ลูกา 20

ซาปา บรี เยซู บูวัจ ลาฆู กะฆีนี

(มัดทัย 21.23-27; มาระโก 11.27-33)

1อาดา ซืออารี_ เยซู ญา ตืองัฮ อาฌัยํ โกะ ซือมียา_ เดะ รูมัฮ มือญือมัฮ ตูฮัด_ มือญาเระ บรีตา นู บาฌิ นะ ตูฮัด เตอ_ โกะ ลูมอฮ ซามี ซัยํบือซัยํ_ โกะ ซือมียา อาฌัยํ ลาฆู ปือมือซัด นะ ตูฮัด ฌางัน ลูมอฮ อูรัก ตูฮา เตอ_ กูญา ปาคัจ มาแรฮ 2มือเลา ฌางัน เยซู จะ_ “กือนา มือญาเระ กะ ลูมอฮ กามี เลอ_ เกา บูวัจ ลาฆู กะฆีนี ฌางัน ปือมือฆัฮ นู ดีฮา? จะ_ ซาปา บือเลฮ บรี กะ เกา บูวัจ ลาฆู กะฆีนี เลอ?”

3เยซู ญา ตีกัฮ กะ กูญา จะ_ “กู โปด_ นะ ตาญา กาเญา ซา ลาฆู ฌูฆา. กาเญา กือนา มือญาเระ กะ กู เลอ_ 4จะ_ นู โยฮัน บรี ซือมียา ซือลับ เดะ อาเย#ลก. 3.3-17 เตอ_ ฌาดี ลาฆู ดาตัก เดะ โซะ ลาแงะ_ เฆอ จะ_ ดาตัก เดะ โกะ อูมัจ ซือมียา?”

5กะฆีเตอ_ กูญา ปาคัจ บือกีรา ซามา กูญา จะ_ “ดัฮ กีตา จะ_ ‘ดาตัก เดะ โซะ ลาแงะ’ ญา นะ ตาญา กีตา จะ_ ‘ซาเบะ นามา กาเญา เตด บือเลฮ ปือจายา กะ โยฮัน เลอ?’ 6ตาปี ดัฮ กีตา มือเลา จะ_ ‘ดาตัก เดะ โกะ อูมัจ ซือมียา’ โกะ ซือมียา บาญะ นะ อาเมด บาตู ลีปัยํ กีตา_ กรานา จะ_ โกะ ซือมียา ซือมูฮา กูญา ตือตู ฮาตี จะ_ โยฮัน ฌาดี ซือมียา ตูโดฮ ลาฆู นะ ตูฮัด.” 7กะฆีเตอ_ กูญา มือเลา จะ_ “กามี เตด ตาฮู จะ_ มาแรฮ ดาตัก ปัจ ดีฮา เลอ.”

8เยซู ตีกัฮ กะ กูญา จะ_ “กะฆีเตอ_ กู เตด มือญาเระ กะ กาเญา ฌูฆา_ จะ_ ลาฆู กู บูวัจ กะฆีนี_ บูวัจ ฌางัน ปือมือฆัฮ นู ดีฮา.”

ลาฆู ซือมียา ปือบือลา กือโบด อางุน

(มัดทัย 21.33-46; มาระโก 12.1-12)

