Génesis 12

Piyapinënpita shimashonën nicacaso marëꞌ Yosëri Apran acorinsoꞌ

1Aꞌna tahuëri Siniorori Apran itapon: “Yaꞌhuëran quëran pipimiatëquëꞌ. Quëmopinënpita, tataparin yaꞌhuërinso noꞌpaꞌ, inapita patëquëꞌ. Aꞌna noꞌpaꞌ carinquën aꞌnotaranquën. Inaquë yaꞌhuëconquë huachi. 2Aꞌna tahuëri ca nohuanto, shiparinpita panca nacion ocoiaponaꞌ. Carinquën catahuamiataranquën. Inapotaranquën niꞌton, sacóshin nahuinaran. Naporahuaton, quëmá quëran aꞌnapitanta catahuararahuë. 3Inpitasona noya nicatënën catahuahuachinën, carinta inapita inapotarahuë. Inpitasona co huachi noya yaꞌhuëcamaso marëhuëꞌ shaꞌhuitohuachinën, carinta inapita napotarahuë. Quëmá quëran, yaꞌipi piyapiꞌsa nisha nisha nipisopita catahuararahuë,” itërin.

4-6Apranso Yosëri shaꞌhuitërinso chachin, Aran ninano quëran pipirin. Canaan parti paacaiso marëꞌ pipirin. Canchisë shonca aꞌnatërápo piꞌipitaso napoarin. Saꞌinë chachin paꞌnin. Saꞌinsoꞌ, Sarai itopi. Apin Noto itopisontaꞌ, quëparin. Yaꞌipi maꞌshanënapitarë chachin paꞌpi. Piyapinënapitanta quëmapiꞌsaꞌ, sanapiꞌsa asacatacaiso marëꞌ Aranquë paꞌanpisoꞌ, quëpapi. Yaꞌipi quiquipi. Canaan parti canconpachinara, Apranso piyapinënpitarë chachin yaꞌipi ina noꞌpaꞌ paꞌtatonaꞌ, pëntontopi. Siquimo ninanoquë huarëꞌ canconpi. Inaquë panca insina nara yaꞌhuërin. Yaꞌhuëhuanoꞌsa mamanshinëna moshapiquë niꞌton: “Mori insina,” itopi. Ina parti naporo cananoꞌsa yaꞌhuëapi. 7Inaquë Siniorori, Apran yaꞌnotahuaton, itërin: “Yaꞌipi iso noꞌpaꞌ, shiparinpita quëtarahuë huaꞌanëntaponaꞌ,” itërin. Naporo chachin Apran Sinioro chinotacaso marëꞌ aꞌnara artaro ninin. Inaquë yaꞌnotërin niꞌton, chinotërin.

8Ina quëran motopiroꞌsa parti paꞌpi. Ina motopiroꞌsasoꞌ, Pitiri ninano quëran, piꞌi pipirinso parti quëparitërin. Inaquë nëꞌmëtë pëiroꞌsa otënpi yaꞌhuëcaiso marëꞌ. Pitiri ninanosoꞌ, piꞌi yaꞌconinso parti acorahuatonaꞌ, Ai ninanontaꞌ, piꞌi pipirinso parti acopi. Ina huancánachin yaꞌhuëipi. Inaquë naquëranchin Apran Sinioro chinotacaso marëꞌ aꞌna yaꞌhuërëꞌ artaro niantarin. 9Ina piquëran Apran piyapinënpitarë chachin paantapi. Oshaquëran paꞌsápatonaꞌ, Niquipi parti canconpi.

Apran Iquipitoquë paꞌninsoꞌ

10Naporo tahuëriꞌsa ina parti panca tanarotopi. Napoaton Apran piyapinënpitarë chachin Iquipito parti yacapatacaiso marëꞌ paꞌpi. Yaꞌhuëpiquë co manta capacaiso yaꞌhuërinhuëꞌ niꞌton, inatohua paꞌpi. 11Iquipito noꞌpaquë yaꞌcaritohuachina Apransoꞌ, Sarai itapon: “Niꞌquëꞌ, quëmaso tëhuënchachin noyápiroyanchinquën. 12Iquipitoroꞌsa niꞌpachinën noyaponën nimara: ‘Isoso quëmapi, paso sanapi soꞌin,’ taꞌtonaꞌ, caso tëpaponaco. Quëmaso nipirinhuëꞌ, macainënquënso marëꞌ co tëpaponënhuëꞌ. 13Napoaton ama quëma naꞌin quëran tëpainacoso marëhuëꞌ: ‘Isoso yoꞌyohuë,’ tëquëꞌ, topirahuë,” itërin.

14Iquipito noꞌpaquë Apran camahuachina, Iquipitoroꞌsaso Sarai niꞌsahuatonaꞌ, paꞌyatopi: “Ma noyápiroyanchincha paya,” topi. 15Iquipito copirnosoꞌ, “huaraon” itopi. Ina catahuapisopita huaꞌanoꞌsantaꞌ, Sarai niꞌpi. Niꞌsahuatonaꞌ, noyápiroyanchin nininso huaꞌanëna shaꞌhuitonpi. Natanahuaton huaraonsoꞌ: “Quëshico,” tënin. Napoaton Saraisoꞌ, ina pëinënquë quëpapi. 16Sarai marëꞌ huaraonsoꞌ, Apran paꞌpi payarin. Nani maꞌsha topinan quëtërin. Ohuicaroꞌsaꞌ, ohuacaroꞌsaꞌ, camiyoroꞌsaꞌ, moraroꞌsaꞌ, inapita quëtërin. Naporahuaton piyapinënpita camaicaso marëꞌ quëmapiꞌsaꞌ, sanapiꞌsaꞌ, quëtërin.

17Napoaponahuëꞌ, Sarai naꞌinin niꞌton, Yosëri huaraon anaꞌintërin. Saꞌin, huiꞌninpitarë chachin chiníquën canio quëran anaꞌintërin. 18Napoaton Apran amataton, itapon: “¿Onpoatonta napotëranco? ¡Iso sanapi saꞌan nipirinhuëꞌ, shaꞌhuichitonco pora! 19‘Oshihuë’ tënanso marëꞌ, cari shimanahuë. ¡Maꞌtana saꞌan, macaton quëpaquë huachi!” itërin. 20Napotahuaton piyapinënpita camairin: “¡Apran, saꞌinë chachin ocoico paꞌin. Maꞌshanënpitanta quëpaꞌin!” itërin.

Atualmente Selecionado:

Génesis 12: cbt

Destaque

Copiar