Gén 29

Ri Jacob xapon pan Harán

1Xuchop chik k'a el bey ri Jacob y xapon pa kiruwach'ulew ri ek'o pa relebel-q'ij.

2Y xutz'et k'a apo jun pozo pa juyu' y chiri' ek'o e oxi' tzobaj karne'l e uxlawineq, roma chupan ri pozo ri' ye'uk'ya-wi konojel awej. Y ri pozo ri' rik'in jun nim abej tz'apel kan ruwi'. 3Chiri' nikimol-wi-ki' konojel tzobaj karne'l y toq xkimol yan ki', konojel ri yuq'unela' nikelesaj-el ri rutz'apebal-ruwi' y toq ye'uk'ya-el nitz'apex chik kan jun bey ruwi' ri pozo. 4Y ri Jacob xubij k'a chike ri yuq'unela': ¿Ix aj akuchi k'a rix?, xcha'.

Y rije' xkibij: Roj oj aj wawe' pa tinamit Harán, xecha'.

5K'ari' xubij chik chike: ¿Iwetaman ruwech ri Labán ruk'ajol kan ri Nacor?, xcha'.

Y rije' xkibij: Ja', qetaman ruwech, xecha'.

6Y rija' xubij chik apo chike: ¿utz kami ruwech?, xcha'.

Y ri yuq'unela' xkibij, utz ruwech. Ja jun rumi'al, la peteneq kik'in rukarne'l y rubini'an Raquel, xecha' chire.

7Y ri Jacob xubij chike: K'a janila ruloman richin ye'ikusaj yan kan la awej pa qejoj. ¿Achike roma man niya' ta chik juba' kiya', y ye'ik'uaj chik el juba' richin ye'iyuq'uj?, xcha' chike.

8Y rije' xkibij: Man yojtikir ta, roma k'o chi xtikimol na ki' konojel tzobaj awej, richin junan ye'uk'ya' y ri yuq'unela' nikelesaj ri rutz'apebal-ruwi' ri pozo, xecha'.

9Rokik ri Jacob nitzijon kik'in ri yuq'unela', jari' toq xapon ri Raquel e ruk'uan-el rukarne'l ri rutata', roma kan ja rija' ri yuq'unel. 10Toq ri Jacob xutz'et chi ri Raquel ruk'uan-el ri rukarne'l junanin xbe richin xberelesaj ri tz'apebel-ruwi' ri pozo y xuya' kiya' ri karne'l. 11Ri Jacob xuq'ejela' k'a ri Raquel y xutz'ubaj, k'ari' janila xoq'. 12Y xubij chire: Yin in ral ri Rebeca rana' ri atata', xcha'. Y ri Raquel junanin xbe richin xberuya' rutzijol chire ri rutata'.

13Toq ri Labán xrak'axaj chi xapon ri ruch'utik'ajol, junanin xberuk'ulu', xuq'etej y xutz'ubaj y xuk'uaj pa rachoch. Y ri Jacob xutzijoj chire ri Labán ronojel ri xuk'uluwachij. 14Y ri Labán xubij chire: Roj oj ka'i' kan junan qabanik, q'alaj chi kan qach'alal-qi' y junan qakik'el, xcha'.

Ri Jacob xsamej koma ri Raquel y ri Lea

Y ri Jacob xk'oje' kik'in jun ik'. 15K'ari' ri Labán xubij chire: Man ruk'amon ta yinawilij chaq keri', stape' at nuch'utik'ajol; tabij chuwe janipe' nawajo' nach'ek, xcha' chire.

16Ri Labán ek'o e ka'i' rumi'al: Ri nimalaxel rubini'an Lea, y ri chaq'laxel rubini'an Raquel. 17Y ri Lea kan man junan ta k'a rik'in ri Raquel, roma ri Lea kan e jun wi ri runaq' taq ruwech y ri Raquel chijun ri rubanik jebejoj ok. 18Y ri Jacob kan xbe ránima chirij ri Raquel roma janila jebel ok y xubij chire ri Labán: Xkatinwilij k'a wuqu' juna' roma la chaq'laxel ami'al, xcha'.

