ลามูลา 3
3
ลาฆู ดูซา นู ลามูลา_ ฌางัน ลาฆู กรัจ ฮูโกบ
1เดะ โกะ บือนาตัก เดะ ฮูตัด_ นู ตูฮัด บือซัยํ เดะ อาตัซ บือฌาดี ดัฮ เตอ_ อูลัยํ เลอ_ นู บาอากัน_ ลือเบฮ เดะ บือนาตัก นู อาซิก ซือมูฮา. ญา มาแรฮ ตาญา นีบีนี อีตู จะ_ “ซูโงฮ เฆอ_ ตูฮัด บลารัก_ ตีเมา บรี มากัด บูวัฮ ปูโฮด นามา โปด_ เดะ กือโบด อีนี?”
2กะฆีเตอ_ นีบีนี อีตู ตีกัฮ กะ อูลัยํ จะ_ “บูวัฮ ปูโฮด กายู เดะ กือโบด อีนี ซือมูฮา_ กามี มากัด บือเลฮ. 3ตาปี อาดา ซือปูโฮด_ เดะ ตืองัฮ กือโบด เตอ_ นู ตูฮัด บลารัก จะ_ ‘ฌางัน นะ มากัด บูวัฮ เดะ ปูโฮด อีตู_ ฌางัน นะ ปือเตาะ_ เตด กะฆีเตอ กาเญา นะ ฆาโดฮ มาตี เลอ.’ ”
4ตาปี อูลัยํ อีตู มือเลา ฌางัน นีบีนี จะ_ “กาเญา นะ เตด มาตี โบะ. 5กรานา ตูฮัด ตาฮู จะ_ อารี ดีฮา_ ดัฮ กาเญา มากัด บูวัฮ อีตู เตอ_ กาเญา นะ ตาฮู ลาฆู แนฮฌือแนฮ เลอ. กาเญา นะ ฌาดี ซือรูปา บือกะ ตูฮัด เลอ_ บือเลฮ ตาฮู ลาฆู บาฌิ_ ลาฆู ฌาฮัจ.”
6กะฆีเตอ_ กาลา นีบีนี อีตู_ ญา ลีฮัจ จะ_ บูวัฮ อีตู นะ มากัด ญามัน เตอ_ ปูโฮด โปด บือฆาจะ_ นะ บูวัจ บรี ซือมียา อาดา อากัน_ ญา กือเปาะ บูวัฮ อีตู_ มาแรฮ มากัด. ญา บรี ซือตืองัฮ กะ ลากี นะ ญา_ นู อาดา บือซามา. ลากี นะ ญา โปด_ มากัด ฌูฆา. 7กะฆีเตอ_ กูญา กือดูวา อูรัก_ ตาฮู ลาฆู แนฮฌือแนฮ. กูญา ลีฮัจ จะ_ กูญา ญักตือลาญัก ดัฮ. กูญา อาเมด ดาโวด กรายา บูดี มาแรฮ_ ฌาเฮะ บูวัจ ตือปัจ ตูโดก ญาวา นะ กูญา.
8วะตู มาตา อารี แฌะบือแฌะ อารี อีตู_ กูญา ดืองัยํ ซือวารา นะ ตูฮัด บือซัยํ เดะ อาตัซ_ มาแรฮ บือฌาลัด_ เดะ กือโบด. กะฆีเตอ_ กีลากี อีตู_ ฌางัน บีนี นะ ญา เตอ_ กูญา ซือลูนี เดะ ปูโฮด กายู เดะ กือโบด_ ตาโกจ จะ_ นะ บือดาปัจ ฌางัน ตูฮัด. 9ตาปี ตูฮัด บือซัยํ เดะ อาตัซ เตอ_ ญา บลาโลก กีลากี อีตู_ มือเลา ฌางัน ญา จะ_ “เกา อาดา ปัจ ดีฮา?”