9กะฆีเตอ_ เยซู ญา ฮึนตะ นะ มือเลา จรือตา_ อาฌัยํ โกะ ลูมอฮ ซือมียา กะฆีนี จะ_ “อาดา ซือมียา ซืออูรัก_ ญา บูวัจ กือโบด_ ตานัม ปูโฮด อางุน_ บรี กะ ซือมียา กรือฌา กือโบด ซีวา. ตาปี อีซี ญา เตอ_ ปี กะ นังฆรี อาซิก ลามา ดัฮ. 10ตานา รอจ วะตู มูเซด บือบูวัฮ เตอ_ ตูฮัด กือโบด ญา ซูโรฮ ปราโซฮ ซืออูรัก_ ปี มียา ซือมียา นู ซีวา กือโบด_ บีดา กูญา นะ ปาฮาฆิ ฮาบด นะ ญา_ เดะ บูวัฮ อางุน อีตู. ตาปี โกะ ซือมียา นู ซีวา กือโบด_ กูญา กาเตาะ ปราโซฮ อีตู_ บรี ญา บาลิ ซา ญาวา_ ฮอย นามา เลอ. 11กะฆีเตอ_ ตูฮัด กือโบด ญา ซูโรฮ ปราโซฮ นู อาซิก_ ปี ปูลัก. ตาปี โกะ ซือมียา นู ซีวา กือโบด_ กูญา กาเตาะ_ บูวัจ แนฮฌือแนฮ_ บรี กะ ปราโซฮ อีตู จือและ_ โปรฮ ญา บาลิ_ ซา ญาวา_ ฮอย นามา ฌูฆา. 12กะฆีเตอ_ ตูฮัด กือโบด ญา ซูโรฮ ซือมียา นู ตีฆา ปี ปูลัก. ตาปี โกะ ซือมียา อีตู_ กูญา กาเตาะ ญาวา นะ ญา_ บรี ซาเกะ_ ตูละ บูวัก โซะ ลูวัยํ กือโบด. 13โซะ ตูฮัด กือโบด อางุน มือเลา จะ_ ‘กู นะ บูวัจ กะฮามี บาฌิ? อาดา นานะ นะ กู_ นู กู ซายัก ซูโงฮ_ กู นะ ซูโรฮ ญา ปี. ตาโกจ จะ_ กูญา นะ ตูเฮะ กะ ญา เลอ.’ 14ตาปี ตานา ลูมอฮ ซือมียา ซีวา กือโบด_ กูญา ลีฮัจ นานะ นะ ตูฮัด กือโบด เตอ_ กูญา มือเลา ซามา กูญา จะ_ ‘ญา เลอ_ ฌาดี นานะ นะ ตูฮัด กือโบด_ นู นะ ซาโมจ ปือซากา. บรี กีตา บูนอฮ บูวัก เลอ_ บีดา จะ_ กือโบด อีนี นะ บือเลฮ ฌาดี ปือซากา นะ กีตา.’ 15กะฆีเตอ_ กูญา ตูละ ญา_ ปือตรือเบะ โซะ ลูวัยํ กือโบด_ บูนอฮ บูวัก ดัฮ.

“กะฆีเตอ_ ตูฮัด กือโบด อางุน_ ญา นะ บูวัจ กะฮามี ฌางัน กูญา อีตู? 16ญา นะ มาแรฮ บูนอฮ ซือมียา นู ซีวา กือโบด อางุน บูวัก_ นะ อาเมด กือโบด อางุน อีตู_ บรี กะ ซือมียา อาซิก ซีวา.” เยซู ญา จะ.

โกะ ซือมียา_ ตานา กูญา ดืองัยํ กะฆีเตอ_ กูญา มือเลา จะ_ “ฌางัน บรี ฌาดี กะฆีเตอ เลอ.”

17โซะ เยซู_ ตีญุง ลีฮัจ กูญา_ มือเลา จะ_ “กะฆีเตอ_ ฌาดี กะฮามี เลอ_ ตือนอซ นู ฆาแรฮ เดะ ซูรัจ ปือมือเลา นะ ตูฮัด_ นู จะ

“ ‘บาตู บือซัยํ_ นู ตูกัก กรือฌา รูมัฮ ตีงัน บูวัก ดัฮ

บาตู อีตู เลอ_ ปาเระ มาแรฮ ฌาดี บาตู กือปาลา ซาฆี ดัฮ # มปต 118.22-23 ’.

