Marako 14

1 # Mat 26:1-5; Luk 22:1-2. Kosodi esalito apaarasia aarei eroko epucit loka Aleleŋ ka imugatin lumam itubuunitoi kedolo: komoata lusasedotin lupeti ka ikewadikak epone lokikamunet kapirianut, ka aiar ŋes, #Any 12:1-27. 2Naarai kobalas ebe, “Mere toma apak naka epucit, kinye diat ecelet ajaun otuŋa.”

3 # Mat 26:6-13; Yok 12:1-8. Nakejaar ŋesi Betaniya togo loka Simon lokatapon, iboie enyami, kobu aberu nakejai ekube loka akinyet naelai naka etiai loepol naeuru maa: kobwaŋ ekube, kobukok akouke. #Luk 7:37-38. 4Konye kojaas ice lukenyunyuras, kotemanaros atiar, “Kanukinyo emadiŋikinor akinyet kopone kaŋol? 5Naarai tikepedor agwelar akinyet ŋin adenarin akwat auni ka aitedepar da, kokoranakinai lukican.” Kitorona ya. 6Konye kotema Yesu atiar, “Kinyekisi; kanukinyo itiyaloŋoŋooto ŋes? Keswamak eoŋ aswam naejok. 7#Ikis 15:11. Naarai apaarasia kere ejaas lukican nepepe kayes, ido naikototor ipedorete aiswamakin kes nuejok: konye eoŋ mam kija kayes apaarasia kere. 8Eswama nuepedorit: ageik ainyonyoikin akakuan akinyet kanuka aidaare. 9Ido abeit katemari yes atiar, Neelimonokinio Akiro Nukajokak kotoma akwapin kere, ŋin naeswama aberu na elimorio akiitunitor ŋes.”

10 # Mat 26:14-16; Luk 22:3-6. Konyou Yuda Isikariot, lokerai ediopet kotomon kaluarei, kolot mama ejaas isasedotin lupeti, tetere ijaikini ŋes mamakec. 11Kosodete nakiirariata, kiyalamikinos, kisumunoto ainakin ŋes arupian. Komo apak naejokiar aijaikin ŋes mamakec.

12 # Mat 26:17-19; Luk 22:7-13. Kapaaran nasodit naka imugatin lumam itubuunitoi, naearere lukaleleŋ, kotemasi ikekesisiak ŋes atiar, “Ai bo ikoto kaloto ketemokis konyamak lukaleleŋ?” 13Kiyakia iarei kokesisiakake kotema kes atiar, “Koloto ore, iriamunos yesi ketuŋanan loibwokit amot naka akipi: kotupasi ŋes. 14#Mk 11:3. Kere neelomari, kolimokis elopet etogo ebe, ‘Ebala Ekesisianakinan ebe, Ani bo akagola nakipejok, neanyamakini lukaleleŋ nepepe kikakesisiak?’ 15Kitodikini ŋesi yes agola naepol nakokuiu epesitai itemokino: kitemonokis nen kanuwok.” 16Konyout ikekesisiak, koloto ore, kodumut kwape kelimokinitor: kitemokis lukaleleŋ.

17 # Mat 26:20-29; Luk 22:14-23; Yok 13:21-26. Nakimukoki akwap kobu nepepe kalutomon kaluarei. 18#Sab 41:9. Napiboiete enyamete, kotema Yesu atiar, “Abeit katemari yes atiar, ediopet kayesi lokimori keoŋ kabilakini nat ebotet.” 19Kogeut akadakin, kotemanasi ediopet ediopet atiar, “Eoŋ ca nat ya?” 20Kotema kes atiar, “Ediopet kotomon kaluarei, lokicunyi keoŋ atibo, 21Naarai elosi Okoku loka etuŋanan kwape kiwadikatere kanukeŋ; konye itukwi, etuŋanan ŋol loebilakini Okoku loka etuŋanan ebotet! Tiejok kama ketuŋanan kaŋol arai mam kewuruunitai.”