10กะฆีเตอ_ กีลากี อีตู ตีกัฮ จะ_ “กู ดืองัยํ ซือวารา นะ เกา เดะ กือโบด_ กู ตาโกจ_ ซาเบะ กู ญักตือลาญัก. กะฆีเตอ_ กู ซือลูนี ดัฮ.”
11กะฆีเตอ_ ตูฮัด มือเลา จะ_ “เออ. ซาปา มือญาเระ กะ เกา จะ_ เกา ญักตือลาญัก? เกา มากัด บูวัฮ กายู_ นู กู บลารัก ดัฮ เฆอ?”
12กีลากี อีตู มือเลา จะ_ “นีบีนี นู เกา บรี ดูโดะ ฌางัน กู เตอ_ ญา เลอ_ อาเมด บูวัฮ ปูโฮด อีตู_ มาแรฮ บรี กะ กู. กะฆีเตอ_ กู มากัด ดัฮ.”
13กะฆีเตอ_ ตูฮัด บือซัยํ เดะ อาตัซ_ ญา ตาญา นีบีนี อีตู จะ_ “เกา บูวัจ ลาฆู นามา กะฆีเตอ?”
นีบีนี อีตู ตีกัฮ จะ_ “อูลัยํ_ ญา ตีปู กู_ กะฆีเตอ กู อาเมด มาแรฮ มากัด เลอ.”
14กะฆีเตอ_ ตูฮัด บือซัยํ เดะ อาตัซ_ ญา มือเลา ฌางัน อูลัยํ อีตู จะ_
“กรานา เกา บูวัจ กะฆีนี
เกา ฆาโดฮ กือนา อาโบยํ ซูปัฮ
บาญะ ลือเบฮ เดะ โกะ บือนาตัก นู บือเลฮ ซูโรฮ
ฌางัน บือนาตัก เดะ ฮูตัด ซือมูฮา.
เกา ฆาโดฮ มือรากะ ฌางัน โปรจ.
เกา ฆาโดฮ มากัด ตานัฮ ฮาลุซ
ตือดะ ฮาบิฮ อูมอยํ นะ เกา.
15กู นะ บูวัจ บรี เกา_ ฌางัน นีบีนี_ ฌาดี ซือตรู
นะ บรี บือแนฮ นะ เกา_ ฌางัน บือแนฮ นะ นีบีนี_ ฌาดี ซือตรู ฌูฆา.
ญา นะ บูวัจ บรี ปาลา นะ เกา ปีแญะ เตอ
เกา โปด_ นะ บูวัจ บรี ตูแมะ นะ ญา_ บารัฮ ดัฮ.”
16ตูฮัด บือซัยํ เดะ อาตัซ_ ญา มือเลา ฌางัน นีบีนี จะ
“กู นะ บูวัจ บรี เกา ซูซัฮ ปายัฮ โตระ_ วะตู เกา บือโปรจ
วะตู เกา ดูโดะ เดะ อาปี เตอ_ นะ ซาเกะ เลอ.
มีเซ กะฆีเตอ โปด_ เกา นะ อาดา บือคานะ ลากี นะ เกา.
ลากี อีตู เตอ_ ญา นะ ฮูโกบ ญาวา นะ เกา.”
17กะฆีเตอ_ ตูฮัด ญา มือเลา ฌางัน กีลากี อีตู จะ
“กรานา เกา มือนีงัย กะ ซือวารา บีนี นะ เกา เตอ
เกา มากัด บูวัฮ_ ดาตัก เดะ ปูโฮด กายู นู กู บลารัก
ตีเมา บรี มากัด บูวัฮ เดะ ปูโฮด อีตู ดัฮ
กะฆีเตอ_ ตานัฮ กือนา อาโบยํ ดัฮ_ กรานา เกา.
กะฆีเตอ_ เกา ฆาโดฮ ซารี มากัด_ เดะ อาตัซ ตานัฮ.
