Gén 3

Adán lhäy'e Eva iwohiyet'a m'ak tä Dios ifwenho

1Amlhätaj lhäy'e lhip tä akantsaj, inu'pe itshätäy iyhäj tä Lhawuk Dios lhenhay.#Apoc 12.9; 20.1-3 Wet lham tay'ätshane atsinha wet yok:

–¿Hä matche tä Dios n'äyej amho lhay nilhokej hal'äy tä ihi yachuyajw'et?

2Atsinha nichulho wet yok:

–Kha, ne'tek olhamel otufw t'at lhay hal'ä chik häpe. 3Tajlhama hal'ä tä ihi lechowej yachuyajw'etna, häp tä yok, “Yej letufwa lhay, wok letsok, tsi chik letufw let'inhihena.”

4Mat amlhätaj tahuyej atsinha wet yok:

–Mathichet'a, tek let'inhenla. 5Dios ihanej t'at, chik amel letufw lhay häp hal'ätso, hätehlat iwoyek tafwoche'pe atey, letäfwenhiyeja m'ak tä is lhäy'e m'ak tä ni'isa wet amälhhiyejat iwoye lham Dios.

6Wet tä atsinha hiw'en tä lhäy'e lhip tä isilataj lhay häp hal'ätso, wet lechuyajek tufw, wet äp t'uhläk letäfwnhayaj ihi, wet ilanhi elh lhay wet tufw. Wet äp hiw'enho lech'efwa wet häte lham tufw. 7Häpet tä mälhyejtso, wet hätet iwoye tä tafwoche'pe tatey, wet nech'e lhamel lhaiw'en tä ts'ilakchehen. Tä mälhyejtso, lhamel itsekwek higo w'oley wet hip'oyejche letape.

8Tä honaj lhamel ilätlä Lhawuk Dios tä ilunche yachuyajw'et, wet lhamel weskatch'oye, y'uyho hal'äy. 9Mat Lhawuk Dios t'änch'oye hin'o wet yok:

–¿Chi tä lhehi?

10Hin'o nichulho wet yok:

–Tä olät ahilä tä lelunche yachuyajw'et, wuj tä onoway tsi ots'ilakche. Häp tä tamenej tä oweskat hach'oye.

11Dios tay'ätshane wet yok:

–¿Atsi tä ifwel amho tä ats'ilakche? ¿Hä letufw hal'ä lhaynaj on'äyej amho tä oyok, “Yej letufwa”?

12Hin'o nichulho wet yok:

–Atsinhanaj lew'en n'oho tä lhen ot'unfwaya, häp tä hiw'en n'oho lhaytso, wet otufw.

13Tä mälhyejtso, Lhawuk Dios tay'ätshane atsinha wet yok:

–¿Chipte tä lewoye täjtso?

Atsinha nichulho wet yok:

–Amlhätaj tä ikan n'oyej, häp tä tamenej tä otufw hal'ä lhaytso.#2~Cor 11.3; 1~Tim 2.14

14Wet Lhawuk Dios tahuyej amlhätaj wet yok:

–M'ak tä lewoye tamenla amej tä awit'äyhyaj i'amej tä lhewej itshätäy iyhäj. Tälhe fwalana aletonhichelat honhat tä lhek, wet äp letufwlat honhat. 15Oyenla atayhfwaya atsinha wet lham atsinha ayenla letayhfwaya, häte iwoye ales lhäy'e atsinha leles. Atsinha leles hip'ajthihila etek wet am lhokwajila lesät.

16Wet nech'e Lhawuk Dios tahuyej atsinha wet yok:

–Oy'isiyeja lhip ateläythayajay chik lewo alesa, wet lhäy'ehila lhip chik äytaj. Mat tej chik mälhyejtso, mat hin'o leyi aitonhiyela hach'efwa wet lhayenla awukwa.

17Wet nech'e tahuyej hin'o wet yok:

–Tä lewoye lhämet hach'efwa wet letufw hal'ä lhaynaj oyok, “Yej letufwa”, athana letamenej honhat tä lewit'äyhyaj ihi t'at. Nilhokej ifwalas tä leläy, äytajila achumet häpkhilek iche m'ak chik letufw. 18Wet honhat tä lhenlhi tajlhamhiyelat ch'uthanil lhäy'e hon'al tä yelaj tä tälho, wet letufwla lhay tä iche tayhi. 19Chufw ailänla wet nech'ehilak lew'en äk, pajla'tha lhäpnho t'at honhatnaj letälho tä oayenlhi. Tsi ahonhat t'at wet lewelanla honhata.

20Wet Adán#3.20 Häp n'olhey Adán yok, Hin'o. yen lheya Eva häp lech'efwa, tsi nilhokej wichi lako t'at.#3.20 Häp n'olhey Eva yiwitej n'olhämet p'ante yok, N'ow'atshancheyaj. 21Wet Lhawuk Dios yenlhi lew'uyis tä itshäwet t'ähes yämthilek hin'o lhäy'e lech'efwa yen lew'uya.

22Wet Lhawuk Dios yok:

–Athana hin'o nech'e hätet iwoye n'amel, nitäfwelej m'ak tä is lhäy'e m'ak tä ni'isa. Isit'ak tachumhiyela lhay tä ihi hal'ä tä n'ow'atshancheyaj wet tufw wet iläy yämlek tiyäj'attsiy.#Apoc 22.14

23Häp tä tamenej tä Lhawuk Dios itiyej kanhihlä yachuyajw'et tä Edén, wet ne'tek tachumlhi tä ihi honhat tä lhip t'at tä õyenlhi. 24Wet nech'e itihi m'ayhay tä lhafwis ihi häp yachuyajw'et lhip tä tumej hichä, lhäy'e n'ofwajnhat tä lak'e tä ilunhi t'at honhattso, yämthilek nehit katsik nichäte hal'ä tä n'ow'atshancheyaj tä ihi.

Atualmente Selecionado:

Gén 3: WCHB

Destaque

Copiar