Gén 10
10
Ri e kijatzul kan ri e ralk'ual ri Noé
1Wawe' k'a e tz'ibatel-wi kan ri kibi' ri e rijatzul kan ri Noé: Ri Sem, ri Cam y ri Jafet. Rije' xek'oje' e k'iy kalk'ual toq xq'ax yan ri ya' ri xmuqun ri ruwach'ulew.
2Ri e rijatzul ri Jafet ja ri Gómer, ri Magog, ri Madai, ri Javán, ri Tubal, ri Mésec y ri Tirás. 3Y ri e rijatzul ri Gómer ja ri Asquenaz, ri Rifat y ri Togarmá. 4Ri e rijatzul ri Javán jari' ri Elisá, ri Tarsis, ri Quitim y ri Rodanim. 5Jare' ri e rijatzul ri Jafet ri xebek'oje' pa taq taq'aj chuchi' ri palou ri k'o chiri', y xkik'uaj k'a ki' pa taq tzobaj, chi kach'alal-ki', ri junan kich'abel y junan ruwach'ulew ri xkiq'atapula'.
6Ri e rijatzul ri Cam, ja ri Cus, ri Misraim, ri Fut y ri Canaán. 7Y ri e rijatzul ri Cus ja ri Sebá, ri Havilá, ri Sabtá, ri Raamá y ri Sabtecá. Ri e rijatzul ri Raamá ja ri Sebá y ri Dedán. 8Y ri Cus xralk'ualaj jun ruk'ajol y xubini'aj Nimrod. Jare' ri nabey achin ri xpa'e' pa kiwi' ri tinamit. 9Y ri Nimrod xok jun nimalej kanonel chuwech ri Jehová, y roma ri' toq k'o jun utzilej kanonel nibix: Rija' kan nimalej kanonel chuwech ri Jehová achi'el ri Nimrod, yecha' k'a ri winaqi'. 10Ri e nabey nima'q taq tinamit ri xek'oje' toq ja rija' ri q'atoy-tzij: Ja ri Babel, ri Érec, ri Acad y ri Calné, ri chiri' pa ruwach'ulew Sinar. 11Y xel k'a el chiri' y xbe pa jun ruwach'ulew ri rubini'an Asiria re wakami. Y ja rija' ri xepaban-q'anej ri tinamit Nínive, ri Rehobot-ir, ri Quélah, 12y ri tinamit Resen, chikikojol ri Nínive y ri Quélah k'o-wi; y re' jun nimalej tinamit.
13Ri Misraim xeralk'ualaj ri Lud, ri Anam, ri Lehab, ri Naftu, 14Ri Patrus, ri Caslu, chiri' e peteneq-wi ri aj-Filistea y ri rijatzul ri Caftor.
15Ri Canaán xeralk'ualaj e ka'i' ruk'ajol; ri nabey xubini'aj Sidón y ri ruka'n ja ri Het. 16Y xek'oje' ch'aqa' chik ralk'ual y xkibini'aj Jebús, ri Hamor, ri Gérges, 17ri Hev, ri Arac, ri Sin, 18ri Arfad, ri Semar y ri Hamat; jari' ri e te'ej-tata'aj kichin ri e rijatzul ri Canaán. Y toq xbiyin ri q'ij, re winaqi' re' xkitalula-el-ki'. 19Y ri kiruwach'ulew ri e rijatzul ri Canaán nitiker-el rik'in ri tinamit Sidón, choj napon rik'in ri tinamit Gaza napon k'a rik'in ri tinamit Guerar; y nuchojmij-ri' kik'in ri tinamit Sodoma, ri Gomorra, ri Admá, ri Seboím y nibek'is rik'in ri tinamit Lesa. 20Konojel re' jare' ri e ralk'ual ri Cam, xkik'uaj-ki' pa taq tzobaj, chi kach'alal-ki', ri junan kich'abel y junan ruwach'ulew ri xkiq'atapuj.
21Ri Sem ja rija' ri nimalaxel chuwech ri Jafet, y chuqa' xek'oje' ralk'ual. Y qonojel roj, re ojk'o re q'ij re', ri oj rijatzul ri Heber, chuqa' oj eleneq-pe rik'in ri Sem. 22Ri e rijatzul ri Sem, ja ri Elam, ri Asur, ri Arfaxad, ri jun ri xubini'aj chuqa' Lud y ri Aram. 23Y ri e rijatzul ri Aram jari' ri Us, ri Hul, ri Guéter, y ri Mas. 24Ri Arfaxad xralk'ualaj ri Sélah y ri Sélah xralk'ualaj ri Éber. 25K'ari' ri Éber xek'oje' e ka'i' ruk'ajol. Jun chike rije' rubini'an Péleg,*f10* y chupan ri q'ij ri' xetalutej ri winaqi' chuwech re ruwach'ulew. Y ri rach'alal ri Péleg rubini'an Joctán. 26Ri Joctán xeralk'ualaj ri Almodad, ri Sélef, ri Hasar-mávet y ri Jérah, 27ri Hadoram, ri Uzal, ri Diclá, 28ri Obal, ri Abimael, ri Sebá, 29ri Ofir, ri Havilá y ri Jobab; ja konojel re' ri e ralk'ual ri Joctán. 30Y ri kiruwach'ulew rije' nitiker-pe rik'in ri Mesá y napon-el k'a pa taq'aj chiri' pa Sefar, ri k'o-el k'a pa ruwi' taq juyu', ri pa relebel-q'ij. 31Konojel re' jare' ri e ralk'ual ri Sem, xkik'uaj-ki' pa taq tzobaj, chi kach'alal-ki', ri junan kich'abel y junan ri kiruwach'ulew ri xkiq'atapuj.
32Ja konojel k'a tzobaj re' ri e kijatzul ri ruk'ajol ri Noé, xkik'uala-ki' chi kach'alal-ki', xkik'uala-ki' chi kiwinaq-ki'. Ja winaqi' k'a re' ri xkitaluj-ki' chuwech re ruwach'ulew toq xq'ax yan ri ya' ri xmuqun richin ri ruwach'ulew.
Atualmente Selecionado:
Gén 10: KQC
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
Kaqchikel Bible © Bible Society in Guatemala, 2003.
