Aan Die Voete Van Die VaderSample

’n Plek van genade

Eens vyande van God, maar nou begenadig, in vrede met God en deur Jesus toegang verkry tot die Koning! Efesiërs 2:13 stel dit mooi: “Maar nou het julle wat toe ver weg was, deur julle verhouding met Christus naby gekom. Dit is moontlik gemaak deur Christus se dood aan die kruis.” Dit is wat Christus vir die sondaar doen – Hy was hom in sy bloed; trek vir hom die kleed van geregtigheid aan en bring hom in die troonkamer van God.

Van nature verdien geen mens hierdie toegang nie. Romeine 5:2 sê dis slegs moontlik deur geloof en deur Jesus. Dit is nie deur wetsonderhouding of deur goeie werke nie. Dis nie ’n voorreg waarop ’n mens van nature geregtig is nie – Christus is die enigste een wat “van nature” en van ewigheid af Seun van God is. Ons kan ons kindskap van God slegs verkry deur Hom wat van ewigheid af die Seun van God is.

Paulus noem hierdie heerlike posisie waarin ons ons nou bevind “genade”. Daarom noem Hebreërs 4:16 die troon van God ’n troon van genade en nie ’n “oordeelstroon” nie: “Kom ons gaan dan met volle vrymoedigheid na die troon van ons genadige God.” Ons leef in die sonskyn van God se guns en genade, nie in die skaduwee van sy toorn en oordeel nie.

Here, hoe kan ons U ooit genoeg dank vir u weldaad aan ons! Amen.