Matie 25

Wúyɔ̀-ẅì hɔ̀n ɛvà nyandrɛn mɛ̀n ankà-dɔ̀

1“Zɛtɛn Anhobɩ́ nɛ̀ncüì-dúyri kɛ lɛ cá wúyɔ̀-ẅì hɔ̀n ɛvà léyi bɩ́ yɔ kɛniɛn srɔ ɛntrɛ hɔ́n ɛnnyɔnwrɔn-nɛ́n-cüì ɛsù nɔn. 2Ɛnrì dú yɔ ɛmɛ̀n kè sɩ̀ ẅɛ̀n ɛnkruemɛ̀n, tɛ́n ɛnrì ndɔ lɔ dú ɛnkruemɛ̀n-ẅɛn-wúyɔ̀. 3Wúyɔ̀ ɛnrì hɔ̀n léyi kè sɩ̀ ẅɛ̀n ɛnkruemɛ̀n nɔn, bɩ́ yɔ kɛniɛn, tɛ́n ke sɩ̀ bɩ ɛnzhì. 4Tɛ́n yɔ hɔ̀n léyi ẅɛn ɛnkruemɛ̀n nɔn, yɔ bɩ́ ɛnhzì bɔdɛ̀ dú yɔ edomɛ̀n hɩ mán yɔ kɛniɛn mɛhi. 5Zɛtɛn ɛnnyɔnwrɔn-nɛ́n-cüì vá vra kɛ mɔɛ̀n; wúyɔ̀-ẅì hɔ̀n ɛvà lɔ fɛn ɛndà ke wrì, kɩ dɛ́ kɛ di ɛndà. 6Ɛnnyran wanzi cɔ̀, yɛ yá bobo tɔ̀n ke shrì kɛ dɔ̀ le: ‘Nyàn ɛnnyɔnwrɔn-nɛ́n-cüì! Nyɛ́n srɔ ɛntrɛ nyɛ́n hɔ́n nɛ̀n ɛsù!’ 7Zɛtɛn wúyɔ̀-ẅì hɔ̀n ɛvà lɔ gbɛ́ anvɛ̀, kɩ bukru kɛ wá yɔ kɛniɛn esùva. 8Wúyɔ̀ hɔ̀n léyi ke sɩ̀ ẅɛ̀n ɛnkruemɛ̀n nɔn kɛ sán yɔ nyran hɔ̀n ɛnzhì kɩ kɛ dɔ̀ le: ‘Nyɛ́n tán bɔ̀ ɛnzhì jan, ɔmuhi kɛniɛn kɛ zɛ́n bɔ̀ nɔn.’ 9Ɛnkruemɛ̀n-ẅɛn-wúyɔ̀ hɔ̀n lɔ mrɛ́n y'ɔmùan le: ‘Hɔ̂, ɔmuhi ɛnzhì ke sɩ̀ cɔ́ nyɛ́n mán bɔ́ mɛhi. Nyɛ́n hɔ́n anmàn *anhàn-kùa-wɔn mɛ̀n nyɛ́n wɔ́ nyɛ tɛn.’ 10Ɔbrɔ̀sà wúyɔ̀-ẅì hɔ̀n lɔ hɔ́n ɛnzhì wɔ́ yri kɩ ɛnnyɔnwrɔn-nɛ́n-cüì nvà. Wúyɔ̀ ɛnrì ndɔ hɔ̀n léyi ɛnzhì dú kɛniɛn mɛ̀n nɔn, yɔ mán ɛnnyɔnwrɔn-nɛ́n-cüì mɛhi, yɔ bru eyri-wɔn lɔ mɛ̀n kɩ yɛ sɛ́n esù safɛ̀ mɛ̀n. 11Ɛnvra bru mɛ̀n, kɩ wúyɔ̀ ndɔ hɔ̀n léyi hɔ́n ɛnzhì wɔ́ yri nɔn nvà ke di bobo kɛ dɔ̀ le: ‘Ankà-yé-wrɔn, Ankà-yé-wrɔn, srú bɔ̀ esù!’ 12Tɛ́n ɛnnyɔnwrɔn-nɛ́n-cüì mrɛ́n ɔmùan le: ‘Mɛ dɔ́ nyɛ̀n annànwɔrɛ mɛ̀n le: mɛ̀n sɩ̀ nyri nyɛ̀n.’ 13Zɛtɛn Zhezü kɛ dɔ́ n'ɛsɛ̀nkɛn-bɔ̀ le: Nyɛ́n kpri ɛvɛ̀, ɔmuhi nyɛ́n sɩ̀ nyrì ɛnbì mán wacɛ̀n nɔn.”

