Aan Die Voete Van Die VaderSample

Rots van my heil

Nie alleen is God vir ons ’n hoë rots wat veiligheid en beskerming bied nie, Hy is ook ons Rots van verlossing! Jesus het mos die gelykenis vertel van twee mense wat hulle huis onderskeidelik op sand en op rots gebou het. Ons weet wat die uitkoms was toe die reën en storms gekom het.

Om in Jesus te glo en Hom as jou Verlosser aan te neem, is om jou lewe en toekoms vir altyd te verseker. Hy is die Rots van my heil. Dit is egter nie ’n rots wat ek self kan bemeester nie. Dit is te hoog vir my. Ons kan onsself nie red nie. Om Jesus as Saligmaker aan te neem, is om soos Dawid in Psalm 61:3 te bid: “Lei my na die rots hoër as ek.”

Charles Spurgeon, ’n beroemde Engelse prediker uit die 19de eeu, vertel van ’n berugte misdadiger wat ná een van sy evangelisasiedienste na hom gekom het onder diep oortuiging van sy erge sonde en verlede. Spurgeon het by dié geleentheid gepraat oor Jakobus 4:6 wat sê dat God “meer genade” gee. Hierdie sondaar was oortuig dat sy sonde té veel, té groot was vir God om te vergewe. Spurgeon het vir hom gesê: “Bring ʼn maatband en as dit moontlik is, meet die hoogte van jou sonde. Kom dan en kom meet die hoogte van God se genade en jy sal uitvind dat God se genade altyd groter, altyd hoër as jou sonde is.”

Ja, daar ís ’n Rots van heil wat hoër is as ek en jy!

Here, ek wil vir seker my lewe op hierdie Rots bou! Amen.