21 Dae Vas en GebedSample

Hierdie is van my gunstelingverse in die Bybel. Die kerngedagte is dat ons aangemoedig word om op die Here te wag.

Maar wat beteken dit om op die Here te wag? As ek mag eerlik wees: Vanweë my geaardheid is "om te wag" nie iets wat ek graag doen nie. Ek is ongeduldig en voel so verantwoordelik dat ek altyd eerder iets doen of soek om te doen as om net te wag.

Maar om op die Here te wag is nie vermorste tyd nie. Dit dui eintlik glad nie op tyd nie. Om op Hom te wag beteken dat ek met my hele wese in vertroue na Hom opkyk. Nie passief nie, maar aktief!

Dikwels wanneer hierdie frase in die Bybel gebruik word, volg daar ook ’n belofte. Dink maar aan Psalm 27:14 wat ons vandag gelees het. Die vers eggo die gedagte van Deuteronomium 31:6 (AFR2020): "Wees dapper en sterk; moenie bang wees nie en moenie vir hulle skrik nie, want die HERE jou God, Hy is die Een wat saam met jou gaan; Hy sal jou nie in die steek laat en jou nie verlaat nie."

Vertrou op die Here met jou hele lewe en wese. Kyk na Hom vir leiding, hulp, krag, ens. As jy dit doen, sal Hy saam met jou gaan. Hy sal jou nie in die steek laat nie, en Hy sal jou nooit verlaat nie.