Ɛci-bɩtan-bɔ̀ anhɔ̀n nyandrɛn mɛ̀n ankà-dɔ̀

(Nyɛ́n nyan Lükɛ̀n 19:11-27 wrú lɔ mɛ̀n)

14“Ke le dù kɛ lɛ hán ɔwrɔn tɔ̀n léyi kɛ vá nɛ̀nnyànmàn hɔ́n yri nɔn: Ne bi n'ɛci-bɩtan-bɔ̀ kɩ ne bɩ́ n'ɛci nɛ wá yɔ antamɛ̀n. 15Nɛ̀n tán kpàkpà-wrɔn lɔ ansɩ̀kɛ-kùa-ẅì ɛkoẅi-ɛẅia-ɛnrì, anhyrɛmɛ̀n-wrɔn lɔ ɛkoẅi-ɛvà, anhɔnmɛ̀n-wrɔn lɔ ɛkoẅi-ɛnrì: ɔwrɔn wrɔn mán n'ɔkɔ̀hɔ̀n hán dùyì mɛhi. Zɛtɛn nɛ́n hɔ̀n. 16Eci-bɩtan-wrɔn léyi cɔ́ ansɩ̀kɛ kùa-ẅì ɛkoẅi-ɛẅia-ɛnrì nɔn, bɩ́ ɔkùa lɔ zhrɛ́ anhàn kɩ vru cɔ́ ɔkùa ɛkoẅi-ɛẅia-ɛnrì kɛ́n ɛwú. 17Anhyrɛmɛ̀n-wrɔn léyi cɔ́ ɛkoẅi-ɛvà nɔn, mán zhrɛ́ anhàn kɩ cɔ́ ɛkoẅi-ɛvà kɛ́n ɛwú. 18Tɛ́n, ɔwrɔn léyi cɔ́ ɔkùa ɛkoẅi-ɛnrì nɔn, hɔ́n bɔ́ ɛnnànmàn bán n'ankà-yé-wrɔn kùa lɔ.

