GENESA 2

1Hi kona ku endliwa ka matilo ni misava ni swilo hinkwaswo swa swona. 2Kutani hi siku ra ntlhanu na mambirhi, Xikwembu xi heta ntirho hinkwawo lowu xi nga wu endla; kutani hi siku ra ntlhanu na mambirhi, xi wisa entirhweni hinkwawo lowu xi wu endleke. 3Xikwembu xi katekisa siku ra ntlhanu na mambirhi, xi ri hlawula, hikuva hi siku lero, xi wisile entirhweni hinkwawo wa xona, lowu xi nga wu tumbuluxa hi ku wu tirha.

Ta ku vumbiwa ka wanuna ni wansati.

4Ku tumbuluka ka matilo ni misava loko swi endliwile hi Yehovha Xikwembu hi ko loku: 5A ku nga si va kona ximudyana ni xin'we xa nhova emisaveni, ni byanyi hinkwabyo bya nhova a byi nga si mila, hikuva Yehovha Xikwembu a a nga si nisa mpfula emisaveni, kutani a ku nga si va na munhu la rimaka misava.

6Kambe hunguva a yi huma emisaveni, yi tsakamisa misava hinkwayo. 7Kutani Yehovha Xikwembu a vumba munhu hi ntshuri wa misava, a huhutela etinhompfini ta yena ku hefemula ka vutomi, ka va loko munhu a endliwe xivumbiwa lexi hanyaka.

8Kutani Yehovha Xikwembu a endla ntanga etikweni ra Edeni, hitlhelo ra vuxa, kutani a veka kona munhu loyi a nga n'wi vumba.

9Kutani Yehovha Xikwembu a mirisa emisaveni mirhi ya tinxaka hinkwato leyi navetaka mahlo, ni leyi nandzihaka, ni murhi wa vutomi exikarhi ka ntanga, ni murhi wo tivisa swo saseka ni swo biha.

10Nambu a wu huma eEdeni wu chelela ntanga, kambe a wu hambana kona, wu endla milambu ya mune. 11Vito ra lowo rhanga, i Pixoni; hi wona lowu rhendzeleka tiko hinkwaro ra Havhila, laha ku nga ni nsuku kona. 12Nsuku wa tiko lero wu sasekile; kona ku nga kumiwa ni bedelium ni ribye ra onikisi. 13Vito ra nambu wa vumbirhi, i Gihoni; hi wona lowu rhendzelaka tiko hinkwaro ra Kuxi. 14Nambu wa vunharhu, i Hidekele; hi wona lowu khulukelaka evuxeni bya Asiriya. Nambu wa vumune, i Yufrata.

15Kutani Yehovha Xikwembu a teka munhu, a n'wi veka entangeni wa Edeni ku wu rima ni ku wu langutela. 16Yehovha Xikwembu a lerisa munhu, a ku: “U ta tidyela mirhi hinkwayo ya ntanga; 17kambe loko wu ri murhi wo tivisa swo saseka ni swo biha, u nga tshuki u dya, hikuva siku u dyaka, u ta fa.”

18Kutani Yehovha Xikwembu a ku: “A swi sasekanga loko munhu a tshama a ri swakwe, ndzi ta n'wi endlela nakulobye la fanaka na yena.” 19Kambe Yehovha Xikwembu a a vumbile hi misava swiharhi hinkwaswo swa tiko, ni tinyanyana hinkwato ta tilo, a swi neha ka munhu leswaku a ta vona hilaha a nga ta swi thya mavito hakona, ni leswaku mavito hinkwawo lawa munhu a nga ta thya swivumbiwa hinkwaswo ha wona, ma ve mavito ya swona.

20Kutani munhu a thya swifuwo hinkwaswo mavito, ni tinyanyana ta tilo, ni swiharhi hinkwaswo swa tiko; kambe a nga kumanga nakulobye la fanaka na yena.

21Kutani Yehovha Xikwembu a etlerisa munhu hi vurhongo lebyikulu, kutani munhu a tietlelela; kutani a teka rimbambu rin'wana eka yena a tlherisela nyama ematshan'weni ya rona. 22Kutani Yehovha Xikwembu a endla wansati hi rimbambu leri a nga ri teka ka munhu, a n'wi tisa ka munhu. 23Kutani munhu a ku: “Sweswi, yeloyi, i rhambu ra marhambu ya mina, ni nyama ya nyama ya mina; yeloyi u ta thyiwa wansati hikuva u tekiwile eka wanuna.” 24Hikwalaho-ke wanuna u ta siya tata wakwe ni mana wakwe, u ta namarhela nsati wa yena, va ta endla nyama yi ri yin'we.

25Kutani wanuna ni nsati wa yena a va tshama va nga ambalanga nchumu, kambe a va nga ri na tingana.

Atualmente Selecionado:

GENESA 2: TSO29

Destaque

Copiar