18ซือมียา ดีฮา รือบัฮ ตือกัด บาตู อีตู_ นะ ปือจัฮ บือลัฮ ดัฮ. ตาปี ดัฮ บาตู อีตู_ ฆูโฆยํ ตือกัด ซือมียา ดีฮา_ ซือมียา อีตู นะ ฮาโจยํ ปี ฮาบิฮ เลอ.” 19โซะ ซือมียา อาฌัยํ ลาฆู ปือมือซัด นะ ตูฮัด ฌางัน ลูมอฮ ซามี ซัยํบือซัยํ_ กูญา กือวาซา นะ รีฆะ เยซู_ เดะ วะตู อีตู_ ซาเบะ กูญา ลีฮัจ จะ_ เยซู บือเลฮ มือเลา จรือตา กะฆีเตอ_ ตูโญะ กะ กูญา ตะอาซิก. ตาปี กูญา ตาโกจ โกะ ลูมอฮ ซือมียา เลอ.

ลาฆู บายัยํ อาเซน กะ ราฌา ซีซา

(มัดทัย 22.15-22; มาระโก 12.13-17)

20กะฆีเตอ_ กูญา มียา จือลัฮ_ ซูโรฮ ซือมียา ปี ซาซัจ_ มือลูปา ฌาดี ซือมียา บาฌิ_ จาดัก นะ รีฆะ_ อาเมด ซาลัฮ เดะ ปือมือเลา นะ เยซู_ บีดา นะ อาตัจ ญา_ ปี ดูโดะ เดะ บาวัฮ ฮูโกบ นะ ราฌา. 21โกะ ซือมียา อีตู_ กูญา ตาญา เยซู จะ_ “ บูมอยํ เออ_ กามี ตาฮู จะ_ เกา มือเลา_ อาฌัยํ เตอ_ ฌาดี ลาฆู รือมัก ซูโงฮ เลอ_ ฮอย เตด ปีเลฮ มูคา ซือมียา ดีฮา_ ตาปี อาฌัยํ ปาซัน ฌาลัด นะ ตูฮัด เดะ อาตัซ_ โงฮซูโงฮ เลอ. 22นู กีตา บายัยํ อาเซน กะ ราฌา ซีซา เตอ_ รือมัก ฌางัน ปือมือเลา ฮูโกบ นะ ตูฮัด เฆอ เตด?”

23ตาปี เยซู_ ญา ตาฮู ลาฆู บาอากัน นะ กูญา_ ญา มือเลา ฌางัน กูญา จะ_ 24“กือนา อาเมด ดูเวะ ซา รีเงะ_ บรี กะ กู ลีฮัจ เลอ. รูปา อีนี_ ฌาดี นะ ซาปา? ปือนามา ฆาแรฮ อีนี_ ฌาดี นะ ซาปา เลอ?”

กูญา ตีกัฮ จะ_ “นะ ราฌา ซีซา เลอ.”

25เยซู ตีกัฮ กะ กูญา จะ_ “ซือบารัก นะ ราฌา ซีซา_ กือนา มือญือมัฮ กะ ซีซา. ซือบารัก นะ ตูฮัด_ กือนา อาเกะ มือญือมัฮ กะ ตูฮัด เลอ.”

26โกะ ซือมียา อีตู_ นะ รีฆะ ซาลัฮ เดะ ปือมือเลา นะ เยซู_ โซะ ฮือลด มูคา โกะ ซือมียา_ ฮอย เตด บือเลฮ ดัฮ. กูญา ปาคัจ ปือและ ฮาตี เดะ ปือมือเลา ตีกัฮ นะ เยซู. กะฆีเตอ_ กูญา ซืองะ ดัฮ.

