LUKA 23

1YI bakakwombuluka kimbukuma kiabo kincimancima, yi bakamucwala kudi Pilata.

2Yi bakabanga kumusanya ene, Twamasañana you muntu udi mu kuungisa ungisa bubila bwecu, amakanda bantu kabalambudi Kyesa milambu, yi amatôya ene, mikyenci udi Kalistu, Fumu. 3Yi Pilata akamwapangusa ene, Owe udi fumu a bena Yuda ? Yi akamupingasa, ene, Wamatôya sôsôlwo. 4Yi Pilata akatôyela makanda manene yi bimbukuma ene, Kisosañana bubi yi muntu you. 5Mo bobo bakaxengula ene, Amanyingisa nyingisa bantu ku kweyesa kwanci mu bungi bwa Yudiya ; akabanga ku Ngalili yi amalwa pôi kunu. 6Mo pakakwombwa Pilata, akakwapangusa ndo muntu you udi muna Ngalili ; 7yi pakalubukwayi ene, akadi muna mbata a bumanya bwa Elodo, akamutuma kudi Elodo, akadi mikyenci kabidi ku Yelusaleme ku matuku aa.

8Yi Elodo, pakamonayi Yisu, akaxekyelela kungi ; bwalo bwakakyebayi kumumona kikondo kingi, bwalo bwakamakwombwayi malo mangi ku bwalo bwanci ; yi akadingila ambeci kumona kilayixilu kixekwencebwa kudiyi. 9Yi akamwapangusa lolo miapangusu mingi, mo yei akadi kasopingasa diyi dimodimwe. 10Yi makanda manene yi bafundi ba mikanda bakakwemana yi bakamusanya yi ngulu. 11Elodo lolo yi masalai anci bakamutamuna yi bakamukyeca, yi bakamulatisa bilatu bia lwoxixi, yi bakamupingasa kudi Pilata. 12Yi Pilata yi Elodo bakadyañana bwenyi ku dituku dedi ; bwalo bwakakwombwelañanabo mwoxingi buxi.

13Pilata lolo akakokyeya makanda manene yi milopwe yi bantu, 14yi akabatôyela ene, Nwamacwala muntu you kundi bea muntu amaungisa bantu ; yi mona, meme binamamukwakwala ku mpala yenu, nakadi kisosañana kwona kwoso yi muntu you bwalo bwa malo anwamamusanya ; 15yi Elodo mo nako kabidi. Bwalo bwapumupingasayi kutudi ; yi mona, kakuna kintu kialelekyela yi lufu kiapwencebwa kudiyi. 16-17Ndo binakumukuma bintu yi nakumupaula. 18Mo bakakwamena bo-a-bwoso ene, Xakwala muntu you ; utupaudili Balaba. 19Yei ndo muntu akakwelebwa ku lukanu bwalo bwa munyingu ăkatekayi mu bula, yi bwalo bwa kwonda kwa bantu. 20Mo Pilata akatôya yinabo kabidi, udi mu kukyeba kulekyela Yisu. 21Mo bakakwamena ene, Umukopeki ku nkulusu, umukopeki ku nkulusu. 22Yi akabatôyela diamusatu ene, Kukai ? Muntu you amakwenca bubi kai ? Kiasañana bwalo bwoso yinanci bwa kufwa ; ndo binakumukuma yi nakumulekyela. 23Mo bakaxengula xengula yi meyi akola, badi mu kulomba ene, Axipibwi ku nkulusu. Yi meyi abo akapila. 24Yi Pilata akasambola ene, mwalombabo mwencebwi. 25Yi akapaula you akakwelebwa ku lukanu bwalo bwa munyingu yi bwa kwonda, akalombabo ; mo Yisu ndo akalongolayi ku nyinga yabo.

26Yi pakamunculabo bakabamba muntu dina dienci ene, Ximono, muna Kulene udi mu kulwa ku mbata, yi bakabaka nkulusu kulu kwanci bixemwombululayi kunyuma kwa Yisu.

27Yi kimbukuma kinene kia bantu bakamulanda, yi kia babakaxi, bakadikuma biedi yi bakamudidila. 28Mo Yisu akakulumuka kudibo yi akatôya ene, Bana ba Yelusaleme, kanungudididi ; kaninga nudididili mikyenu yi bana benu. 29Bwalo, mona, matuku alolwa anatôyabo ene, Balwangwasanibwi ndo bikuta, yi mafu atalela bana, yi mabele atanusa i bana. 30Ku kikondo kieki kunabangabo kutôyela bipongopongo ene, Nuponi kulu kwecu ; yi mpongo ene, Nutubukiii muxi. 31Ndo bencenca malo aa ku muci ukidi mai, banakwenca kai ku muci mwomu ?

