Die Here Is My HerderSample

Ken eers jouself!

Martin Luther King het geskryf dat ons nie weet wat om met ons eie pyn te doen nie. Hoe is dit dus moontlik om te weet wat om met ander mense s’n te doen? Ons weet nie wat om met ons eie swakhede of kwesbaarheid te doen nie, behalwe om dit weg te steek of voor te gee dat dit nie bestaan nie. Hoe kan die swakhede in ander mense by ons byval vind as ons nie eens ons eie swakhede aanvaar nie? 

Ons elkeen moet onsself met ons eie swakhede en broosheid konfronteer sonder om onsself daaroor te verag.

’n Mens is nie ’n swakkeling wanneer jy jou eie weerloosheid in die oë kyk en jou swakhede erken nie. Eers wanneer jy jou eie breekbaarheid en pyn aanvaar, kan jy dit eerlik voor jou oopsprei — vir ander om te sien. Dit is ’n verligting om jou skanse te kan laat sak en te kan sê: "Só lyk ek."

Wanneer ’n mens erken dat jy nie in beheer is nie, skuif jou hoop weg van jouself. En jy plaas jou vertroue op God.

Here, dit is ’n verligting om al my swakhede voor U neer te sit en om voluit in u lig te kan lewe. Amen