Hart

"Vriend, hou jou hart gesond."

Jy moet met groot sorg na jou binnemens omsien. Moet onder geen omstandighede toelaat dat daar enige bitterheid in jou hart posvat nie (Hebreërs 12:15). Hierdie bitterheid sal jou vergiftig met verwyte en onvergewensgesindheid. Moet dit nie aan jouself doen nie. Onthou: Om onvergewensgesind te wees is soos om gif te drink en te dink jou opponent gaan iets oorkom. Doen die regte ding — besluit om te vergewe. Hou jou hart skoon. Hou jou hart rein. Volg die wyse raad om jou hart te bewaak (Spreuke 4:23). Vergifnis maak nie die onreg wat teenoor jou gepleeg is ongedaan nie; dit beteken gewoon dat jy jou nie sal vermoei met die boosheid van ander nie. Daarom, vergewe mekaar soos God ons elkeen ook in Christus vergewe het (Efesiërs 4:32).