Jenesis 1

God hemi mekem disfala wol

1Longtaem bifoa kam yet, taem God hemi stat fo mekem skae an disfala graon wetem evrisamting wea hemi stap long hem,#Jon 1:1, 2. 2no enisamting hemi stap stret yet long disfala wol. Tudak nomoa hemi gohed fo kavarem bikfala wata, an Spirit blong God hemi gohed fo muv antap long wata ya. 3An God hemi tok olsem, “Laet mas kamaot.” So laet hemi kamap olsem wea hemi bin talem.#2 Korin 4:6. 4God hemi lukim laet ya, hemi gud. Hemi mekem laet wea hemi deferen from tudak. 5Hemi kolem laet ya, De, an tudak ya, Naet. Nao de ya hemi finis. Hem nao fas de blong wol.

6God hemi tok moa olsem, “Hemi mas garem wanfala samting olsem bikfala ruf fo stap long midol, fo divaedem wata ya, mekem haf blong hem bae hemi stap antap long hem an narafala haf blong hem bae hemi stap andanit long hem.”#2 Pita 3:5. 7An samting ya hemi kamap olsem wea God hemi bin talem. Hemi mekem samting ya fo mekem wata hemi divaed, nao haf blong wata hemi stap antap long hem, an narafala haf blong wata hemi stap andanit long hem. 8An hemi kolem samting ya, Skae. Nao de ya hemi finis. Hem nao mektu de blong wol.

9God hemi tok moa olsem, “Wata ya wea i stap andanit long skae hemi mas kam tugeta, mekem drae ples hemi kamap.” Nao samting ya hemi hapen olsem wea hemi bin talem. 10Hemi kolem drae ples ya, Graon, an hemi kolem wata ya wea hemi kam tugeta, Si. An God hemi lukim olketa waka blong hem ya, hemi gud.

11God hemi tok moa olsem, “Evri kaen samting wea hemi save grou long graon ya mas kamap. Hemi mas garem olketa wea i save garem frut long graon, wetem olketa narakaen moa wea i save garem frut long antap. Olketa ya mas garem frut, mekem olketa garem sid fo samfala moa i grou bihaen.” Nao evrisamting ya olketa kamap olsem wea hemi bin talem. 12Olketa deferen kaen samting i kamap an gohed fo grou long graon ya, samfala long olketa i gohed fo garem frut insaet long hem, an samfala long olketa moa i gohed fo garem frut long antap. An God hemi lukim olketa waka blong hem ya, hemi gud. 13Nao de ya hemi finis. Hem nao mektri de blong wol.

14God hemi tok moa olsem, “Olketa laet mas kamap long skae fo makem de an naet. Olketa samting ya bae i fo makem olketa de, an olketa yia, an taem. 15Bae olketa stap long skae, an olketa fo saenaot go long graon ya, mekem hemi garem laet.” Nao olketa laet ya i kamap olsem wea hemi bin talem. 16Hemi mekem san wea i save saen strong, mekem hemi gohed fo saen long de, an hemi mekem mun wea i no save saen strong olsem san, mekem hemi gohed fo saen long naet. An hemi mekem olketa sta tu.

17God hemi putum olketa stap long skae, an olketa saenaot kam long graon ya, mekem hemi garem laet. 18Nao san hemi gohed fo saen long de an mun hemi gohed fo saen long naet, an tufala mekem wea delaet hemi deferen from tudak. An God hemi lukim olketa waka blong hem ya, hemi gud. 19Nao de ya hemi finis. Hem nao mekfoa de blong wol.

20God hemi tok moa olsem, “Olketa deferen kaen fis mas stap long solwata, an hemi mas garem olketa bed tu fo flae olobaot antap.” Nao olketa samting ya hemi hapen olsem wea hemi bin talem. 21Hemi mekem olketa bikfala fis blong solwata, wetem olketa deferen kaen fis wea i stap long solwata an long wata, an hemi mekem olketa deferen kaen bed tu. An God hemi lukim olketa waka blong hem ya, hemi gud. 22Nao hemi blesim olketa, an hemi talem olketa olsem, “Olketa fis, hemi gud fo yufala garem plande pikinini blong yufala, mekem yufala kamap plande go-go yufala fulumap solwata ya. An olketa bed tu, hemi gud fo yufala garem plande pikinini blong yufala, mekem bae yufala kamap plande moa.” 23Nao de ya hemi finis. Hem nao mekfaev de blong wol.

24Nao God hemi tok moa olsem, “Letem graon hemi garem olketa deferen kaen animol. Hemi mas garem olketa animol blong vilij wetem olketa animol blong bus, hemi stat long olketa wea i bikfala, i go kasem olketa wea i smolfala.” Nao olketa samting ya i kamap olsem wea hemi bin talem. 25Hemi mekem olketa deferen samting wea i garem laef wea olketa stap long graon ya. Olketa animol blong vilij wetem olketa animol blong bus, stat long olketa wea i bikfala, go kasem olketa wea i smolfala, hemi mekem olketa evriwan. An God hemi lukim olketa waka blong hem ya, hemi gud.

26Nao God hemi tok moa olsem, “Hemi gud fo yumi mekem man, an hemi gud yumi mekem fo hemi tekem wei blong yumi, an hemi olsem yumi. Bae hemi rul ovarem olketa fis, an olketa bed, an olketa animol blong vilij an long olketa animol blong bus, stat long olketa wea i bikfala go kasem olketa wea i smolfala. Olketa evriwan bae olketa stap andanit long han blong hem.” 27Nao God hemi mekem man, an man ya hemi tekem wei blong hem, an hemi olsem hem stret. Fastaem, hemi mekem tufala man nomoa, wanfala wea i man an narawan wea i woman.#Jenesis 5:1, 2; Matiu 19:4; Mak 10:6. 28Nao hemi blesim tufala, an hemi talem tufala olsem, “Hemi gud fo yutufala garem plande pikinini mekem olketa wea bae olketa kamaot bihaen long yutufala, bae olketa save go an stap long evri ples long wol. Nao bae yufala save mekem evrisamting long wol ya fo stap andanit long han blong yufala. Mi putum yufala, mekem yufala rul ovarem olketa fis, an olketa bed, an olketa narasamting moa wea i garem laef wea olketa stap long wol ya.”

29Nao God hemi tok olsem, “Evrisamting ya wea i gohed fo garem frut long graon, wetem olketa wea i gohed fo garem frut long antap, mi putum olketa evriwan ya fo yufala. Olketa ya, fo givim kaikai long yufala. 30Bat olketa gras an olketa deferen tri, mi putum olketa fo olketa bed wetem olketa animol, olketa evriwan stat long olketa wea i bikfala go kasem olketa wea i smolfala, olketa garem frut blong olketa fo kaikai.” Nao olketa samting ya olketa kamap olsem wea hemi bin talem.

Atualmente Selecionado:

Jenesis 1: SIDC

Destaque

Copiar