ลาฆู ซือมียา นะ ฮีโดะ ปาเระ เดะ มาตี

(มัดทัย 22.23-33; มาระโก 12.18-27)

27อาดา ลูมอฮ ซะดูซี ซือตืองัฮ_ มาแรฮ ซารี เยซู. ลูมอฮ ซะดูซี อีตู_ กูญา จะ_ ลาฆู ฮีโดะ ปาเระ เดะ มาตี เตอ_ ฮอย ลาลู. 28กะฆีเตอ กูญา ตาญา เยซู จะ_ “บูมอยํ เออ_ มูซา บือเลฮ ฆาแรฮ ซูรัจ กาลา นูตู_ ปือซัด กะ กีตา จะ ‘ดัฮ กีลากี ซือมียา ดีฮา มาตี_ อาดา บีนี_ ตาปี ฮอย นานะ ลาฆี_ บรี อาดี เดะ ญา ซืออูรัก_ อาเมด กากา อีปัย อีตู_ ฌาดี บีนี นะ ญา_ บีดา นะ บือเลฮ นานะ_ นู นะ ฌาดี บือแนฮ นะ กากา เดะ ญา เลอ#ปฮก 25.5.’ 29นี เลอ_ อาดา โกะ ดีบราดี_ ตูโฌฮ อูรัก. นู ซูโลก บือเลฮ บีนี ดัฮ_ ตาปี มาตี ฮอย นานะ. 30กะฆีเตอ_ อาดี นู ดูวา_ 31นู ตีฆา โปด_ กูญา ซาโมจ กากา อีปัย_ บรี ฌาดี บีนี นะ กูญา. กือตูโฌฮ อูรัก ซาโมจ กะฆีเตอ ฌูฆา_ ตาปี กูญา มาตี ฮอย นานะ ฮาปา เลอ. 32เดะ บลากัก_ นีบีนี อีตู โปด_ ญา มาตี ฌูฆา ดัฮ. 33กะฆีเตอ เลอ_ ตานา รอจ วะตู นู โกะ ซือมียา นะ ฮีโดะ ปาเระ เดะ มาตี เตอ_ นีบีนี อีตู นะ ฌาดี บีนี นะ ซาปา เลอ? กรานา จะ_ กูญา กือตูโฌฮ_ บือเลฮ ซาโมจ ญา ฌาดี บีนี นะ กูญา ซือมูฮา ดัฮ.”

34เยซู มือเลา ตีกัฮ กะ กูญา จะ_ “โกะ ซือมียา ฮาดัจ อีนี_ กูญา บือนีกัฮ_ กูญา อาเกะ บรี ฌาดี ลากี บีนี เตอ. 35ตาปี โซะ ซือมียา อีตู_ นู ปาโตจ นะ มาโซะ รอจ กะ ฮาดัจ โซะ ฮือลด_ นะ ฮีโดะ ปาเระ เดะ มาตี โปด_ กูญา เตด บือนีกัฮ ปูลัก_ กูญา เตด อาเกะ บรี ฌาดี ลากี บีนี ดัฮ เลอ. 36ซาเบะ จะ_ กูญา นะ มาตี ปูลัก_ ฮอย เตด บือเลฮ เลอ. กูญา ซือรูปา บือกะ โกะ ฮูลู บาลัก ฌาดี นานะ นะ ตูฮัด เดะ อาตัซ ดัฮ_ กรานา จะ_ กูญา ฌาดี ซือมียา นู ฮีโดะ ปาเระ เดะ มาตี ดัฮ. 37ตาปี นู ซือมียา มาตี_ นะ ฮีโดะ ปาเระ เตอ_ มูซา บือเลฮ มือญาเระ บรี ลีฮัจ_ เดะ ซือปาตัฮ ปาซัน ลาฆู รือบา กายู นู มือญาลา อาปี เตอ.#บรล 3.1-6 นู ญา บลาโลก กะ ตูฮัด จะ_ ฌาดี ตูฮัด นะ โกะ อับราฮัม ตูฮัด นะ อีซัก_ ตูฮัด นะ ยาโกบ เลอ. 38ซาเบะ จะ_ ตูฮัด เดะ อาตัซ_ ญา บูกัด ตูฮัด นะ ซือมียา นู ฮาบิฮ มาตี ดัฮ_ ตาปี ญา ฌาดี ตูฮัด นะ ซือมียา นู อาดา ฮีโดะ. กรานา ซา ตูฮัด เตอ_ โกะ ซือมียา ราตา อาดา ฮีโดะ เลอ.”

