Luka 18

1 # Rom 12:12; Kol 4:2; 1 Ses 5:17. Kolimok kes awaragan, aikwenyar ebe ibusakinit kes ailipenen Edeke komam itapalikina. 2Kotema kes atiar, “Kojai kolo ekatubon ore ece, lomam eyonit Edeke, kwabo mam kepodo ituŋa. 3Kojai da apuserut ore ŋol; nakicebokinit abunenen mamake, kobala ebe, ‘Kigaŋai kama kalokasurupika.’ 4Koŋer ber; konye kokau kotema kotauke atiar, ‘Karaida mam ayoŋit Edeke, karaida mam apodo ituŋa, 5#Luk 11:7,8. konye naarai kecebokinit apuserut na, egaŋi ŋes, kenye aitapas eoŋ kanuka arim tiritir neajai.’ ” 6Kotema Ejakait atiar, “Kiirasi nuenera ekatubon lomam edolit. 7Mam kereka igaŋi Edeke luseunake, luemonyakinete paaran ka kuare, etitiŋikinit ŋesi kanukec? 8Katemari yes atiar, Igaŋi kes atipet. Konye naebunio Okoku loka etuŋanan, edumuni kereka aiyuun kakwap?”

9Kolimok da awaragan na ituŋa lukemunokina ebe eraas kesi luedolito komwaŋito luce; 10“Kodokasi ituŋa iarei oyekalu ailip, ediopet Eparisayot, loce da eketeleman esolo. 11#Isa 58:2,3; Luk 16:15. Kobwo Eparisayot kilip kwana kotauke ebe, ‘Wu Edeke, kemalai jo naarai mam eoŋ kiputo kicetuŋa, ikaŋatak, ikeŋalak, idotea, karaida bala lo eketeleman esolo. 12#Mat 23:23. Aluŋenenei eoŋ irwan aarei ŋinisabato, ainanakini da yenikitomonet kotoma kaluadumuni kere.’ 13#Sab 51:1. Konye kobwo eketeleman esolo kama elwana, kwabo mam ketitinikinit aikeun akekonyen akuj, konye kodipidip aketorob, kobala ebe, ‘Wu Edeke, kitimoi eoŋ ekadiakanaran!’ 14#Mat 23:12; Luk 14:11; Esk 21:31. Katemari yes atiar, Abu ŋol kodok alosit oreke imarakinitai adolit aitelekarit je; naarai ŋinituŋanan yeniturokin itisilio, konye yenitisilikin iturio.”

15 # Mat 19:13-15; Mk 10:13-16. Koinunai idwe ludidik da tetere etirori kes; konye nakeanyuniata ikesisiak, kitorona kes. 16Konye Yesu konyarau kes kotema atiar, “Kocamutu idwe ludidik abunore mama ajai, kwabo sirikisimika kes; naarai lueputosi kalu ajakanut naka Edeke erai nakec, 17#Mat 18:3. Abeit katemari yes atiar, ŋin yenimam iyuuni ajakanut naka Edeke kwape kikoku yenididi, mam cut elomari toma.”

18 # Mat 19:16-29; Mk 10:17-30. Kiŋit ŋes ekayaiton ediopet ebe, “Ekesisianakinan Iokajokan, keswama anyoika tetere erumi aijar naka ikar kere?” 19Kotema Yesu ŋes atiar, “Kanukinyo kinyaraa eoŋ lokaiokan? Emamei yenikajokan dimarai ediopet, ŋes Edeke. 20#Any 20:12-16; Ikis 5:16-20. Ijeni aicorakineta ebe: ‘Siridote, Siriari, Sirikokoi, Sirisabanakinenei, Koyoŋitenenei papakon ka totokon.’ ” 21Kotema atiar, “Aricit ŋun kere ameun keiditeuka.” 22#Mat 6:20. Nakiiraria Yesu ŋun, kotema ŋes atiar, “Eriŋa kiwolikit adiopekirot. Kogwela luijaatar kere, kokoranak lukican, ijaunete moolo kabar kotoma akuj; kosodi kobu, kotup eoŋ.” 23Konye nakiiraria ŋun kokadak noi, naarai kebarit noi. 24Nakesesenia Yesu ŋes kotema atiar, “Etiono cama lukabarak alomar ajakanut naka Edeke! 25Epatana ekaal aitor apedot naka ekus, itia ekabaran alomar ajakanut naka Edeke.” 26Kotemasi ŋul lukiirarete atiar, “Aso iŋai bo do epedori aitaiario?” 27Konye kotema atiar, “Numam epedorio kotuŋa epedorio kama ejai Edeke.” 28Kobala Petero ebe, “Koany, kipou isio kenyeis ikosiboro katuputu jo.” 29Kotema kes atiar, “Abeit katemari yes atiar, Emamei etuŋanan loenyeinit etogo arai aberu, arai iinacan, arai ikauriak, arai idwe, kanuka ajakanut naka Edeke, 30lomam edumuni ipu noi aitelekarit kapak kana, ido kokar luepote aijar naka ikar kere.”

31 # Mat 20:17-19; Mk 10:32-34. Koyaŋa lutomon ka luarei, kotema kes atiar, “Koany, kidokari alosit Yerusalem, itodolikinio akiro kere nukiwadikaete kolo inabin kama ka Okoku loka etuŋanan, #Luk 9:22,44. 32Naarai einakinio mama ejaas Imo, eboliatar, iswamakinio nukepali, imwaanakinio aimul: 33edaete ka aiar ŋes; kapaaran da nakiwuniet ejaruni.” 34#Mk 9:32. Konye mam kes apotu kojenut adis kaŋun; naarai kimunonikinitai kes akirot ŋin, kwabo mam ejenuna nukinerai.

35 # Mat 20:29-34; Mk 10:46-52. Kosodi kanen, nakeapiaria Yeriko, kejai etuŋanan emuduk iboie kawai kerot ilipitoi. 36Nakiiraria ekodet itorit, kiŋit ebe, “Ikote bo ai ŋun?” 37Kolimokis ŋes ebe, “Yesu loko Nasaret itorit.” 38Kiworo ebe, “Yesu, okoku loka Daudi, kitimoi eoŋ.” 39Ŋul da lukiŋarenito kiretakis tetere ililiŋi: konye ŋes kiyatak noi aiworo ebe, “Wu jo okoku loka Daudi, kitimoi eoŋ.” 40Kobwou Yesu, kicorak ayaunio mama ejai, Napekeapiki, kiŋit ŋes ebe, 41“Ikoto keswamak jo inyo?” Kotema atiar, “Ejakait, akoto kakweny.” 42#Luk 17:19. Kotema Yesu ŋes atiar, “Kokweny: kitaŋaleu jo akoniiyuun.” 43Atipet kokweny, kotupa ŋes, itopoloorit Edeke. Nakeanyuniata ituŋa da kere, kituritos Edeke.

Atualmente Selecionado:

Luka 18: AOV1961

Destaque

Copiar