21 Dae Vas en GebedSample

Ons fokus verskuif nou van vas na gebed. Net soos met vas, veronderstel Jesus in die Bergpredikasie en spesifiek in die aanloop na die Ons Vader-gebed dat ons sal bid. Hy sê in hierdie gedeelte "wanneer jy bid" (6a) en "wanneer julle bid" (7a). Hy sê nie "as jy/julle bid nie" maar "wanneer jy/julle bid". Elke kind van God sal dus bid.

Dit maak natuurlik perfek sin, want die wonderlike voorreg van die Boodskap van Jesus (die Evangelie) is dat ons ’n verhouding met God die Vader, Sy Seun Jesus en ook die Heilige Gees kan hê. Kommunikasie is essensieel tot elke verhouding. Gebed is ons primêre kommunikasie met God, soos wat Sy Woord Sy primêre kommunikasie met ons is.

Kom ons hou ook die wonder van gebed in gedagte.Gebed vereis geen spesiale kennis of ondervinding nie. Ons, eenvoudige mense, kan met God die Almagtige praat en kommunikeer. Die vermoë om met die Skepper te kommunikeer, is wat mense van die res van die skepping onderskei. Ons is geestelike wesens wat na die beeld van God geskape is.

Gebed verdiep ons verhouding met die Here. Hoe meer ons bid, hoe nader groei ons aan Hom en hoe beter verstaan ons Wie Hy is. Deur gebed antwoord God ons, Hy gee aan ons rigting en leiding, en skenk ons die krag om versoeking en misleiding te weerstaan. Ons sien deur gebed al hoe duideliker wat die Here se wil is en onderwerp ons s'n aan Syne. Gebed nooi die Heilige Gees opnuut in ons lewens in en maak ons meer en meer soos Jesus.