22 # 1 Kor 11:23-25. Napenyamete, kolem emugati, kedau aisirereŋ, kobilibil, koinak kes, kotema atiar, “Kolemutu: lo ŋes akakuan.” 23Kolem akoli da, kedau aimal, koinak kes; komatata kere, 24#Any 24:8; Yer 31:31-34; Sek 9:11. Kotema kes atiar, “Nu kes akaokot nuka aitutuket, nuebukoros kanuka ikepuak. 25Abeit katemari yes atiar, Mam amasi bobo cut nuka araito naka emusabibu, kiton apaaran ya naamasia nukitetiak kotoma ajakanut naka Edeke.”

26 # Mat 26:30-35; Luk 22:31-34,39. Nakedauniata ayoore ekosio, koloto moru loka Iseitunin. #Sab 113–118. 27#Sek 13:7. Kobala Yesu kes ebe, “Iguikinos yesi kere: naarai iwadikatai ebe, ‘Ebuŋai rwaru ekecokon, isiarakinos amerekekin.’ 28#Mat 28:16; Mk 16:7. Konye kadau ajarun, keŋarenikinete yes alosit Galilaya.” 29Konye kotema Petero ŋes atiar, “Karaida kiguikinos kere, konye eoŋ mam.” 30#Yok 13:38. Kotema Yesu ŋes atiar, “Abeit katemari jo atiar, Lolo akuare na, eriŋa ekokor eruikino irwan aarei, kiŋeri eoŋ irwan auni.” 31#Yok 11:16. Konye kiyatak ŋesi noi kobala ebe, “Karaida kebusakinit atwanare kajo, mam kaŋeri jo cut.” Luce da kere kinerata kwape kwaŋin,

32 # Mat 26:36-46; Luk 22:40-46. Kodolokis aibois ekekiror Getesemane; kobala ŋesi ikekesisiak ebe, “Kiboikinos ne, kelipi ber eoŋ.” #Yok 18:1. 33Koyaŋa Petero ka Yakob ka Yokana nepepe kaŋes, kogeu ainoŋanakin noi ka aburun. 34#Yok 12:27; Sab 43:5. Kotema kes atiar, “Itururwei noi ekatau aapiar atwanare: kosalata yesi ne, kokwenyete.” 35Kikunyak nediokasilon, kibiror ebuburia, kilip ebe arai kepedoros kinac esawa ŋol. 36#Mk 10:38. Kobala ebe, “Aba, Papa, kere epedoros kamakon: kolemarai akoli na: konye mere nuakoto eoŋ, dimarai nuikoto ijo.” 37Koboŋ, kodum kes ejotoete, kotema ŋesi Petero atiar, “Simon, ijotoi ca ijo? Mam ipedori aikweny esawa ediopet? 38Kokwenya kilipa, kinyeis alomar acodunio; ekoto bo emoyo, konye ekalanyana akuan.” 39Kikunya bobo, kilip, kinera akiro kwapekwa, 40Koboŋ bobo, kodum kes ejotoete, naarai eluranaros ajo; mam apotu kojenut nueboŋokinete ŋes, 41Koboŋ bo bo nakiwuniet, kotema kes atiar, “Iroko kereka ijotoete, iyeŋito? Aso do; adolu esawa; koany, einakinio Okoku loka etuŋanan akanin nuka ikadiakanarak, 42#Yok 14:31. Konyoutu, kaloto; koany, eapie lokabilaki eb otet.”

43 # Mat 26:47-58; Luk 22:47-55; Yok 18:2-18. Atipet napinera, kodolu Yuda, edioper kotomon kaluarei, koupas kekodet lokejaas ikileŋa ka ibelai, epote kama ejaas isasedotin lupeti ka ikewadikak ka imakio. 44Koinakinite kes lokebilakini ŋes ebotet aanyunet, kobala ebe, “Loanui eoŋ, ŋes ŋol; kikamutu ŋes, koyaŋaasi ikokito.” 45Napekedolu, atipet kolot mama ejai Yesu, kobala ebe, “Rabi”; konu noi. 46Koriosi akecekanin, kikamut ŋes. 47Konye ediopet kakesi lukebwoete eapie, kout ekekileŋ, kinom ebulesit loka esasedoti lopeti, kojepa akekit. 48Koboŋok Yesu kotema kes atiar, “Ilomut teni yesi kikileŋa ka ibelai aikamun eoŋ, bala ekaŋatan? 49#Luk 19:47; 21:37. Ajaenena kayes ŋinipaaran toma oyekalu, esisianakini, komam kikamunete; konye ajaut nu tetere edolete Nukiwadikatai.” 50Kosodete kojalakis ŋes kere, kokerata.

