Matta 7

To' on cernan woɓɓe

(Luka 6.37-38,41-42)

1— To' on njowan woɓɓe layfi, cernanon ɓe, gam to' Allah sernan on. 2Gam noon no cerniranɗon woɓɓe, noon Allah boo serniranta on. Kadimaa e etergel ngel etranɗon woɓɓe, e ma'agel ɗum etranta on. 3Gam ɗume ndaarataa celɓol gonngol nder yitere bannda, ammaa a yi'ataa lekki makki gonki nder yitere maaɗa ? 4Koo boo noye mbi'irataa bannda : « Banndam, woor mi ittane celɓol gonngol nder yitere maaɗa », ammaa aan, lekki makki e nder nde maaɗa ? 5Aan munaafukiijo, aartu ittu lekki gonki nder yitere maaɗa tawo, ndeen a yi'ey booɗɗum, gam keɓa no ittirɗaa celɓol gonngol nder yitere bannda.

6To' on kokku kareeji ku'uje ceniiɗe, gam ɗi co''oo ɗi ŋata on. To' on peran aladeeji kaaƴe mooɗon dime, gam ɗi njaaɓey ɗe.

Toree, njillee, cilminee

(Luka 11.9-13)

7— Toree on kokkete, njillee on keɓey, cilminee on omtante. 8Gam toriiɗo fuu no hokkete, jilliiɗo no heɓey, cilminiiɗo boo no omtante. 9Moye nder mooɗon hokkata ɓiyum haayre to o torake ɗum buroodi ? 10Koo boo to o torake ɗum liyngu, ndeen hokka mo mbo'odi ? 11Onon maa halluɓe eɗon anndi no kokkirton ɓiɓɓe mooɗon ku'uje booɗɗe, hakko *Baabiraawo mooɗon mo dow. O ɓurataa hokkugo toriiɗo mo fuu ku'uje booɗɗe naa ? 12Mbaɗanee yimɓe ko ngiɗɗon ɓe mbaɗana on, gam kanjum woni ekkitinol *Tawreeta Muusa e defte annabo'en.

Dammugal paaɗngal

(Luka 13.24)

13— Nattiree dammugal paaɗngal ! Gam dammugal aaftiingal ɗum dammugal yahago halkere. Tokkugo laawol ma'agal boo e hoyi, tokkuɓe ngol e ɗuuɗi. 14Ammaa dammugal yahago yonki e faaɗi. Tokkugo laawol ma'agal boo e saɗi, heɓteyɓe ngol no seɗɗa'en.

Lekki e annditiree ɓikkon muuɗum

(Luka 6.43-44)

15— Kakkilee e annabo'en fevooɓe warooɓe to mooɗon e nanndi e baali, ammaa nder ɓerɗe maɓɓe ɓe cayaakiije beelaaɗe. 16On annditirey ɓe gada e kuuɗe maɓɓe, noon no lekki annditirtee gada e ɓiɓɓe muuɗum. Cilluki rimataa innabooje, jaaɓi boo rimataa tanne. 17Lekki booɗki no rimey ɓikkon mbooɗkon, lekki ki vooɗaa boo no rimey ɓikkon kon mbooɗaa. 18Noon boo, lekki booɗki rimataa ɓikkon kon mbooɗaa, lekki ki vooɗaa boo rimataa ɓikkon mbooɗkon. 19Lekki ki rimataa ɓikkon mbooɗkon fuu no fe''ete feree nder yiite. 20Noon boo annditirton annabo'en fevooɓe gada e kuuɗe maɓɓe.

Mi anndaa on sam

(Luka 13.25-27)

21— Wanaa vi'ooɓe yam : « Jawmiraawo, Jawmiraawo » fuu nattata *laamu Allah, sey waɗooɓe ko Baaba am gonɗo toon dow asama yiɗi. 22*Nyannde-darngal, yimɓe ɗuuɗɓe no mbi'ey : « Jawmiraawo, Jawmiraawo ! Min nga'ajinii e innde maaɗa ! Min laggirii *ginnaaji e innde maaɗa ! Min kuwii alaamaaji kaayniiɗi e innde maaɗa ! » 23Ndeen mi vi'a ɓe : « Mi anndaa on sam. Ndillanee yam ɗo'o, onon halluɓe ! »

Cuuɗi ɗiɗi

(Luka 6.47-49)

24— Gam ma'ajum, neɗɗo fuu nanɗo ɗe'e bolle am tokki ɗe, o nanndii e neɗɗo ƴoyɗo mahaɗo wuro muuɗum dow haayre. 25Nde iyoonde toɓi, geebeeji ngaddoyi ndiyam, keni cemmbiɗɗi mbisi piyi ngo, ammaa e noon fuu ngo yibbaay, gam ngo mahaama dow haayre. 26Ammaa neɗɗo fuu nanɗo bolle am tokkaay ɗe, e nanndi e mo walaa ƴoyre, mahaɗo wuro muuɗum dow njaareendi. 27Nde iyoonde toɓi, geebeeji ngaddoyi ndiyam, keni cemmbiɗɗi mbisi piyi ngo, sey ngo yibbi, ngo sankitii ngo fuu.

28Nde Yeesu yottini ka vi'ata, yimɓe fuu kaayɗini e ekkitinol ma'ako, 29gam o ekkitinii ɓe e baawɗe, wanaa kama no *moodiɓɓe Tawreeta ekkitinirta.

Selectat acum:

Matta 7: fuq

Evidențiere

Partajează

Copiază