32Yi banga bantu babidi, boni, bakacwadibwa yinanci kabidi kuya xipibwa.

33Yi pakafikabo ku kidi kiabikidibwa ene, Kibwongwasa, pakamukopekabo ku nkulusu koku, yi boni, umoumwe ku kidyo yi munga ku kimoso. 34Yi Yisu akatôya ene, Tete, ubalekyeli bwalo butasolubukwabo mwencencabo. Yi bakakwabanyañana bilamba bienci, yi bakacwa lubexi. 35Bantu lolo bakakwemana badi mu kutebela ; yi bantu banene kabidi bakamudidika ene, Akapandisa banga bantu ; adipandisi mikyenci ndo yei udi Kalistu a Ncembi, amasungudibwa kudiyi. 36Yi masalai kabidi akamukyeca, yi akalwa kudiyi adi mu kumulongola finika, 37ene, Ndo Owe udi Fumu a bena Yuda, udipandisi mikyebe. 38Yi mukanda ăkafundibwa kabidi kulu kwanci ku meyi a luna Ngiliki yi a luna Loma, yi a luna Ebeleo, ene, You udi Fumu a bena Yuda.

39Umoumwe lolo a boni bakakopekyebwa akamutangola ene, Owe ka kalistu ? Udipandisi mikyebe yi coco. 40Mo munga akakulumuna diyi, akamukama dikamu ene, Owe, kabidi kusocina Ncembi ? owe wamabelebwa lopelo lumolumwe yinanci. 41Yi coco twamabelebwa yi nkwami sôsôlwo, bwalo butwamangata sayi alelekyela yi makisa ecu ; mo you muntu kakixili bubi bwoso pô. 42Yi akatôyela Yisu ene, Ungwellpo lukanyi palolwa Owe ku bufumu bwebe. 43Yisu akamutôyela ene, Nkwatôyela sôsôlwo ene, Lelo unakala yinami mu Paladisi.

44Kwakadi lolo pa ola amusambomo, yi mwedima ăkalwa kulu kwa mbata muncimancima pôi ku ola a dibwa. 45Diba diakapindixibwa, yi mbuxa a ngumbu a tempelo akasambudibwa pakacikaci. 46Yi pakadi Yisu amakwamena yi diyi dikola akatôya ene, Tete, ku makaci ebe ndo kungwateka kidimu kiamene. Yi pakadi amatôya nako akakica. 47Pakamona kapalai ka masalai mwakapona, akatumbisa Ncembi ene, Sôsôlwo, you akadi muna nkwami. 48Yi bimbukuma bioso biakakokama ku kimonenu kieki, pakamonabo bintu biakapona, bakapiñana badi mu kudikuma biedi. 49Yi bungi bwabo bakamulubukwa, yi babakaxi bakamulandudila pôi ku Ngalili, bakakwemana kulekule, badi mu kutebela bintu bebi.

50Yi mona, mwamulumi, dina dienci ene, Yosefe, akadi nkolomo, muntu unengela yi a nkwami, 51akadi kasokwetabusafiana yi lukanyi Iwabo ndo yi dikisa diabo ; yei ndo muna Alimatea, bula bwa tena Yuda, akadingidila bufumu bwa Ncembi. 52Yei akaya kudi Pilata yi akalomba mumbidi ă Yisu. 53Yi akaupwesa, yi akaudinga mbuxa a susu ; yi akamuladika mu lukita lukulula mu lubwe, lutalala muntu mwoso munda mwalu. 54Kwakadi lolo dituku dia kulungika Kidikixilu, yi Sabado akadi mu kukokyela pepe. 55Yi babakaxi bakadi bamasangila yinanci pôi ku Ngalili bakalanda, bakamona lukita yi mwakatekyebwa mumbidi ănci. 56Yi bakapiñana yi bakalungika manonu yi manyi. Yi bakakwomowa ku Sabado bea biakalangibwa mulangu.

Atualmente Selecionado:

LUKA 23: Luna_NT

Destaque

Copiar