7 Dinge Wat Jou Vreugde SteelSample

Vreugde-steler Nommer 1: ‘n Klaende en kritiese gees

Een van die dinge wat beslis ons vreugde steel is, wat maak dat ons vreugde putte toegestop word is:  ’n Kritiese en klaende gees

As jy ‘n kritiese en klaende gesindheid het, kan jy eenvoudig nie saadjies van vreugde saai en vreugde oes nie. Jy kan nie! Dis nie moontlik nie. Iemand wat die heeltyd ontevrede en onvergenoegd is, kan nie gelukkig wees nie. Vir hulle is niks ooit goed genoeg nie en volgens hulle kan iets altyd beter of anders gedoen word. 

‘n Kritiese persoon soek heeltyd fout met alles en almal. Dis te lank of te kort; te soet of te suur; te groot of te klein; te lawaaierig of te dooierig; te spoggerig of daar is te min moeite gedoen, maak nie saak wat nie, as dit sus was, soek hulle dit so. 

‘n Klaende persoon sal altyd iets kry om oor te kla. Jy kan jou geld daarop sit. Of dit nou oor hulle gesondheid is, hulle huwelik, hulle werk, hulle kinders, die land, die politiek, die kerk – noem dit en hulle sal iets kry om oor te kla. Wat doen so ‘n gesindheid aan jou? Dit dreineer jou lewenssappe en lewensvreugde. 

Wat is die teenmiddel?  

Vreugde is ‘n besluit. Ek moet besluit ek gaan die positiewe in elke ding soek. Ek besluit om dankbaar te wees vir dit wat ek het en vir dit wat vir my voorgesit is en wat my aangebied word. 

En ek gaan ‘n wag voor my mond sit. Ek gaan Psalm 141: 3 my leuse maak: “Sit ‘n wag voor my mond, Here, hou tog wag oor wat ek sê.”

Gebed

“Deurgrond my, o God, deurgrond my hart, ondersoek my, sien tog my onrus raak.” Psalm 139:23. Kyk Here of ek nie ‘n klaende en kritiese gees het nie en lei my om ‘n gesindheid van vreugde en dankbaarheid te openbaar. Amen.