Liefde vir jouself is nie selfsugtig nie

Skuldgevoelens is vreemde goed. As ’n ma voel ek gereeld skuldig as ek moeg is wanneer ek ná ’n lang dag by die werk by die huis kom en net smag na ’n bietjie rus en alleentyd. Dit is immers gewoonlik die tyd wat ek saam met my seuntjie deurbring. Maar om waarlik teenwoordig te kan wees in hierdie kosbare oomblikke saam met my seun en liggaamlik en geestelik gesond te bly, het ek rus nodig. 

So baie mense glo, dalk onbewustelik, dat dit selfsugtig is om te rus en gehaltetyd met hulleself deur te bring. Om vir jouself lief te wees, is nie selfsugtig nie. Jesus wil hê ons moet ander mense liefhê soos ons onsself liefhet. Dit impliseer dat ons moet lief wees vir onsself. 

Nadat Jesus ’n hele dag lank die mense geleer het, het Hy vir sy dissipels gesê hulle moet saam met Hom eenkant toe kom na ’n stil plek en ’n bietjie rus. Net so het ons ook rus nodig, sónder om skuldig te voel daaroor.

ONTHOU: Dit is nie selfsugtig om vir jouself lief te wees nie. Wat kan jy vandag doen om vir jouself lief te wees?