Génesis 7
7
Nanchaquë yaꞌconpisoꞌ
1Ina quëran Siniorori Noi itapon: “Yaꞌipi ipora yaꞌhuëpisopita aꞌporinaco. Quëmasáchin nohuantërahuëso ninan. Napoaton iporasoꞌ, saꞌanëꞌquën chachin nanchaquë yaꞌconquë huachi. Huiꞌnanpitantaꞌ, saꞌinarë chachin yaꞌcoinaꞌ. 2Chinotamacoso marëꞌ maꞌsharoꞌsa tëpacaiso nipisopitasoꞌ, canchisë quëmapi nisahuaton canchisë sanapi nanchaquë poꞌmoquëꞌ. Yaꞌhuërëꞌ co ina marëꞌ nipisopitasohuëꞌ, aꞌnara quëmapi, aꞌnara sanapi inaíchin poꞌmoquëꞌ. 3Nisha nisha anpiantëhuanoꞌsantaꞌ, nanchaquë poꞌmoquëꞌ. Canchisë huaꞌanën, canchisë sanapinën naꞌantacaiso marëꞌ poꞌmoquëꞌ. 4Canchisë tahuëri quëran ca nohuanto oꞌnanapon. Catapini shonca tahuëri, tashirë chachin oꞌnamiatapon. ¡Inapotato yaꞌipi isoroꞌpaquë acorahuësopita ataꞌhuantarahuë!” itërin.
5Noisoꞌ, yaꞌipi Siniorori camairinso chachin ninin.
6Noi saota pasa piꞌipitasoꞌ, paconi isoroꞌpaꞌ imotërin. 7Naporo inasoꞌ, saꞌinë chachin nanchaquë yaꞌconin. Huiꞌninpitanta saꞌinarë chachin chaꞌëcaiso marëꞌ yaꞌconpi. 8-9Yosë chinotacaso marëꞌ maꞌsharoꞌsa tëpacaiso nipisopitantaꞌ, Noirë chachin catoya catoya nanchaquë yaꞌconpi. Aꞌnara quëmapi, aꞌnara sanapi yaꞌconpi. Co ina marëꞌ nipisopitahuënta yaꞌconpi. Anpiantëhuanoꞌsaꞌ, niohuaratërinsopita, inapitanta inapochachin yaꞌconpi. Yosëri shaꞌhuitërinso chachin nipi.
10Yosëri shaꞌhuitërinso chachin, canchisë tahuëri quëran paconi isoroꞌpaꞌ imotarin huachi. 11Naporoꞌ Noisoꞌ, saota pasa piꞌi, cato yoqui, shonca canchisë tahuëritarin. Naporo chachin isoroꞌpaꞌ huëncharoatë pochin ninin. Marënta acoporo yaꞌhuërinsoꞌ, pipimiatërin. Naporahuaton inapaquëntaꞌ, iꞌ yaꞌcopinamën yaꞌhuërinso niiꞌsoatërin. Napohuachina, paꞌpi iꞌ isoroꞌpaquë anotimarin. 12Catapini shonca tahuëri tashirë chachin isoroꞌpaquë oꞌnamiatarin huachi. 13Naporo tahuëri chachin Noi saꞌinë nanchaquë yaꞌconin. Huiꞌninpitantaꞌ, Simo, Camo, Cahuito, inapitanta saꞌinarëꞌ saꞌinarëꞌ yaꞌconpi. 14Tananquë maꞌsharoꞌsa yaꞌhuërinsopita, pëꞌtahuaroꞌsa nipisopita, niohuaratërinsopita, anpiantëhuanoꞌsaꞌ, inapitanta yaꞌconpi. 15Yosë nohuanton, maꞌsharoꞌsa catoya catoya nanchaquë yaꞌconpi. 16Nisha nisha nipisopita quëran, aꞌnara quëmapi, aꞌnara sanapi yaꞌconpi. Yosëri Noi camairinso chachin nipi. Nani yaꞌconpachinara, Siniorori chachin nancha yaꞌcoananën oncorapirin huachi.
Pacon paꞌninsoꞌ
17Catapini shonca tahuëri oꞌnanárin. Pamatohuachina, nanchaso noꞌpa quëran yanponin huachi. 18Pamasoꞌ aquëtë chachin mëntaintararin, nanchaso nipirinhuëꞌ, noya yanponarin. 19-20Paꞌpi pacon paꞌsahuaton, ina inápa motopiroꞌsa quëran huarëꞌ imotërin. Inapita motopiroꞌsa imotahuaton, canchisë mitro aquëtë pantarin. 21-22Naporoꞌ yaꞌipi piyapiroꞌsa isoroꞌpaquë yaꞌhuëpisopita, taquiitopi. Anpiantëhuanoꞌsaꞌ, pëꞌtahuaroꞌsaꞌ, tananquë maꞌsharoꞌsa yaꞌhuërinsoꞌ, niohuaratërinsopita, inapitanta taꞌhuantopi. Yaꞌipi nii oꞌhuatona nanpipisopita, taquiitopi huachi. 23Noisáchin chaꞌërin. Panca nanchaquë yaꞌconpisopitarëꞌ, chaꞌërin. Aꞌnapitaso nipirinhuëꞌ, yaꞌipi taꞌhuantopi. Pëꞌtahuaroꞌsaꞌ, anpiantëhuanoꞌsaꞌ, niohuaratërinsopita, inapitanta yaꞌipi taquiitopi huachi. 24Pasa aꞌnatërápo shonca tahuëri isoroꞌpaꞌ iiri imotaton, napotërin.
Atualmente Selecionado:
Génesis 7: cbt
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2011, Wycliffe Bible Translators, Inc. All rights reserved.
