ዶመ 17
17
ቃጻራ፥ ጫቁዋ ማላ
1አብራሞ ላይይ ኡዱፑን ታማነ ኡዱፑና ግድያ ዎደ፥ መና ጎዳይ አዉ ቆንጪደ አ፥ “ታን ኡባ ዳንዳይያ ጾሳ፤ ኔን ታ ስንን ሀመታ፤ ሱረ ግዳ። 2ታን ታፐነ ኔፐ ግዱዋን ታ ጫቁዋ ዎይ፤ ታን ኔና ሎይ ጮርሳና” ያጌዳ። 3አብራመ ባረ ዴሙዋን ዱገ ጉፋኔዳ፤ ጾሳይ አዉ ሀዋዳን ያጌዳ፤ 4“ስም፥ ታን ኔናና ጫቀትያ ጫቁ ሀዋ፤ ኔን ዳሮ ካዉተ አዉዋ ግዳና። 5ሀዋፐ ዶሚደ ነ ሱንይ አብራማ ጌተተና፤ ሽን ነ ሱንይ አብራሃማ#17:5 አብራሃማ፦ ሀ ሱን ብለይ ዳሮ ካዉተዉ አዉዋ ግያዋ ማላቴ። ግዳና። አያዉ ጎፐ፥ ታን ኔና ዳሮ ካዉተ አዉዋ ኦድ።#ሮመ 4:17 6ታን ኔና ሎይ ጮርሳና፤ ታን ኔፐ ካዉተቱዋ መና፤ ካተቱካ ኔፐ ከሳና። 7ታን ታፐነ ኔፐ፥ ኔፐ ጉየ ነ ዘረፐነ ግዱዋን፥ የለታፐ የለታ ጋካናዉ ታ ጫቁዋ ጫቀታይ፤ ሀ ጫቁ ታን ነዉነ ኔፐ ጉየ ነ ዘረዉ ጾሳ ግዳና ማላ መና ጫቁዋ።#ሉቃሳ 1:55 8ሀእ ኔን በተ ግዳደ ደእያ ካናነ ቢታይ ኡባይ ነዉነ ኔፐ ጉየ ነ ዘረዉ መናዉ ላታ ግዳና ማላ ታን እማና፤ ቃይ ታን ኡንቱንቱ ጾሳ ግዳና” ያጌዳ።#ኪታ 7:8
9ቃይካ ጾሳይ አብራሃማ፥ “ኔና ግዶፐ፥ ኔን ታ ጫቁዋ ናጋ፤ ኔንካ ኔፐ ጉየ ነ ዘረይካ፥ የለታፐ የለታ ጋካናዉ ናግተ። 10ታፐነ ኔፐነ፥ ኔፐ ጉየ ነ ዘረፐ ግዱዋን ህንተንቱ ናጋና ታ ጫቁ ሀዋ፤ ህንተንቱ ግዱዋን ደእያ አቱማዌ ኡባይ ቃጻረቶ።#ኪታ 7:8፤ ሮመ 4:11 11ህንተንቱ አቱማተ ሾኩዋ ቃጻረቲታ፤ ሄዌ ታፐነ ህንተፐ ግዱዋን ደእያ ጫቆ ማላ ግዳናዋ። 12ህንተንቱ ግዶን ስንፐ የለታና አቱማ ናናይ ኡባይ የለቴዳ ሆስፑን ጋላሳን ቃጻረታናዉ ኮሼ። ነ ሶን የለቴዳዋንታ ግድና፥ ዎይ አላጋፐ ሻሉዋን ሻመቴዳ አይለቱዋ ግድና፥ ነ ዘረ ግደናዋንታካ አቱማዋንታ ቃጻራናዉ ኮሼ። 13ነ ሶን የለቴዳዋንቱ ነ ሻሉዋን ሻመቶዋንቱ ቃጻረትኖ። ሀዌ ህንተንቱ አሹዋን ደእያ ታ ጫቁ መና ጫቁዋ ግዳና። 14ቃጻረትቤና፥ ባረ ሾኩዋና ደእያ አቱማ አሳይ ኡባይ ባረ አሳፐ ዱጻና፤ አያዉ ጎፐ፥ እ ታ ጫቁዋ መንዳ” ያጌዳ።