19Ɛnvra sheshe vacì, kɩ ɛci-bɩtan-bɔ̀ ankà-yé-wrɔn lɔ dú nɛ̀nnyànmàn vru và kɩ nɛ́n mán yɔ mɛhi yɔ krɛ́ ɛci. 20Ɔwrɔn léyi cɔ́ ɔkùa ɛkoẅi-ɛẅia-ɛnrì nɔn nvà kɩ ke yé ɔkùa ɛkoẅi-ɛẅia-ɛnrì léyi nɛ́n cɔ̀ nɛ̀n kɛ́n ɛwú nɔn kɩ nɛ dɔ̀ le: ‘Ankà-yé-wrɔn, ɛ̀ tán mɛ̀n ansɩ̀kɛ-kùa-ẅì ɛkoẅi-ɛẅia-ɛnrì. Nyàn ɛkoẅi-ɛẅia-ɛnrì ndɔ léyi mɛ́n cɔ̀ mɛ̀n kɛ́n ɛwú nɔn.’ 21N'ankà-yé-wrɔn kɛ dɔ́ nɛ̀n le: ‘Kɛ zrɔ, ɔmùan-zri-dì mán eci-bɩtan-wrɔn anvrɛnvrɛn. È di ɔmùan-zri ɛci hɔ̀n léyi kè sɩ̀ ẅɛ̀n vɔ̀nshɛ́ nɔn wú, mɛ lɛ wá mɛ́n yɔ hɔ̀n léyi ẅɛn vɔ̀nshɛ́ nɔn antamɛ̀n, và cɔ́ mɛ̀n bɔ̀ brá pɔ̀püɛ̀.’ 22Eci-bɩtan-wrɔn léyi cɔ́ ɔkùa-ẅì ɛkoẅi-ɛvà nɔn, vá nɛ̀n ɛtɛ̀sɛ̀n kɩ zɛtɛn kɛ dɔ̀ le: ‘Ankà-yé-wrɔn ɛ̀ tán mɛ̀n ansɩ̀kɛ-kùa-ẅì ɛkoẅi-ɛvà. Nyàn ɛkoẅi-ɛvà léyi mɛ́n cɔ̀ mɛ̀n kɛ́n ɛwú nɔn.’ 23N'ankà-yé-wrɔn kɛ dɔ́ nɛ̀n le: ‘Kɛ zrɔ, ɔmùan-zri-dì mán eci-bɩtan-wrɔn anvrɛnvrɛn. È di ɔmùan-zri ɛci hɔ̀n léyi kè sɩ̀ ẅɛ̀n vɔ̀nshɛ́ nɔn wú, mɛ lɛ wá mɛ́n yɔ hɔ̀n léyi ẅɛn vɔ̀nshɛ́ nɔn antamɛ̀n. Và cɔ́ mɛ̀n bɔ̀ brá pɔ̀püɛ̀.’ 24Ɔtrɔmɛ̀n lɔ, eci-bɩtan-wrɔn léyi cɔ́ ɔkùa-ẅì ɛkoẅi-ɛnrì nɔn, nvà kɩ kɛ dɔ̀ le: ‘Ankà-yé-wrɔn, mɛ́n nyrì le, è dú ɛnkru-shishi-wrɔn: ɛ küɛ ɛci ɛyri léyi è sɩ̀ tɛ̀a nɔn, e ji ɛci ɛyri léyi è sɩ̀ hɛ́n hàn nɔn. 25Ɛnjansù ẅɛn mɛ̀n kɩ mɛ̀n bɩ́ v'ɔkùa lɔ mɛ́n hɔ̀n bán ɛnhibɩ́. Zɛtɛn nyàn eci léyi dú vɛ tɛn nɔn.’ 26N'ankà-yé-wrɔn mrɛ́n nɛ̀n ɔmùan le: ‘Eci-bɩtan-wrɔn gbàngbàn, ɛjɛ́-wrɔn! E nyri ɔmu le mɛ küɛ ɛci ɛyri léyi mɛ́n sɩ̀ tɛ̀a, kɩ me bɩ́ ɛci ɛyri léyi mɛ̀n sɩ̀ hɛ̀n hàn nɛ́n? 27Zɛtɛn, ɛyri léyi yɛ hɛ́n ɔkùa hɩ ke bî ɛẅì nɔn, nanvrɛn de ke ji le è bɩ́ m'ɔkùa lɔ ɛ̀ hɛ́n, ô ɛnvra léyi mɛ và nɔn, ɔkùa lɔ ke bî ɛẅì kɛ kɛ́n ɛwú. 28Nyɛ́n bɩ́ n'ansɩ̀kɛ-kùa-ẅì ɛkoẅi-ɛnrì lɔ nyɛ́n sɔhɔ́ nɛ̀n antamɛ̀n, ô nyɛ́n tán ɔwrɔn léyi ẅɛn tɛ̀bru nɔn. 29Ɔmuhi ɔwrɔn totɔtɔ̀n léyi ẅɛn eci nɔn, yɛ lɛ sàn kɛ́n nɛ̀n ɛwú kɩ ne le dú ɛci bobrebe ẅɛn-wrɔn; tɛ́n ɔwrɔn léyi kè sɩ̀ ẅɛ̀n hàn nɔn, ye le bɩ́ ɛẅiɛ léyi nɛ́n ẅɛ̀n nɔn mán yɛ sɔhɔ́. 30Eci-bɩtan-wrɔn ndɔ léyi kè sɩ̀ ẅɛ̀n vɔ̀nshɛ́ nɔn, nɛ tɛn, nyɛ́n kɔ́n nɛ̀n ze ɛyri yɔwɔ mɛ̀n, ɛyri léyi eyú-wù mán ɛhnyî-rá ndù nɔn.’ ”

