Matta 14

Ukwa̱ wa Yahaya za vu Urumbusu

(Mak. 6:14-29; Luk. 9:7-9)

1A mantsa mo ndolo, Hiridu Antiba, mogono ma̱ Ga̱lili, ma uwwa ta̱ adama e Yesu. 2A̱vu u damma agbashi a̱ yi, “Yesu Yahaya za vu Urumbusu ɗa, za na a̱ ꞌya̱sa̱in a̱tsuma̱ a̱ a̱kwa̱kwa̱. A̱yi ɗa i zuwai waa yuwusan cuꞌun vi ili ya asalama a nda.”

3-4Kafu mantsa ma nda, Hiridu usa ta̱ Hiridiya a̱yi ubuwu ka mawun ma̱ a̱na̱wu ma̱ yi Filibu. Yahaya† dansaa yi ta̱, “U ri ulobonu vu zuwa Hiridiya shi!” Reve u zuwa e reme Yahaya a̱ nla̱ yi, a̱vu a zuwa yi a̱tsuma̱ o uꞌwa wa ali. 5U shi ta̱ u ciga wu una yi, agba wu uwwusa ta̱ wovon wa ama, adama a na a̱ usu ta̱ Yahaya vumava̱sula̱ ɗa.

6Ana a cuwusan nu urana u na a matsain Hiridu, a̱vu usheli wa Hiridiya u jeꞌeen Hiridu oɓolo no omocin a̱ yi, a̱vu u zuwa okolo a̱ yi o yoꞌono. 7Reve u kucina na waa ca yi ili i na u cigai biti. 8A̱vu mma vu usheliꞌi u damma yi u damma, “N ciga ta̱ aaci a Yahaya za vu Urumbusu a mapara ma nda!” 9A̱vu mogonoꞌo u yuwan shinreve vi ili i na u dammai. Agba u ciga u ꞌya̱sa̱n nzuwulai n na u yuwain a̱ ma̱ka̱ka̱n mo omocin a̱ yi shi. A̱vu u damma a̱soja a̱ yi, 10a̱ ꞌya̱wa̱ o uꞌwa wa ali o koɗo aaci a Yahaya za vu Urumbusu. 11A̱vu a̱ ta̱wa̱a̱ na aaciꞌi a mapara a̱vu a ca usheliꞌi, a̱vu usheliꞌi u ꞌya̱wa̱a̱ mma va̱ yi. 12Reve ojoro a Yahaya a̱ ta̱wa̱ a tara lipu va̱ yi a̱ ciɗo. A̱vu a̱ ꞌya̱wa̱ a̱ ka̱mbuwa̱ Yesu ili i na i farai.

Yesu lyuwato ta̱ ama ukpakukupa uton

(Mak. 6:30-44; Luk. 9:10-17; Yah. 6:1-14)

13Ana Yesu uwwai alabari o ndolo, reve u uwa a wantsun, a̱vu u ka̱ra̱ a̱ tyo o una tsa̱ra̱ u da̱na̱ a̱yi a̱ ndeꞌen. Agba ana oɓolo a amaꞌa a uwwai ne, reve o toni yi na̱ mmalu o tono ngeꞌen m mala. 14Ana u rawai, a̱vu u cina a̱ba̱jini o oɓolo a ama a pura yi. Reve we ene le iliyali, a̱vu u ka̱mba̱to aza a na a̱ da̱na̱i ubanakun suru gbaga.

15Urana a zama ma̱riya̱a̱, a̱vu ojoro a̱ yi a̱ ta̱wa̱ uba̱ta̱ wa̱ yi a̱vu a damma, “Urana u koto ta̱, uba̱ta̱ u nda gba ogozo a ɗa. Damma amaꞌa e beteꞌwe, tsa̱ra̱ a̱ ꞌya̱wa̱ a̱ mulyuci a tsulaa aciyele ilyalya a lyuwa.”

16Reve u usu le, “Ili yi lo i na yaa zuwa le a̱ ka̱ra̱ shi. I ꞌya̱wa̱ i ca le ilyalya a lyuwa.”

17A̱vu a damma yi, “Opopofu o ton a ɗa tsu ri ne ele na̱ mugula n re goon.”

