Wat Jesus Gesê Het Oor Die Sin Van Die Lewe en 'n Christelike Lewens- en WêreldbeskouingSample

Verhaal: J.D. Rockefeller

J.D. Rockefeller het op 43 die grootste besigheid ter wêreld besit en op 50 was hy die wêreld se enigste miljardêr.

Maar Rockefeller was nie gelukkig nie. Hy het 'n velsiekte ontwikkel waar die hare op sy kop begin uitval het, en die hare van sy oogbanke en wenkbroue. Hy het gesukkel met sy spysvertering en kon net beskuitjies eet en melk drink — en dit met 'n weeklikse inkomste van 'n miljoen dollar per week.

Een van sy biograwe het gesê dat hy 'n diep begeerte gehad het om geliefd te wees. Mense het hom gehaat vir die manier waarop hy sake gedoen en mense vertrap het. Hy kon nie slaap nie en het geen vreugde gehad nie.

Een aand, na 'n droom, het hy skielik besef dat hy nie eens een sent saam met hom kan saamneem wanneer hy sterf nie. Hy het opgestaan en die Rockefeller-stigting begin en miljoene dollars aan verdienstelike sake weggegee. Stadig het sy gesondheid verbeter. Sy familie en vriende kon sien dat hy weggedraai het van die geldgod af.

Hy het Christus begin volg, deur wie hy sin en betekenis ontdek het. En hy was vir miljoene tot groot seën.