San Juan 11

Lázaro‑ni uttie

1La'ania do ttu benne rani lábie Lázaro. Anke benne lhe'esi Betania, lhe'esi ge María‑ni lhe ge xilani Marta‑ni lhe. 2María‑ni raka danni Lázaro‑ni. María‑ni nuha bedona seti rure ixixxi ka ni'a Jesús‑ni nna bodibisina ka nuha len itsa ikiniha. 3Ixpa xilabakani udhelhakana, rákana Jesús‑ni:

―Tata, benne raka xxattinlu geeha, raniba benneha.

4Jesús‑ni tti bine nuha nna ree:

―Isagwe ridaka nu kwitiha labí anka nuha nu uttina na, sinuki isagweha ixúlana kini ula'a nu xxeni ra le Tata Do Yebáha lhe anágaba neti benne ankaa Xi'inieha, ula'agaba nu xxeni ra lasia.

5Jesús‑ni meskiba gwa rakanie ge Marta‑ni lhe ge xilaniha lhe ge Lázaro‑ni lhe, 6ttaka labie atti bine deki raniba Lázaro‑ni, beya'anlee ata rekieha a chupa ubisa. 7Delola nna ree ka benne rudhetinieha:

―Eya'alari'i daka Judea‑ni attu libe.

8Ka benne rudhetinieha nna ráke bie:

―Maestru, ki si ukaba ttu chupa ubisa‑ni nuha tti ruin ka nu Israel‑ni usiakana lu íyya. ¿Si edeya'abari'i niha attu libe?

9Jesús‑ni nna bekabie gekani, ree:

―¿Laaba ganna tsi'inu (12) ura yu'u lhe'e ttu sá? Nu reki resáha labí riyu'una nuha, kumu gwa rilábinna xiani ru'u yiesi lo yu‑ni, 10ttaka nu reki relaha iyu'unaba nuha, kumu labí xiani ru'u geni kini ilenna.

11Iki de nuha nna ree:

―Amigu geri'i Lázaruha chiba uta'adhi benneha, ttaka chi tsiaya kini odibánie.

12Ka benne rudhetinieha nna ráke bie:

―Tata, ganna chiba utta'adhie, nuha runna liina deki gweyakaba benneha.

13Ttaka Jesús‑ni ge elhutti ge Lázaro‑niba nuha rinnebie. Lake nna ukakanie ganna ge bisiela ra'adhibari'i nuha rinnebie. 14Niala nna tti utixxi'a tsenie ke, rabie ke:

―Lázaro‑ni chiba utti nuha. 15De lebi'i nna redeakati kumu de labí dua niha tti utti benneha. Nnanna nna tsiarugari'i kini ilenle nu unia, kini aníha nna tsia lele kia.

16Tomás benne tekanie lábie Kwachi, benneha ree adí ka benne rudheti lenieha:

―Anágaba ri'i tsiagabari'i kini gattigabari'i len benneha.

Jesús‑ni belhidhe Lázaro‑ni lo elhuttiha

17Tti bisin Jesús‑ni lhe'esi Betania bine deki chi uka ttapa ubisa bigatsi Lázaro‑ni. 18Betania‑ni rena gaxxaba kwe'e Jerusalén‑ni, rena ttiba tsunna kilómetru 19nna ixe ka benne Israel chi ugíake gwalannike Marta‑ni lhe María‑ni lhe, ki gwadú ittake le ka benneha de du si'i leke utti dankeha. 20Tti bina Marta‑ni deki chi isin Jesús‑ni lhe'esiha, nianna biria ttebana gwaledane, ttaka María‑ni nna beya'anbana lhe'e yo'oha. 21Marta‑ni nna rana Jesús‑ni:

―Gannaru dolu nii xa tata, labíga utti benne danaaha ganna ttixka. 22Ttaka neti yubaa meskiba nnanna iyába nu innabalu len Tata Do Yebáha, gutebe nuha lenlu xa tata.

23Jesús‑ni nna bekabie, ree na:

―Gweyaka benba danluha.

24Marta‑ni nna bekabina, rane:

―Neti yubaa deki gweyaka benba benneha tti eyadha ka benne chi uttiha eyaka benke ganna chi isia sá daluxaha.

25Jesús‑ni nna rabie na:

―Neti runia ki reyaka ben ka benne chi uttiha lhe runia kini raka ben ka benne ttu dia lii lhe. Benne tsia lebie neti, meskiba chi uttie nna gweyaka benbe ttu dia lii, 26nna iyába ka benne sa se'e benke, ganna tsia leke neti, ka benneha nna satíaba aka benke, labí gattike. ¿Si gwa ria lelu ge nu ria‑ni?

27Marta‑ni nna rane:

―Ila xa tata, gwa ria galá lasia deki lu ankalu Cristu Xi'in Tata Do Yebaa benne chi ga'anna isia yiesi lo yu‑ni.

28Iki de tti chi rana Jesús‑ni aníha, nianna deyyana gwalisana xilani María‑ni nna sigába rana nuha:

―Naa chi du maestruha raxie lu.

29María‑ni nna sun tteba biyieninna nuha nna bexunni ttebana diana ata du Jesús‑ni. 30Jesús‑ni labí chi uta'abie lhe'esiha, sa dube ata beti'a Marta‑nieha. 31Ka benne Israel, ka benne se'e lenke María‑ni lhe'e yo'oha ki rodú ittake leni, ka benneha tti bilákanie ruxunnibana biriana diana, nianna danalha ttebake na ukakanie ganna iki baaba diana ubesi. 32Tti bisin María‑ni ata du Jesús‑ni, tti bilenna benneha nna bedú tteba xibini arloe nna rane:

―Tata xisi to, gannaru do kwinalu nii, labíga utti benne danaaha ganna ttixka.

