Matalikilo 4

Kaini aAbelo

1Ono Adamu wakakumana aEfa mukaakwe, aboobo wakamita. Wakatumbuka mwaana musankwa. Mpeeke Efa wakaamba ayi, “Ndaba amwaana musankwa kwiinda munkusu shakwe Lesa.” Lyalo wakamupa liina ayi Kaini. 2Pesule wakashala mwaana musankwa aumwi wiitwa ayi Abelo. Abelo wakaba mweembeshi, sombi Kaini wakaba mulimi. 3Ndipakeenda nshiku, Kaini wakaleta shilimwa akupa cipo kuMwaami Lesa. 4Mpeeke Abelo wakaleta twana twa mbelele tutaanshi kushalwa kushaakwe shimwi, watucaya akubenga mulambu wa shipansha shibotu sha ntuto kuli Lesa. Mwaami Lesa wakamukondwa Abelo akutambula mulambu wakwe.#Ebulu 11:4 5Sombi wakakaka Kaini pantu pomwi acipo cakwe. Mpeeke Kaini wakashimba kubukali. 6Mpeeke Mwaami Lesa wakeepusha Kaini ayi, “Ino wakalalanshi? Ino ciwa citooboneka buyani kushundumana? 7Necalinga cakwaamba ayi wacita cintu ciluleme naakwiinga walinga kusangalete. Ono ceebo cakwaamba ayi wacita citaluleme, cibiibi citookupensha mumoyo. Citooyanda kwaamba ayi cikweendeleshe sombi ulyeelete kucikoma.”

8Lyalo Kaini wakaambila mukwabo Abelo ayi, “Tiya mumuunda.” Kabacili mumuunda, Kaini wakabukila mukwabo akumucaya.#Mate 23:35; Luka 11:51; 1 Joni 3:12

9Mwaami Lesa wakeepusha Kaini ayi, “Abelo mukwanu uli kuli?” Lakwe wakakumbula ayi, “Cito! Sa ndime njelete kulama mukwesu.”

10Mpeeke Mwaami Lesa wakamwaambila ayi, “Ino wacitilanshi cintu ciyoosha mbuli ceeci? Nyumfwa! Bulowa bwa mukwanu butoolila kuli ndime kuswa mubulongo ayi mbooshe cishole.#Ebulu 12:24 11Ono bulya washinganwa alimwi tookoonshi kutolelela kulima. Mukwiinga bulongo bwatontola bulowa bwa mukwanu ubo inshi mboyacita anga yalakama mukubutambula ndiwalinga kumucaya. 12Na ukeeleshe kulima shishango, bulongo taaku nceshi bukakukusheewo. Ulaakunoolibo shikwiingooka utacite musena pacishi ca panshi.”

13Lyalo Kaini wakaambila Mwaami Lesa ayi, “Mulandu uyu wakomenesha ngomwampa, inga nshiukoonshi. 14Mutoontanda mucishi cino apameenso anu. Ndaakuba shikwiingooka utacite musena pacishi ca panshi, alimwi uli woonse eshi akancane, ulaakuncaya.”

15Sombi Mwaami Lesa wakakumbula ayi, “Sobwe, na muntu wakucaya, ingayi mulandu wakwe ulaakukomena kwiinda waako mankanda osanwe aobilo mukuboosha cishole.” Aboobo Lesa wakabika cishibilo pali Kaini kutondesha woonse weenga wamukumanya kutamucaya. 16Mpeeke Kaini wakaswa pameenso akwe Lesa akuya mukwikala kumusena wiitwa ayi Nodi nkokwaamba ayi, “Kwiingooka” uyo uli kwicwe lya Edeni.

Lunyungu lwakwe Kaini

17Kaini amukaakwe bakashala mwaana musankwa akumutumba liina lyakwaamba ayi “Enoki”. Kuswawaawo Kaini wakayaka ndabala inene akwiitumba liina lya mwanaakwe musankwa. 18Enoki wakashala mwaana musankwa wiitwa ayi Iladi, uyo wakashala Meujaeli ngowakashala Metushaelo ishi Lameki. 19Lameki wakalinga kukwete mpali, Ada aSila. 20Ada wakashala Jabali uyo wakalinga mushali mukulukulu wa baabo boonse bafuba shifubwa akwikala mumatente. 21Mukwabo musankwa wakalinga Jubali mushali mukulukulu wa baabo boonse baimbi abaabo balisha tulumbu amitoolilo. 22Sila wakashala Tubalikaini uyo wakalinga kupanga shisebensesho kuswa kubulonse alibwe lya sheela shilemulemu. Nankashi yakwe wakalinga Naama.

23Lameki wakaambila bamakaakwe ayi,

“Ada awebo Sila, amunkutike.

Nobamakaangu, amunyumfwe maswi angu.

Ndacaya musankwa ceebo wakanguma,

ndamucaya cikula bwangu uyo ceebo wakancisa.

24Na muntu ucaya Kaini ulyeelete kupekwa

mulandu unene kwiinda waakwe

mankanda osanwe aobilo mukuboosha cishole,

ingayi uyo ucaya ndime ulyeelete kupekwa

mulandu unene kwiinda waangu

mankanda makumi osanwe aobilo alimwi osanwe aobilo mukuboosha cishole.”

Seti aEnoshi

25Adamu wakakumana amukaakwe alimwi, mpeeke mukaakwe wakashala mwaana musankwa uyo ngwaakatumba ayi Seti. Wakaamba ayi, “Lesa wampa umbi mwaana pamusena wakwe Abelo uyo Kaini ngwaakacaya.” 26Seti alakwe wakashala mwaana musankwa akumutumba ayi Enoshi. Kuswawaawo bantu bakatalika kubanda liina lya Mwaami Lesa mukulambila kwabo.

Atualmente Selecionado:

Matalikilo 4: BBBLI

Destaque

Copiar