யோவான் நற்செய்தி நூல் 13 ஆம் அதிகாரத்தில் இருந்து தியானங்கள் Sample

தோமாவுக்கு ஒரு சந்தேகம்: “எங்கே போகிறீர்? நாங்க எப்படி வருவது, வழி தெரியாதே!” என்றான். அவனுக்கு இயேசு தன்னையே பதிலாக சொல்லுகிறார்: “நானே வழியும் சத்தியமும் ஜீவனுமாயிருக்கிறேன்.”  இயேசுவே பாதைக் குறிப்பேடு – வழி; அவரே இந்தப் பயணத்தின் இலக்கு- சத்தியம்; பயணிப்பவருக்கு உந்தமும் ஊக்கமும் அளிக்கும் ஆவியும் அவரே – ஜீவன்! மேலும் இயேசு ”நானே சத்தியம்” என்பதற்கு ”இயேசுவை அறிவதே பிதாவை அறிவது” என்று கூடுதல் விளக்கமும் அளிக்கிறார்: 

அன்பு தங்கை, தம்பி! இயேசுவை நீ அறிவாயா? அவரே நல்வழி; உன்னுடைய ”லைஃப் ஸ்டைல்” அவர்தான். பிதாவை, அதாவது சத்தியத்தை இயேசுவில் கண்டாயா? உன்னைத் திடப்படுத்தும் இயேசுவின் ஆவியை அனுபவித்தாயா? – அவரை மேலும் தெரிந்துகொள்ள அவருடைய வாழ்க்கை சரிதையை – நற்செய்தி நூல்களைப் படி, அவருடன் பேசு – ஜெபி. அவரை உன் நேசராகக் கண்டுகொள்! ஆலோசனை வேண்டுமானால் உன் ஆயரை அணுகு.

ஜெபம்: 

இயேசு இரட்சகரே, “வழியும் சத்தியமும் ஜீவனும்” நீர் என்று நான் அறிவேன். உம்மை மேலும் அதிகமாகப் புரிந்துகொள்ள எனக்கு உதவியருளும்; பிதாவினிடத்திற்கு என்னை வழிநடத்தும். உம்மை நான் தெளிவாகப் புரிந்துகொண்டால் உம்மைப்பற்றி மற்றவர்களுக்கும் சொல்லுவேனே. 

இயேசுவின் பதில்…….

என் குழந்தாய், என்னோடு நடக்க உனக்கிருக்கும் ஆர்வத்தைக் கேட்டு மகிழ்கிறேன். ஓரடி மட்டும் எடுத்து வை; உன்னை ஆன்மீகப் புரிதலுக்குள் சத்தியமாகிய நம் பிதாவை நோக்கி படிப்படியாக வழி நடத்துவேன். வா, என் கையைப் பிடித்துக்கொள்.