Emɛẅi-trɔ mrɛ̀ncì

31“Ɛnvra léyi ɔwrɔnẅì Ẅì kɛ lɛ vá n'eci-zrɔ lɔ mɛ̀n, nɛ́n mán Ɔwɔ-kùyüre-bɔ̀ lɔ fɛn mɛhi nɔn, nɛ lɛ yɛ́ n'eci-zrɔ-gbú-tobù lɔ wú. 32Ɛnhibù fɛcüè hɔ̀n lɔ fɛn kɛ lɛ borɛkru n'ezìwú kɩ nɛ lɛ kua anwrɔn, hán ɔmu le annɔ̀n-kua-bɔ̀ kɛ kua kɔ̀kɔ̀sɛ̀ mán ɛbùrì; 33nɛ lɛ hɛ́n kɔ̀kɔ̀sɛ̀ hɔ̀n n'ezì-kɔrɛ̀a kɩ ɛbùrì hɔ̀n ke le dú nɛ̀n ebrìemɛ̀n. 34Zɛtɛn ɛnnɛ̀ncüì lɔ kɛ lɛ dɔ́ anwrɔn hɔ̀n léyi dú nɛ̀n ezì-kɔrɛ̀ nɔn le: ‘Nyɛ́n và, nyɛ́n léyi Dade fú nyɛ̀n ɛnshi nɔn, nyɛ́n bru Anhobɩ́ nɛ̀ncüì-dúyri léyi yɛ hán yɛ hɛ́n nyɛ̀n ɛnhibù krubɔmɛ̀n hán hɛ́n nɔn. 35Ɔmuhi ɔmùanwù ẅɛn mɛ̀n, kɩ nyɛ́n tán mɛ̀n ɛci-zî; ɛnshi mùanwù ẅɛn mɛ̀n, kɩ nyɛ́n tán mɛ̀n ɛnshi mɛ́n mì; mɛ́n dú nɛ̀nnyàn-wrɔn kɩ nyɛ́n bɩ́ mɛ̀n nyɛ́n sɩ́ ɛbemɛ̀n; 36Mɛ̀n sɩ̀ ẅɛ̀n ɛci edomɛ̀n, kɩ nyɛ́n ku mɛ̀n ɛci edù; ɛnlɔẅiɛ dá mɛ̀n, kɩ nyɛ́n hán mɛ̀n ɛci; mɛ́n dú anwɔn-mɛ̀n-wá-wɔn mɛ̀n, kɩ nyɛ́n và nyan mɛ̀n.’ 37Ɛnnyrɔnnan-bɔ̀, zɛtɛn kɛ lɛ mrɛ́n nɛ̀n ɔmùan le: ‘Ɛẅɛnwrɔn, ɛnvra tán de bɔ̀ kán mɛ́n ɔmùanwúemɛ̀n, hɩ bɔ̀ tán mɛ́n ɛci, ɛnshi mùanwù ẅɛn mɛ́n, bɔ̀ tán mɛ́n ɛnshi e mì nɛ́n? 38Ɛnvra tán de bɔ̀ kán mɛ́n, è dú nɛ̀nnyàn-wrɔn, kɩ bɔ̀ bɩ́ mɛ́n bɔ̀ sɩ́ ɛbemɛ̀n, è sɩ̀ ẅɛ̀n ɛci edomɛ̀n, kɩ bɔ̀ ku mɛ́n ɛci edù nɛ́n? 39Ɛnvra tán de bɔ̀ kán mɛ́n, è dú ɛnlɔẅiɛ mɛ̀n, è dú anwɔn-mɛ̀n-wá-wɔn mɛ̀n, kɩ bɔ́ hɔ̀n bɔ̀ nyan mɛ́n nɛ́n?’ 40Ɛnnɛ̀ncüì lɔ kɛ lɛ mrɛ́n yɔ ɔmùan le: ‘Mɛ dɔ́ nyɛ̀n annànwɔrɛ mɛ̀n le: ɛnvra totɔtɔ̀n léyi nyɛ́n hán eci ndɔ lɔ nyɛ́n tán ɛẅì hɔ̀n léyi dú nmàn ẅì hɔ̀n, ke dú ɛnzri mán, mɛ̀n de nyɛ́n hán nyɛ́n tán mɛ̀n nɔn.’

