San Juan 10

Jesús‑ni rigixxi'abie ge ttu benne reki lo ka neru

1’Netiru ria, nu abíba ra'ana ro'o puerta du ro'o lisi ka neruha, sinuki ata subila ribixxina ra'ana, nu runi aníha ubanaba anka nuha. 2Ttaka nu gwa ra'ana ata do ro'o lisi ka neruha, nuha‑ligaba nna gwalí gwankana nu rekina lo ka nuha 3nna nu ridú ki ruyúna ro'o lisi ka neruha gwa ridhaliba nuha kini ra'a nu reki lo ka neruha. Ka neruha nna reyoinbia ttebakana tsi'i nu rekina lokaniha. Lana nna kua ttu ttuba ka neruha raxina rudettina lákani, nianna tti ribeana kana. 4Ganna chi uleana iyá ka neru ka nu anka geniha, nianna tti rineruna lo ka nuha. Ka nuha nna gwa ranalhabakana na kumu gwa reyoinbiabakana tsi'ini. 5Ttaka nu abittu ankabiakinnaha, labí sanalhakana nuha; uxunnilakana geni kumu de labí ankabiakinna tsi'ini.

6Nuní unne Jesús‑ni betanie ka benne se'e niha, ttaka lake nna labí ute dákanie bixa diani nu raka lebie kixxi'anie keha.

Jesús‑ni anke ttu benne ruyú tsebie ka neru geeha

7Nianna redea Jesús‑ni ka benneha attu libe:

―Netiru ria: Neti nuha ankaa puerta du ro'o lisi ka neruha. 8Iyába ka nu abittu biyú tsekana ka neruha, ka nu chi bitakana tti lanila isiaya yiesi lo yu‑ni, ka nuha ubanaba ukakana. Ka neruha nna labí bedo nagakani gekani. 9Neti ankaa puerta du ro'o lisi ka neruha. Benne ga'abie ro'o puertaha, godilába Tata Do Yebáha bie. La'ania nna uinbe ttiba runi ttu neru to. Neru toha reria reta'abana, rigilana nu gona.

10’Ubanaha suna daba nuha kini lhanana lhe uttina lhe utse'e loona lhe; ttaka neti daya kini odiláya le kini satíaba aka benle arlo Tata Do Yebáha, kini anáchu nna gwasipa edí baale tse'ele. 11Neti nuha ankaa benne ruyú tse ka neruha. Benne ruyú tse ka neruha nna reria iki reria lebie meskila gattie kini odilábie ka neruha. 12Ttaka ttu nu ridí lhiaxani ki rekina lo ka neruha, tti rilenna daa sageeha nna ruse'e bixxibana ka neruha nna ruxunnina kumu laaga geni ka nuha. Sageeha nna ruinna udaxxuna ka neruha, nianna rutsatsana kana. 13Nu rekina lo ka neruha ruxunnilana nna labí retabinna ge ka nuha, kumu nu naxaba ankana.

14’Neti ankaa benne ruyú tsea ka neruha. Neti ankabiabati ka neru ka nu ankakana kia. Anágaba ka nu chi ankakana kiaha nna gwankabiagabakinna neti. 15Ttiba Tata kiaha chi ankabianie neti, anágaba neti chigaba ankabiatie lhe rutea elha nabani kia‑ni kini gattia ki odiláya ka neruha. 16Se'erugabati adí ka neru ka nu labí chi selakana ka nu se'e nii. Anágaba ka nuha rakagaba doelha taxía kana nna gwayienbakinna tsi'a. Gwanka suna ttu dhiba eyakakana lhe ttúba benne tsekie lokani lhe.

17’De nuha nna Tata kiaha rakanie kia, kumu rutea elha nabani kia‑ni ki gattia, kini delo nna eyaka benbaa attu libe. 18Lanú nu uttina neti, sinuki kwinaba neti redá lasia gattia kwenta ge ka benne, kumu neti gwa teeba lo neda kia utea elha nabani kia‑ni ki gattia. Anágaba nna gwakagaba kia eyaka bania attu libe. Nuní chi bodha'an Tata kia ki unia.

19Tti biyienin ka nu Israel‑ni nu reeha, nianna bedela'a lhe'e luesikani kumu de labí riyien ten ge luesikani. 20Ixebakana rákana:

―¿Beaka rudo nagakani ge nuní, ki espíritu xxegwiha‑ba yu'u lati nuní?