19Y ri Labán xubij: Más utz ninya' chawe rat pa ruk'exel ninya' chire jun chik. Kak'oje' k'a wawe' qik'in, xcha'.

20Y keri' ri Jacob xsamej k'a wuqu' juna' roma ri Raquel, jak'a chuwech rija' man k'iy ta juna' xsamej, roma janila nrajo'. 21K'ari' ri Jacob xubij chire ri Labán ri ruch'utitata': Xtz'aqet yan ri juna' richin xisamej awik'in. Taya' k'a chuwe ri Raquel richin yik'ule' rik'in, xcha'. 22Y ri Labán xerumol k'a konojel ri winaqi' ri ek'o chupan ri tinamit ri' y xuben jun nimaq'ij roma ri k'ulubik. 23Y xbanatej k'a chi chupan ri aq'a' ri', ri Labán ja ri Lea, ri rumi'al nimalaxel ri xujech-el chire ri Jacob; y ri Jacob kan xk'oje' rik'in. 24Y ri Labán xusipaj k'a ri rusamajel rubini'an Zilpá chire ri Lea richin nrilij. 25Toq xseqer-pe jari' toq xunabej ri Jacob chi xa rik'in ajk'a ri Lea xk'oje-wi, y k'ari' xubij chire ri Labán: ¿Achike k'a ri xaben chuwe? Yin xatinwilij roma ri Raquel. ¿Achike roma xinaq'ol?, xcha'.

26K'ari' ri Labán xubij chire: Wawe' pa qatinamit roj, kan ja ri nimalaxel k'o chi nik'ule' nabey y man ja ta ri chaq'laxel nik'ule' nabey chuwech ri nimalaxel. 27Tak'isa' re wuqu' q'ij rik'in ri Lea y xtinya' chik chawe ri Raquel, xaxe k'o chi xkinawilij na wuqu' chik juna', xcha' ri Labán chire.

28Keri' k'a xuben ri Jacob y toq xtz'aqet ri wuqu' q'ij tik'oje' rik'in ri Lea, ri Labán xuya-el ri Raquel chire richin xok chuqa' rixjayil.

29Y ri Labán chuqa' xusipaj k'a ri rusamajel rubini'an Bilhá chire ri Raquel richin nrilij. 30Y ri Jacob xk'oje' rik'in ri Raquel y kan más k'a xrajo' chuwech ri Lea, stape' xrilij na ri Labán wuqu' chik juna'.

Ri e ralk'ual ri Jacob

31Y ri Jehová xutz'et chi ri Lea man kan ta chik najowex, roma ri' xuben chire chi yek'oje' ral; jak'a ri Raquel man alanel ta. 32Y ri Lea kan xyawej k'a kan chirij ak'ual y toq xk'oje' ri ak'ual xubini'aj Rubén. Y re bi'aj re' nel chi tzij titz'eta'. Y chuqa' xubij: Ri Jehová xutz'et chi yin janila xibison, y roma ri' xk'oje' re ti wal re', y wakami kan xkinajowex roma ri wachijil, xcha'. 33Y rija' xyawej chik kan jun bey y toq xk'oje' ri ak'ual xubini'aj Simeón. Y re bi'aj re' nel chi tzij nrak'axaj, y chuqa' xubij: Ri Jehová kan xirak'axaj chi yin man kan ta yinajowex. Roma ri' xuya' chik pe jun ti wal, xcha'. 34Y ri Lea xyawej chik k'a kan jun bey y toq xk'oje' ri ak'ual xubini'aj Leví. Y re bi'aj re' nel chi tzij naqaj. Y chuqa' xubij: Ri wachijil kan más k'a xtijel-pe wik'in roma xe'alex yan e oxi' ralk'ual wik'in, xcha' 35Y toq ri Lea xyawej pa rukaj mul, ri ak'ual ri xalex xubini'aj Judá. Y re bi'aj re' nel chi tzij xtinya' ruq'ij. Y chuqa' xubij: Wakami xtinya' ruq'ij ri Jehová, xcha'. Y rija' xtane' chi alanik.

Atualmente Selecionado:

Gén 29: KQC

Destaque

Copiar