41Zɛtɛn, ɛnnɛ̀ncüì lɔ kɛ lɛ dɔ́ yɔ hɔ̀n léyi nyɔn nɛ̀n ebrì-kɔrɛ̀a nɔn le: ‘Nyɛ́n sɔ̀n hɔ́n ɛmɛẅi esù-she m'ɛtɛ̀sɛ̀n, Ɔwɔ-ẅiɛ̀-dá-bɔ̀! Nyɛ́n hɔ́n ɛnhyà léyi ke sɩ́ zɛ́n hán, hɩ yɛ hán dú anwa-wrɔn mán n'ɛsɛ̀nkɛn-bɔ̀ tɛn nɔn mɛ̀n! 42Ɔmuhi, ɔmùanwù ẅɛn mɛ̀n kɩ nyɛ́n sɩ̀ tán mɛ̀n ɛci-zî; ɛnshi mùanwù ẅɛn mɛ̀n, kɩ nyɛ́n sɩ̀ tán mɛ̀n ɛnshi mɛ̀n mì hɛ̀n; 43mɛ́n dú nɛ̀nnyàn-wrɔn, kɩ nyɛ́n sɩ̀ bɩ́ mɛ̀n nyɛ́n sɩ̀ ɛbemɛ̀n; mɛ́n sɩ̀ ẅɛ̀n ɛci edomɛ̀n kɩ nyɛ́n sɩ̀ ku mɛ̀n ɛci edù; mɛ́n dú ɛnlɔẅiɛ mɛ̀n mán anwɔn-mɛ̀n-wá-wɔn-mɛ̀n, kɩ nyɛ́n sɩ̀ wà mɛ̀n esùva.’ 44Zɛtɛn yɔ lɛ mrɛ́n nɛ̀n ɔmùan le: ‘Ɛẅɛnwrɔn, ɛnvra tán de bɔ̀ kán mɛ́n, ɔmùanwúemɛ̀n, ɛnshi mùanwúemɛ̀n, nɛ̀nnyàn-wrɔn, ɛci bàdà mɛ̀n edomɛ̀n, è dú ɛnlɔẅiɛ mɛ̀n, anwɔn-mɛ̀n-wá-wɔn-mɛ̀n, kɩ bɔ̀ sɩ̀ wá mɛ̀n ɛkɔrɛ̀ nɛ́n?’ 45Ɛnnɛ̀ncüì lɔ kɛ lɛ mrɛ́n yɔ ɔmùan le: ‘Mɛ dɔ́ nyɛ̀n annànwɔrɛ mɛ̀n le: ɛnvra totɔtɔ̀n léyi nyɛ́n sɩ̀ hàn eci ndɔ lɔ nyɛ́n tán ɛẅì hɔ̀n kpòkpò lɔ, ke dú ɛnzri mán, mɛ̀n de nyɛ́n sɩ̀ hàn nyɛ́n tán mɛ̀n nɔn.’ 46Kɩ yɔ lɛ hɔ̀n di ɛgbàn-wɔɛ̀n léyi ke sɩ́ trɔa nɔn, tɛ́n yɔ hɔ̀n léyi hán Ɔwɔ kɔrɛ̀zì-ci nɔn, kɛ lɛ hɔ́n ɛwúvà léyi ke sɩ̀ ẅɛ̀n ɛnkru-trɔ nɔn mɛ̀n.”

Selectat acum:

Matie 25: ƐAA03

Evidențiere

Partajează

Copiază