33Jesús‑ni tti bilánie ribesi María‑ni lhe ribesi ka benne Israel dia lennaha lhe, axtaba bega'a dina lhe'e lastoe nna bedú si'ina lebie, 34nianna tti unnaba tise, ree na:

―¿Gáli gwakatsile na?

Lana nna rane:

―Utáruga belanni xa tata.

35Nianna tti uresi Jesús‑ni. 36Ka benne Israel‑ni nna ráke:

―¡Gwaluyúruga, kattiparuba rakanie ge benneha!

37Adíke nna ráke:

―Nuní gwa uka geni bedhalina ka iyya lo benne lo xuaha, ¿beakala Lázaro‑ni nna a benna kini abittu uttina?

38Jesús‑ni nna bododú si'i xxattana lebie attu libe, nianna tti die ata bekatsikana benneha. Yieru baa ata bigatsi benneha ttu beleaba anka nuha nna yaya ttu íyya bata ro'oni. 39Nianna tti ree:

―Gwalikua íyya yaya ro'o yieru baa‑na.

Marta dan benne chi uttiha nna rane:

―Gaxa chiba rure benne‑na xa tata. Chiba uka ttapa ubisa bigatsie.

40Jesús‑ni nna bekabie, ree na:

―¿Laaba chiba ria lu ganna lu tsia lelu, la'ania nna gwalábinlu nu xxeni ra le Tata Do Yebáha?

41Nianna tti utuakana íyya yaya ro'o yieru baaha. Jesús‑ni nna belhidha loe gwetsáha nna ree:

―Ixkixaru rugwea lu xa Tata, kumu gwa biyienbinlu kia. 42Neti yubaa deki satíaba gwa riyienibinlu kia, ttaka de ka benne se'e nii nna unnea ria aná, kini tsia leke deki lu udhelhalu neti.

43Iki de chi rabie aníha, nianna tti unnebie idisa, nna ree:

―¡Lázaro, beria naa nna betá!

44Benne chi uttiha nna beriabie derilhi ka ni'eha lhe ka neeha lari. Anágaba loeha derilhigabana lari.

Nianna tti ra Jesús‑ni ka benne se'e niha:

―Gwaledhasi ka lari‑na latini kini aka edána.

Ka nu loni ge ka benne Israel‑ni regila lekani gasina uttikana Jesús‑ni

(Mt. 26:1-5; Mr. 14:1-2; Lc. 22:1-2)

45Ixe ka benne Israel ka benne dia lenke María‑ni, tti bilákanie nu ben Jesús‑ni, nianna ugía leke gebie. 46Ttaka attu chupa ka nuha nna ugía ttebakana gwattixxi'akinna ka fariseo‑ni nu chi benieha. 47Ka fariseo‑ni lhe ka nu loni ge ka bixxudiha lhe, bottupa ttebakana ka nu runi elhuxtisi ge ka benne Israel‑ni nna ra luesikani:

―¿Bíla anka nu uinri'i ganna? Nubiyú reki nii ixeba ka milagru ruinna. 48Ganna anába la rugwelhabari'i na ruinna ka milagru ruinna‑na, la'ania nna iyába ka benne tsia leke geni, nianna tti ita ka nu rinnabia ge Roma‑ni etetse'e lookana yotu le'a geri'i‑ni lhe ka benne geri'i‑ni lhe.

49Ttaka ttu ka nuha, delába nu tee láni Caifás nu anka bixxudi xeni lhe'e idaha, nuha nna rana kana:

―Lebi'iligaba birula yule. 50Nigaba a rite denle deki tserula saríana ri'i ganna sun ttúba benne gattie kwenta ge ka benne geri'i, alaa kila iyábake tse'e looke.

51Ttaka Caifás‑ni labí nu anka geni nuha unnena tti rana aníha, sinuki kumu de ankabana bixxudi xeni lhe'e idaha, de nuha nna unnena nu chi ga'anani Tata Do Yebáha aka, unnena deki Jesús‑ni gattie kini kixe ge ka benne Israel‑ni. 52Anna laa sun ge ka benneha‑ga kixe, anágaba kixagabe ge iyá ka benne chi ankake xi'in Tata Do Yebáha, delába ka benne se'e gatti gattiba, ki ottupe ke nna eyakake ttúba. 53Laxkala debá la sáha nna beda'a ro'okani uttikana Jesús‑ni.

54De nuha nna labíru ugweki Jesús‑ni la saa lagwi ge ka benne Israel‑ni. Berialee ata rekieha nna deyye gaxxaba lo yu bisi ata re ttu yiesi tee láni Efraín. Niha‑ba ugweki lenie ka benne rudhetinieha.

55Tti chi dabigana isia laní Pascua, delába laní ge ka benne Israel‑ni, ixe ka benne se'e lhe'e adí yiesi diake lhe'esi Jerusalén‑ni atti lani isia laníha kini eyarike arlo Tata Do Yebáha. 56Niha rekike regilake Jesús‑ni nna rinnaba tisa luesike ro'o yotuha, ra luesike:

―¿Bí rakinle? ¿Si bi gwa itana laní ganna?

57Ka nu loni ge ka bixxudiha lhe ka fariseo‑ni lhe, ka nuha chi bedhankana tisa rákana, ganna nuxa ttu benne une gaxa reki Jesús‑ni teeki kixxi'anie kana kini anáchu aka gekani udaxxukana Jesús‑ni.

Selectat acum:

San Juan 11: zae

Evidențiere

Partajează

Copiază