51Kotupa etelepat ediopet, lokijelokinit egoe lokebaputa bon. Kikamut ŋes, 52Konye kinyek egoe lokebaputa, koker imujalal.

53Koyaŋaasi Yesu mama ejai losasedoti lopeti; kotukonokinotor isasedotin lupeti kere ka imakio ka ikewadikak da. 54Petero da kotupite kama elwana, kiton toma alaro naka losasedoti lopeti; kiboiete nepepe kikejaanakinak, ipieri akim. 55#Mat 26:59-68; Luk 22:63-71; Yok 18:19-24. Komoata isasedotin lupeti ka aurianet kere ikajenak aluikin Yesu, tetere earete; mam edumuna. 56Naarai apotu luipu kitejenut nukaiŋal, konye mam emorikikina akeceitejenun. 57Kobwaata ice, kitejenut nukaiŋal, kobalas ebe, 58#Yok 2:19; 4:21,23. “Kipou isio keirasi ŋes ebala ebe, ‘Akesi eoŋ eyekalu lo lokedukio kakanin, adukuni ece kotoma apaarasia auni lomam edukio kakanin.’” 59Karaida kwaŋin mam aitejenunikec emorikikina. 60Kobwo losasedoti lopeti kokidiŋ, kiŋit Yesu ebe, “Mam cabo iboŋokini akirot? Anyoika ŋun nuetejenut ŋul aluikin jo?” 61#Mk 15:5; Isa 53:7. Konye ŋes kililiŋ, mam eboŋokino akirot, Kiŋit bobo losasedoti lopeti, kotema atiar, “Irai kereka ijo Kristo, Okoku loka Loituritoi?” 62#Dan 7:13; Sab 110:1. Kotema Yesu atiar, “Eoŋ ŋopeŋol; ido ianyunete rwaru Okoku loka etuŋanan iboie kakan nakoteten nakapedor, eupunos kidouon luka akuj.” 63Kocil losasedoti lopeti ikenapen, kobala ebe, “Inyo bo kipudar bobo ikajenak? 64#Leb 24:16; Yok 19:7. Iirasi ainyanakinike: iwomitos anu?” Kotubokis kere ebe ibusakinit atwanare. 65Kogeut ice aimwaanakin aimul, korapakis akekonyen, kodipidipoto, kobalas ebe, “Komurwo.” Ikejaanakinak da lukeyaŋaarete, kibapanasi ŋes.

66 # Mat 26:69-75; Luk 22:56-62; Yok 18:25-27. Kosodi nakejaar Petero kwap alaro, kobu adiopet kakejaanakinak nuka losasedoti lopeti; 67koany Petero ipieri akim, kosesen ŋes, kobala ebe, “Ijai nan ijo da nepepe ka Enasarayot je Yesu.” 68Konye koŋer, kobala ebe, “Mam ajeni, ido mam apupi nuinera ijo.” Koloma kiŋa kiton neelomarere: koruik ekokor. 69Koany akejaanakinan ya ŋes, kogeu bobo alimokin ŋul lukebwoete kanen ebe, “Erai lo lokec.” 70Konye koŋer bobo. Apak edit bobo kolimokis Petero lukebwoete kanen ebe, “Abeit irai ijo lokec; naarai irai ijo Egalilayat.” 71Konye kogeu eilam ka aiyapo ebe, “Mam eoŋ ajeni etuŋanan ŋol loilimito yesi.” 72#Mk 14:30. Atipet koruik ekokor irwan nakiareit. Kiitu Petero akirot nakelimokini Yesu ŋes ebe, “Eriŋa ekokor keruikino irwan aarei, kiŋeri eoŋ irwan auni.” Komulau eketau, komony.

Atualmente Selecionado:

Marako 14: AOV1961

Destaque

Copiar