San Juan 9

Jesús‑ni beyonie ttu benne lo xua

1Tti deyu'u Jesús‑ni neda deyye nna bilánie ttu benne lo xua. Aníha‑ba anka benneha attili ulieha. 2Ka benne rudhetinieha nna unnaba tisake Jesús‑ni, ráke bie:

―Maestru, ¿núke ben ttu bixa tulha de nuha nna anka nu kwiti‑ni aní? ¿Si lana ak? ¿Ka tata nan geniha ak?

3Jesús‑ni nna bekabie ree:

―Labí ankana nu lo xua de bixa tulha benna, nigaba de bixa tulha ben ka tata nan geniha. Ankana aní kini eyoin Tata Do Yebáha na nna len nu unieha nna ule'e nu xxeni ra leeha. 4Ttiru nnanna sa anka resá, uin‑xxiri'i sina ge benne udhelhe netiha; kumu ganna chi uka rela, la'ania nna lanúru aka geni kwenna sina. 5Laka nnanna doa yiesi lo yu‑ni, netiba ankaa xiani ge iyá ka benne se'e yiesi lo yu‑ni.

6Nuha‑ba ree nna tti bettuttu xxenie lo yu nna len xxenieha benie yuna, nianna tti utabie nuha ka iyya lo benne lo xuaha. 7Nianna tti ree benneha:

―Ugía gwattí lolu ro'o yiela nu tee láni Siloé. (“Siloé” dienna innána Nu Ria Mandadu.)

Benneha nna ugía ttebe gwattí lobie nna tti beyekieha nna chiba relánie. 8Ka benne se'e gaxxaba ata do benne uka lo xuaha lhe ka benne chi bilákanie ridoe rinnabe belhiu, ka benneha ra luesike:

―¿Laaba nuníba nuha ridona rinnabana belhiu?

9Ttu chupake nna ráke:

―Ila, labana nuha ridona niha.

Adíke nna ráke:

―Laa lagana nuha. De rugíaba nuní tti rugía nuha.

Nubiyúha nna rana:

―Ila, netiba nuha.

10Nianna tti ráke na:

―¿Galasina uka nna chi belenlu?

11Lana nna bekabina, rana:

―Benne tee lábie Jesús‑niba benie latti yuna nna utabie ka iyya loa‑ni, nianna tti ree neti: “Ugía gwattí lolu ro'o yiela nu tee láni Siloé.” Nianna ugíaya gwattí loa nna belá ttebati.

Ka fariseo‑ni rinnaba tisakana benne uka lo xua gasina beyali ka iyya loeha

12Nianna tti ráke nubiyú chi beyali loniha:

―¿Gon‑na du nubiyú ralu‑na?

Lana nna rana:

―Nú yu.

13Nianna tti chekana benne uka lo xuaha arlo ka fariseo‑ni, 14kumu tti ben Jesús‑ni yuna len xxenieha tti bedhalie lo nubiyúha, la sáha ukana sá tti reyaka le ka benne Israel‑ni. 15Nianna bedennaba tisagaba ka fariseo‑ni nubiyúha attu libe, rákana na:

―¿Gasina uka nna belenlu?

Lana nna bekabina, rana kana:

―Yunaba utabina ka iyya loa‑ni, nianna tti gwattí loa nna belá ttebati.

16Ttu chupa ka fariseo‑ni nna rákana:

―Nubiyú benna nuní labí anka nuha ge Tata Do Yebáha, kumu ribenlana sina tti risia ka sá reyaka leri'i.

Adíkana nna rákana:

―¿Gasina aka ge ttu benne unie luesi ka milagru‑ni ganna anke nu runi tulha?

Ya yaba le rinnekana, labí turo'o rinnekana. 17Nianna tti bedennaba tisakana nubiyú uka lo xuaha attu libe, rákana na:

―Lu nna, ¿bíla ralu ge nu bedhalina lolu‑na?

Lana nna bekabina, rana:

―Neti ria, ankabana ttu profeta ge Tata Do Yebáha xa.

18Ttaka ka nu loni ge ka benne Israel‑ni nna labí ria lekani deki uka nubiyúha benne lo xua, nnanna nna chiba relánie. Uxilibakana ka tata nan ge benneha 19nna unnaba tisakana ka benneha, rákana ke:

―¿Si xi'in biyúle nu du‑ni, nu rale deki ttili ulinaha xua loni? ¿Galasina nna chiba relenna nnanna?