ฌางัน ลาฆู บือกรือฌา ซูซัฮ ปายัฮ โตระ
ตือดะ ฮาบิฮ อูมอยํ นะ เกา.
18โกะ ปูโฮด กายู_ โกะ รูโปจ ซือมูฮา นู อาดา ดูรี
นะ บือตูโมฮ เดะ ตือปัจ ตานัฮ นะ เกา.
กะฆีเตอ_ เกา นะ มากัด บารัก_ นู บือตูโมฮ เดะ ปาดัก.
19เกา ฆาโดฮ ซารี มากัด_ ฌางัน ปือโลฮ เดะ มูคา
ฌู ตือดะ เกา ปาเระ ฌาดี ตานัฮ ปูลัก.
กรานา เกา กือนา บือฌาดี มาแรฮ ดาตัก เดะ ตานัฮ.
กะฆีเตอ เลอ_ เกา ฌาดี ตานัฮ ฮาลุซ เตอ
เกา กือนา ปาเระ_ ฌาดี ตานัฮ ฮาลุซ ปูลัก เลอ”_ ตูฮัด ญา จะ.
20กะฆีเตอ_ กีลากี อีตู_ ญา ตืองะ ปือนามา บีนี นะ ญา จะ_ ฮาวา. กรานา ญา เลอ_ นู ฌาดี เอด_ เดะ ลูมอฮ ซือมียา ซือมูฮา_ นู ฮีโดะ.#3.20 เดะ บาซา ฮีบรู ปือนามา จะ ฮาวา_ ญา ซือรูปา ปือมือเลา จะ_ บือนา นู อาดา ฮีโดะ. 21กะฆีเตอ_ ตูฮัด บือซัยํ เดะ อาตัซ_ ญา อาเมด กูเละ บือนาตัก มาแรฮ_ บูวัจ ฌาดี กาเยด_ บรี กะ กีลากี ฌางัน บีนี นะ ญา_ บือปากัย ตูโดก ญาวา นะ กูญา.
22กะฆีเตอ_ ตูฮัด บือซัยํ เดะ อาตัซ_ ญา มือเลา จะ_ “ลีฮัจ เลอ_ ซือมียา เตอ_ ฌาดี ซือรูปา ซืออูรัก เดะ ลูมอฮ กีตา ดัฮ_ ซาเบะ ญา ตาฮู ลาฆู บาฌิ ลาฆู ฌาฮัจ ดัฮ. กะฆีเตอ เลอ_ ฌางัน บรี ญา อาเงา ตางัน_ อาเมด บูวัฮ_ เดะ ปูโฮด กายู นู บรี ฮีโดะ_ มาแรฮ มากัด_ นู นะ บูวัจ บรี ญา อาดา ฮีโดะ ซือลาลู”_ ญา จะ.
23ซาเบะ กะฆีเตอ_ ตูฮัด บือซัยํ เดะ อาตัซ_ ญา โปรฮ ซือมียา อีตู_ บรี ตรือเบะ เดะ กือโบด เอเดน_ บรี บือกรือฌา บือนัก เดะ ตานัฮ อีตู_ นู อีซี ญา กือนา บือฌาดี มาแรฮ เตอ. 24ตูฮัด ญา โปรฮ กีลากี อีตู_ บรี ตรือเบะ ปี. ญา ตืองะ ลูมอฮ ฮูลู บาลัก เครูบ#3.24 เครูบ เครูบ อีนี_ ฌาดี บือกะ ฮูลู บาลัก นะ ตูฮัด_ ซา ฌือแนฮ._ บรี บือดีรี_ โซะ ตีมอยํ นะ กือโบด เอเดน อีตู. ญา ตืองะ ปือดัก อาปี_ นู ลีฆัจ กือลีลิก_ บรี ตูงู ฌาลัด มาโซะ_ กะ ปูโฮด กายู_ นู บรี ฮีโดะ อีตู เตอ.
Atualmente Selecionado:
ลามูลา 3: ULBIBLE
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