39โกะ ซือมียา อาฌัยํ ลาฆู ปือมือซัด นะ ตูฮัด ซือตืองัฮ_ มือเลา กะ เยซู จะ_ “บูมอยํ เออ_ เกา มือเลา บาฌิ ดัฮ เลอ.” 40ซาเบะ จะ_ โกะ ลูมอฮ ซะดูซี เตด ตือฆามะ นะ ตาญา เยซู ปูลัก ดัฮ เลอ.

ปาซัน ราฌา นู บรี ซือลามัจ

(มัดทัย 22.41-46; มาระโก 12.35-37)

41กะฆีเตอ_ เยซู ตาญา กูญา จะ_ “นู โกะ ซือมียา กูญา มือเลา จะ_ ‘ ราฌา นู บรี ซือลามัจ ฌาดี บือแนฮ นะ ราฌา ดาวิด.’_ นะ บือเลฮ กะฮามี เลอ? 42กรานา จะ_ ราฌา ดาวิด ตะอาซิก_ ญา บือเลฮ มือเลา_ เดะ ซูรัจ มือญาญี ปูฌี ตูฮัด_ จะ

“ ‘ตูฮัด บือซัยํ เดะ อาตัซ_ มือเลา ฌางัน ตูฮัด นะ กู จะ_

ดูโดะ เลอ_ โซะ ซือบือลัฮ กานัน นะ กู

43 ตือดะ กู นะ บูวัจ บรี ลูมอฮ ซือตรู นะ เกา_

นะ ฌาดี บือกะ ปาปัด_ นู ซาโมจ ตาปะ กากี นะ เกา.’ ดาวิด ญา จะ#มปต 110.1.”

44“ราฌา ดาวิด_ ญา บลาโลก ราฌา นู บรี ซือลามัจ อีตู จะ_ ‘ตูฮัด’. กะฆีเตอ_ ญา นะ ฌาดี บือแนฮ นะ ดาวิด บือเลฮ กะฮามี เลอ?” เยซู ญา จะ.

ปาซัน โกะ ซือมียา นู อาฌัยํ ลาฆู ปือมือซัด นะ ตูฮัด

(มัดทัย 23.1-36; มาระโก 12.38-40)

45ตานา โกะ ซือมียา ซือมูฮา มือนีงัย เตอ_ เยซู ญา มือเลา ฌางัน โกะ มูเระ นะ ญา จะ_ 46“กือนา ฌาฆา บรี บาฌิ เลอ_ โกะ ซือมียา อาฌัยํ ลาฆู ปือมือซัด นะ ตูฮัด. กูญา ซูกา ปือแญะ บาฌู ปาญัก_ บือฌาลัด ปี มาแรฮ_ ซูกา บรี โกะ ซือมียา มือนูโนะ ซือมัฮ กะ กูญา_ เดะ ตืองัฮ ปาฌะ อีกัด เตอ. เดะ รูมัฮ บือมุน เตอ_ เดะ ลาฆู มากัด บรามัย โปด_ กูญา ซูกา นะ ดูโดะ เดะ ตือปัจ นู บาฌิ เดะ กาวัด. 47กูญา ราปัซ อาเมด โกะ ซือบารัก_ โกะ รูมัฮ นะ นีบีนี ฌานา เตอ_ ตาปี กูญา ซืองาฌา บือซาโวจ ปาญักๆ เลอ. โกะ ซือมียา กะฆีนี_ กูญา นะ กือนา กรัจ ฮูโกบ_ ลือเบฮ เดะ กาวัด.” เยซู ญา จะ.

Atualmente Selecionado:

ลูกา 20: ULBIBLE

Destaque

Copiar