20Ka xxudi ixná nubiyúha nna bekabike, ráke:

―Ri'itu yúbatu deki xi'inbatu nuní lhe yúgabatu deki nu lo xuaba anka nuní ttili ulinaha. 21Ttaka labí yutu gaxasina uka nna chi relenna lhe nigaba a yutu nú bedhalina loni lhe. Gwalinnaba tisa na. Chiba anka nuná nu xxeni. Kwinaba lana kixxi'ana nú bedhalina loni.

22Aníha‑ba ra ka tata nan ge nubiyúha kumu rasikanie ge ka nu loni ge ka benne Israel‑ni kumu chi unnekana rákana, ganna ttu benne inne deki Jesús‑ni anke Cristu, la'ania nna ebea ttebakana benneha lhe'e yo'o ata rudheti ka benne Israel‑ni ka tisa ge Tata Do Yebáha. 23De nuha nna ra ka tata nan geniha: “Naba gwalinnaba tisa na. Chiba anka nuná nu xxeni.”

24Nianna tti bedeaxi ka nu loni ge ka benne Israel‑ni benne uka lo xuaha attu libe nna redeakane:

―Arlo Tata Do Yebáha unne nu anka gwalí. Ri'itu yutu deki nu beyoinna luha, nu ruin tulhaba anka nuha.

25Nubiyúha nna bekabina gekani, rana:

―Neti bittuba yua si ankana nu ruin tulha. Neti nu yúrubaa, ukaa benne lo xua, nnanna nna chiba reláti.

26Lakana nna bedennaba tisakana nubiyúha attu libe, rákana na:

―¿Bí bedhakana lu ki belenlu? ¿Gasina bedhalina ka iyya lolu‑na?

27Lana nna bedekabina gekani, rana kana:

―Ki chiba xpeya le nna lebi'i nna bittuba ria lele. ¿Beaka raka lele kixxi'ania le attu libe? ¿Si rakagaba lele akale benne sanalhale na ak?

28Nianna tti belisa satsakana nubiyúha, rákana na:

―Luba ankalu nu danalhalu na xa. Ri'itu Moisés‑niba danalha ri'itu. 29Ri'itu yúbatu deki Tata Do Yebáha unne lenie Moisés‑ni, ttaka nubiyú ralu‑na labí yutu gaxa biria nuná dana.

30Nubiyúha nna bekabina gekani, rana:

―¿Galabasina anka nuní? Lebi'i abígaba yule gaxa biriana dana. Neti nna gwa bedhalibana loa. 31Ri'i gwa yu xeabari'i deki Tata Do Yebáha labí rudo naga benneha ge ka nu ruin tulha. Sunruba rudo nage ge ka nu gwaria lekanie lhe ruinkana nu ru'u lebie lhe. 32Ni tsa labí chi biyieninri'i innekana ge ttu benne innákana deki bedhalie lo ttu benne ulie anke lo xua. 33Ganna ttixka nu bedhalina ka iyya loa‑ni abittuba ankana nu udhelha Tata Do Yebáha, la'ania nna labí aka ge nuná uinna ttu bixa.

34Nianna rákana nubiyúha:

―Ki lu nu ruin tulhaba ankalu attili uliluha, ¿gá lolu nna lula dalu gwele'en ri'itu?

Nianna tti bebeakana nubiyúha lhe'e yo'o ata rudhetikana ka tisa ge Tata Do Yebáha.

35Tti chi bina Jesús‑ni deki chi bebeakana nubiyúha niha, nna tti beti'abie naha nna ree na:

―¿Si gwa ria lelu benne daa yebáha?

36Nubiyúha nna bekabina, rana:

―¿Núke nuná xa tata? Utixxi'a kini neti nna tsia lasia gebie.

37Jesús‑ni nna rabie na:

―Chiba bilenlu benneha nna labie nuní rinne lenlu.

38Nubiyúha nna rana:

―Gwa riaba lasia lu xa tata.

Nianna tti bedú xibini arloe. 39Jesús‑ni nna ree na:

―Neti bisiaya yiesi lo yu‑ni kini unia elhuxtisi ge ka benne kini ka nu lo xua‑na nna elákinna, ka nu gwa rilálakinna nna eyakakana ka nu lo xua.

40Ttu chupa ka fariseo‑ni ka nu se'ekana lenie niha, tti biyienkinna nu reeha, nianna unnaba tisakane, rákane:

―Ganna niha nna ri'itu, ¿si ankagabatu benne lo xua?

41Jesús‑ni nna bekabie gekani, ree:

―Gannala ankale nu lo xua, la'ania nna abittula ujale yua ge ka tulha ruinle‑na. Ttaka kumu rale: “Gwa rilábintu”, de nuha nna nujabale yua ge ka tulha ruinle‑na.

Selectat acum:

San Juan 9: zae

Evidențiere

Partajează

Copiază