Zenezi 20
20
Abra'ã norĩ wasu'u, Abimelequihi me
1Tawamhã Abra'ã, Mare na romnhisi hawimhã, ma tô watobro. Tahawa hâiwa nhimi'e niwĩ Cana'ã ti'ai wa'õtõ nho'õmo u te mo, Cadi na romnhisi norĩ wa'wa, Su na romnhisi wa'wa me 're hâimana mono da oto. Tawamhã nimahã na Gera na 'ri wa'õtõ nhisi ãma 're hâimana mono ré hã, 2Abra'ã, te Sara tihidiba na dama wasu'u. Tahawa Abimelequi, Gera ãma apito hã ma tô Sara dama ti'ru, isimiromhurizéb u 'ri 'rãihâ u da te itẽme tãma saprõni da. 3Tawamhã 'Re ihâimana u'âsi mono, bara na Abimelequi sõtõ ré isimirosawẽrẽ na ma tô itẽme wi. Tahawa, ma tô ãne tãma tinha:
— Te za atâ, pi'õ imro ré zô da'mazatõrĩ wa, sô da'maimorĩ da hã.
4Tane nherẽ Abimelequi, zahadu Saraha ãma hã sihâiba tob õ wa, te te upi õ di. Tahawa te ãne tãma tinha asa:
— Apito, marĩ na te upai õ di! E tane nherẽ, te za niha hã ĩma irob'manha. Duré e ĩnhib'a'uwẽ norĩ ma zama te za niha na hã tãma irob'manharĩ za'ra. 5Abra'ã si'uihâ na ma tô wasu'u, Sara tô ihidiba na hã. Õhõ zama ma tô õne na hã siwasu'u. Wa hã, ĩhâimana wẽ zarina wa tô iwẽ na marĩ hã aré tãma 'manharĩ zahuré. Tahawa tô wa hã, marĩ na i'upai'wa na hã ĩhâimana õ di.
6Tawamhã 'Re ihâimana u'âsi mono, sõtõ 'rowim na nherẽ, ma te ãma sada'â ãne:
— Tô ĩma waihu'u pese di, uburé marĩ aihâimana wẽ zarina iwẽ i'manharĩzé hã. Tahawa tô aiwasété tõ da, wa hã wa tô aiwi tété, pi'õ upi tõ da hã. 7Ma'ãpé ãhã na apâ imro ma, pi'õ hã tãma sõmri. Õ hã ĩzadawa 'mahârâ'wa, te za ai'ãma ĩwi hã rowaptẽ, atâ'â tõ da hã. Ãne na hã wa za aipo're pu'u siro. Apâ imro tãma sõmri õ wamhã, te za tô atâ za. Duré uburé aima 're ihâimana za'ra mono norĩ hã te za ai'utõ za.
8Tawamhã awẽm na mararé uptabi Abimelequi hã ma tô udu. Utu wamhã, uburé tite romhuri'wa norĩ zô hã ma tô hâ. Tawamhã sõtõ 'rowi marĩ te te iwaihu'uzé hã ma tô tãma wasu'u za'ra. Ãhã wa, ta norĩ hã ma tô tãma tipahi pese za'ra. 9Taha pari Abimelequi, Abra'ãhã zô hârâ wamhã, ma tô ãne tãma tinha:
— E marĩ ma tô wama i'manharĩ za'ra. E marĩ iwasédé hã te aiwi 'manharĩ bâ, ma tô niha na ĩma iromhâimanazé ĩnhisiwi, duré ĩte ti'ai wa'õtõ nho'õmo nhisiwi ropipa iwasété uptabi hâimana da hã ĩma i'manha! Ãne na asimi'manharĩzé hã ibâi õ di, da te dasima 're irob'manharĩ za'ra mono zéb zarinai õ wa. 10E marĩ zarina ma tô ãne na i'manharĩ da hã asima irosa'ra.
11Tawamhã Abra'ã, ma te ãne asa ãma sada'â:
— Wa tô rosa'rata aré, ã hã daza'rui 're, 'Re ihâimana u'âsi mono wazé'wa 're da'maihâimana mono õ wa, za ni'wa ĩmro hâiba zô te te ĩwĩrĩ na hã. 12Taré oto tô taha nhipai u hã, ĩmama hawib dâ'âsina te tô ĩhidiba na sena na õ hã ĩma tihâiba. Ãne nherẽ, wa hã wa tô ãma ĩmro, ĩna zé're hawi ipoto õ dâ'âsina. 13'Re ihâimana u'âsi mono, ĩmama nhorõwa hawi wasiré a'uwẽ'õ norĩ nhipti'ai mono bâ 're ĩmorĩ da, we te te ĩwazere wamhã, wa tô Saraha ma, wa hã tãma tinha ãne: “Uburé daza'rui mono bâ 're wane mono sidâpâsi ĩzawi na hã dama 're asiwasu'u mono za, wa hã tô aihitébré na hã.”
14Tawamhã Abimelequi, Abra'ãhã ma, ma tô Sara hã apâ tãma hâiba nho. Taha nhipai u hã ma tô pone'ẽrebâ norĩ hã, powawẽ norĩ hã, duré pawa'âbâ ãna romhuri'wa si'aibâ norĩ hã romhuri'wa sipi'õi me hã tãma sõmri za'ra. 15Taha pari, te duré tãma tinha ãne:
— Abra'ã, ãhãta te ĩnhipti'a hã asõ'remhã tihâiba. Ma'ãpé asima iwẽzéb uwaibaba, nimame iwa 're aihâimana mono da, asima ro hã 'maipisutu.
16Abimelequi, te duré Saraha ma, ãne tãma tinha:
— Aihitébré ma, 11 kilu na ẽtẽ waipo prã prata hã wa tô tãma tisõ, marĩ i'manharĩ wasété õ zém na asiré norĩ hã te te ãma siwi aiwaihu'u da hã. Ãhã zarina te za uburé waihu'u za'ra ni, aihâimanazém na i'upai õ zé hã.
17-18Tawamhã Abra'ãhã mro Saraha ma, iromhâimanazéb u'âbâ ma te Uburé Danhib'apito, Abimelequihi nhorõwa 're, uburé pi'õ norĩ, 're ihâimana za'ra mono wi, 're i'ra za'ra mono zé hã tiwi anhito, 're 'ra za'ra mono tõ da. Tawamhã Abra'ã, 'Re ihâimana u'âsi mono wi te te rowaptẽrẽ wamhã, ma tô Abimelequi hã hâiba pese. Duré imro, tãma iromhuri'wa norĩ me ma tô duré apâ hã hâiba pese za'ra, apâ 're i'ra za'ra mono zém na.
Atualmente Selecionado:
Zenezi 20: xavBP
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2011, Wycliffe Bible Translators, Inc.All rights reserved.