Lhe rágabakana:

―Rakaba iki nuní.

21Adíkana nna rákana:

―Lanú ttu benne yu'u espíritu xxegwi latie gwaka gebie innee tti rinne nuní. Laa gwakaga ge espíritu xxegwiha edhalina lo ttu benne lo xua.

Ka nu loni ge ka nu Israel‑ni rigu'u ni'akani Jesús‑ni

22Tti chi bisia ka beo raka idilhaha, la'ania nuha ka benne Israel‑ni ruinke laní Jerusalén‑ni tti rexxa leke la sá bocharike yotuha nna boteke benneha len Tata Do Yebáha. 23Jesús‑ni nna rekie ro'o yotuha ata daa kweredori ge Salomón‑ni. 24Ka benne Israel‑ni bitupake abi'iba kwe'ebie nna ráke bie:

―¿Nukalila kixxi'alu nuxa ankalu? Ganna lu ankalu Cristu, tsa ttela utixxi'en ri'itu kini aka xen letu.

25Jesús‑ni nna bekabie geke, ree:

―Ki chiba utixxi'ania le nna abígaba ria lele. Ka milagru rute Tata kiaha ki runia, ka nuha rigixxi'akana nuxa ankaa. 26Ttaka lebi'i nna labí ria lele, kumu de labí ankale neru kia. 27Ka benne ankake neru kiaha, gwa riyienbakanie tsi'a tti rinnea. Neti nna gwankabiabati ke, lake nna gwa retenalhabake neti. 28Neti runia kini raka benke ttu dia lii nna ttu tsaba labí tse'e looke. Anágaba nna lanú nu aka geni eguana ke lo náya. 29Tata kiaha betebie ke lasi náya. Benneha xxenirula ra lebie tti attu benne, laxkala lanú dhaana eguana ka benne ankake neru kiaha lo ná Tata kiaha. 30Neti lhe Tata kiaha lhe, ttúba benne anka ri'itu.

31Nianna tti bododaxxu ka nu Israel‑ni íyya nna ruinkana odose'ekane. 32Jesús‑ni nna ree kana:

―Ixeba ka milagru chi benia arlole, delába ka milagru bete Tata kiaha kini unia. ¿Nú ge ka milagru beniaha ruinle usiale neti íyya?

33Lakana nna bekabikana, rákana:

―Laa ruingatu usiatu lu íyya de ruinlu ka milagru. Ruintu usiatu lu íyya kumu Tata Do Yebáha nuná rorexxa gaalu tti ralu aná. Kumu lu ki benneba ankalu nna ruinlu deki ankalu Diosi.

34-35Jesús‑ni nna bekabie ree kana:

―Ri'i gwa yúbari'i deki labí aka ku'u ni'ari'i nu ra lo ka yetsi ge Tata Do Yebáha. ¿Laaba lo ka yetsi denle‑na ra Tata Do Yebáha: “Lebi'i diosiba ankale”? Ki ganna diosi utixxa Tata Do Yebáha lá ka benne begwebie ke ka tisa geeha, 36¿beakala netila ulesie nna udhelhe yiesi lo yu‑ni, beakala rálale neti deki rorexxa gaaya Tata Do Yebáha de ria, “Neti ankaa Xi'inie”? 37Ganna neti abíba runia nu ruin Tata kiaha, bittugaba tsia lele kia, 38ttaka ganna gwa ruinbaa nu runie, meskila a ria lele kia, gwaltsia lele ge nu rilenle runia, kini tsala unale deki Tata kiaha ttúba benne anke len neti nna neti nna ttúba benne ankaa lenie.

39Nianna tti redeonkana ododaxxukane attu libe, ttaka lee nna ulábe lo nákani.

40Nianna tti dedheyye daka attu ladu ro'o yoo Jordán‑ni, daka ata begadi Juan‑ni ka benne inda ttuha nna niha‑ba ugwekie. 41Ixe ka benne risinke ata dueha nna ráke:

―Gwalí galá Juan‑ni labí bixa ttu milagru ben benneha, ttaka iyába nu utixxi'anie ri'i ge nubiyú du nii, gwalíba nu ra benneha.

42Nianna ixeba ka benne ugía leke ge Jesús‑ni tti rekie daka ro'o yoo Jordán‑ni.

Selectat acum:

San Juan 10: zae

Evidențiere

Partajează

Copiază