18Reve u damma le, “Ta̱wa̱a̱ numu no opopofuꞌu na̱ mugulaꞌa.” 19A̱vu u damma amaꞌa a̱ da̱nu a anlya. A̱vu u tara opopofu o toꞌon na̱ mugula n reꞌe, a̱vu u ka̱lyuwa̱ zuva, reve u godyoo A̱sula̱ adama e ilyalya. Reve u neꞌeshen opopofuꞌu, a̱vu u ca ojoro a̱ yi, reve ele a ca ama. 20Ama suru a lyuwa ta̱ hali a̱ cuwa̱n. Reve ojoroꞌo o shiton asaka kupa ne ejere na akapi e ilyalya i na i buwai. 21Ali a na a lyuwai ilyalya i ndolo a ta rawa ali ukpakukupa uton (5,000), e kece a̱ma̱ci na̱ muwun shi.

Yesu wala ta̱ a̱ mini

(Mak. 6:45-52; Yah. 6:15-21)

22A̱vu Yesu dammushi ojoro a̱ yi a uwa a wantsun tsa̱ra̱ a̱ ka̱ra̱ elime a̱ yi upasalai u mala. U da̱na̱ ta̱ lo tsa̱ra̱ u lyawa ama a̱ ka̱mba̱ a ꞌwa le. 23Ana u lyawa nle a̱ ka̱ra̱i a ꞌwa, reve u ka̱ra̱ a̱ ꞌya̱wa̱ a agaɗi na aciya̱yi tsa̱ra̱ u yuwan avasa. Ayin a ɗa a̱ da̱na̱i, a̱vu gba u da̱na̱ ɗe a̱yi a̱ ndeꞌen.

24A matsan mo ndolo, wantsun wo ojoro a̱ yi u da̱na̱ ta̱ e memere ma malaꞌa, waru upepu wu ucira u ꞌyon ta̱. A̱ da̱na̱ ta̱ o mpolo ni ikeɗu i mala i gbain. 25Na̱ wasasa, a̱vu u ta̱wa̱ uba̱ta̱ u le a mmalu zuva mini. 26Ana e ene niyi a mmalu zuva mini tsundolo, a uwwa ta̱ wovon. A̱vu a saala na̱ wovon, “Yimoɗi i ɗa!”

27Reve u yuwushin nle adanshi, u damma, “U rawa ta̱ ne, n ta̱ pa! She yu uwwa wovon wan.”

28A̱vu Bituru damma, “Zagbain, na̱ a̱vu ɗa mayun, damma mu n ta̱wa̱ ya̱ꞌa̱ wu zuva mini ma nda.”

29Reve u damma yi, “Ta̱wa̱.”

A̱vu Bituru lyawa wantsun, a̱vu u ka̱ra̱ a mmalu zuva mini a̱ tyo uba̱ta̱ wa̱ Yesu. 30Amma ana Bituru enei upepu ni ikeɗu i mala, a̱vu wu uwwa wovon ɗaɗa u temei maliɓaa. Ɗaɗa u saalai, “Zagbain, wawa mu!”

31A̱vu Yesu cananashi ukere wa̱ yi a̱vu u reme yi. A̱vu u damma yi, “Vu ta̱ nu ucawu wo okolo keꞌen. Nye i zuwai okolo a̱ wu a kuɗai?”

32Ana a uwai a̱tsuma̱ a wantsuꞌun, reve upepuꞌu u von kwin. 33Ɗaɗa aza a na a̱ da̱na̱i pe a wantsuꞌun a yuwayin Yesu a̱ga̱nda̱ adansa, “Amayun a̱vu ɗa Mawun ma̱ A̱sula̱.”

Yesu ca ta̱ ama a Janisara lafiya

(Mak. 6:53-56)

34A pasalai ta̱ malaꞌa a̱vu a̱ tyo e iɗa ya Janisara. 35Ana ama a na a̱ ri pe e revei Yesu ɗa, a̱vu a damma ama suru a na Yesu ta̱wa̱ ta̱. A̱vu a̱ ta̱wa̱a̱ yi na aza a na a̱ ri nu ubanakun icuꞌun icuꞌun. 36Reve a pati yi tsa̱ra̱ u lyawa aza a na a̱ ri nu ubanakun a̱ juꞌwa̱n ngeꞌen mu utugu ma̱ yi. Reve aza a na a̱ juꞌwa̱in suru a̱ ka̱mba̱ gbaga.

Atualmente Selecionado:

Matta 14: tswNT

Destaque

Copiar