15ቃይካ ጾሳይ አብራሃመ፥ “ስም፥ ነ ማቻት ሳር ሱን ሳራይ ጎፓ፤ ሀዋፐ ስንዉ እዝ ሱንይ ሳሮ።#17:15 ሳሮ፦ ሀ ሱን ብለይ ካዉተ አቶ ጉሳ። 16ታን እዞ አንጃና፤ ታን ኢፐ ነዉ አቱማ ናኣ ቱሙ እማና። እዞ ታን አንጃና፤ እዛ ካዉተቱዋ አቶ ግዳና፤ አሳ ካተቱ ኢፐ ያና” ያጌዳ።
17አብራሃመ ባረ ዴሙዋን ጉፋኔዳ፤ እ ሚጪደ ባረ ዎዛናን፥ “ጼቱ ላይ አሳይ ቱሙ ናኣ የላኔ? ቃይ ኡዱፑን ታሙ ላይ ግዴዳ ሳራ ናኣ የላኔ?” ያጊደ ቆፔዳ። 18አብራሃመ ጾሳ፥ “እስማኤል ታና ላትያዋ ግዳናዉ ዳንዳየኔ?” ያጌዳ።
19ሽን ጾሳይ፥ “ቱይት፥ ነ ማቻታ ሳራ ነዉ አቱማ ናኣ ቱሙፐ የላና፤ ኔን ይሳቃ#17:19 ይሳቃ፦ ሀ ሱን ብለይ እ ሚጬዳ ግያዋ። ጋደ አ ሱንና። አፐ ጉየ፥ አ ዘረዉ መና ጫቁዋ ግዳና ማላ፥ ታን አናና ታ ጫቁዋ ጫቀታና። 20ቃይ እስማኤላባ ግዶፐነ፥ ኔን ኦቼዳዋ ታን ስሳድ፤ ታን አካ አንጃና፤ ታን አ አንጃናነ አ ዘረ ሎይ ጮርሳና፤ እ ታማነ ላኡ የለታቱዋ የላና፤ ታን አ ዘረ ዎልቃማ ካዉተ ኦና። 21ሽን ታን ታ ጫቁዋ ላይ ሀኖደ ሳራ ነዉ የልያ ይሳቃና ጫቀታና” ያጌዳ። 22ጾሳይ አብራሃማና ሃሳዪደ ዉርሴዳዋፐ ጉየ፥ አብራሃመፐ ሻከቲደ ፑደ ቤዳ።
23ሄ ጋላሳን አብራሃመ ባረ ናኣ እስማኤላ፥ ባረ ሶን የለቴዳ ኡባ፥ ባረ ሻሉዋን ሻሜዳዋንታ ኡባ፥ ባረ ሶን ደእያ አቱማ አሳ ኡባ፥ ጾሳይ አዉ ኦዴዳዋዳን ኡንቱንቱ አቱማተ ቃጻሬዳ። 24አብራሃመ ባረ አቱማተ ቃጻረትያ ዎደ፥ ኡዱፑን ታማነ ኡዱፑን ላይ አሳ፤ 25አ ናአይ እስማኤል ባረ አቱማተ ቃጻረትያ ዎደ፥ ታማነ ሄዙ ላይ ናኣ። 26አብራሃመነ አ ናአይ እስማኤል ላአቱካ ሄ ጋላስ ቃጻረቴድኖ። 27አብራሃመ ሶን ደእያ አቱማ አሳይ ኡባይ፥ አ ሶን የለቴዳዋንቱነ ሻሉዋን ሻሜዳዋንቱ ኡባይ አናና ቃጻረቴድኖ።
Atualmente Selecionado:
ዶመ 17: DFBE
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
The Word for the World Ethiopia
