ nyrì ɔwrɔn ndɔ lɔ.” 73Ɛnvra jan vacì, anwrɔn hɔ̀n léyi dú nanvrɛn nɔn sɔnba Piɛrɛ̀n ɛtɛ̀sɛ̀n kɩ kɛ dɔ́ nɛ̀n le: “Annànwɔrɛ mɛ̀n lɔ, è dú Zhezü tɛ̀sɛ̀n-bɔ̀ lɔ ɔtɔ̀n: v'ankà-dɔ̀ kɛ cá ɛyri léyi e dù ɛ và nɔn.” 74Zɛtɛn Piɛrɛ̀n bukru kɛ dɔ̀ le: “Ke ji le Ɔwɔ kɛ̀ hán mɛ̀n ɛgbàn ke dú kɛ mɛ ẅɛn ɛyɔ̀n! Mɛ wá ɔmùan le, mɛ̀n sɩ̀ nyrì ɔwrɔn ndɔ lɔ!” Hɩ vra lɔ mɛ̀n, ɔkɔ̀sɔ̀-cüì tɔ̀n di nkù, 75kɩ ankà léyi Zhezü dɔ̀ nɔn, bru Piɛrɛ̀n: “Ɔkɔ̀sɔ̀-cüì ke sɩ̀ di nkù, kɩ ɛ lɛ dɔ́ andɛ̀n-anhɔ̀n le, è sɩ̀ nyrì mɛ̀n.” Piɛrɛ̀n srɔ ɛntrɛ kɩ ke wú eyú obòto mɛ̀n.

Selectat acum:

Matie 26: ƐAA03

Evidențiere

Partajează

Copiază