LUKA 18

1AKABATÔYELA mwele kabidi ndo kubebesa ene, baxelomba matuku moso yi kabaxepwangwa ; 2ene, Mu bula bunga mwakadi musambodi utacina Ncembi yi utanemeka bantu. 3Yi mu bula bobu mwakadi mukasa a mufu, akalwa kudiyi ene, Sombolesa you atanda yinami, angusomboli. 4Yi akanyañana kikondo ; mo kunyuma kwakaditôyelayi munda ene, Isanga kisocina Ncembi yi kisonemeka bantu, 5kaninga bwalo bwamanguxulula mukasa a mufu you nakumusombolesayi, ximbi uxengupenyusa pa kulwa lwa lwa matuku moso. 6Yi Fumu ene, Nwombwi mwatôya musambodi you utena yi nkwami. 7Ki Ncembi lolo unasombolesa bantu basungudibwi banci, bamwabila yi ku munyinya yi ku butuku, isanga amakwekyela yi kiekyelo kia mwengo ku bwalo bwabo ? 8Nwatôyela ene, unabasombolesa mangwoso. Kaninga palolwa Mwana a Muntu, yei unasañana kwetabusa pa loboko ?

9Yi akatôyela banga kabidi mwele ou bakadietabuxila mikyeabo ene, Tudi yi nkwami ; yi bakatamuna banga bantu boso ; 10ene, Bantu babidi bakabwela mu tempelo kuya lomba ; umoumwe akadi muFalixi, yi munga akadi musangi a milambu. 11MuFalixi akakwemana, akalomba nako yinanci mikyenci ene, Ncembi, nkwaxinga bwalo buntasoakala bea banga bantu, basanci, bena masalu, bena mendela, ndo isanga bea luna musangi you a milambu kumoni. 12Ngwancila bidya ncilu matuku abidi ku lumingu lwoso ; ngwalongola Ncembi kicini kimokimwe kia disangi dioso dia bima binamatetowa. 13Mo musangi a milambu akakwemana kulekule, akadi kasonanga kusangola isanga meso anci lwa diulu, kate akadikuma ku kiedi kienci ene, Ncembi, ungwombwelipo mwengo, meme, mwoni. 14Nwatôyela ene, You muntu akapinana ku ncibo anci, amasuwixibwa, kumoni yiwa. Bwalo bunapwexebwa muntu mwoso udiabandisa, yi you udiapwesa unabandixibwa.

15Yi bakacwala kudiyi bana kabidi babende nci, bixebabakayi bianca bienci ; mo pakamona beyi banci nako bakabakama makamu. 16Kaninga Yisu akababikila kudiyi ene, Nulekyeli bana babende balwi kundi, yi kanubakandi, bwalo budi bufumu bwa Ncembi bwa bena noku. 17Nwatôyela sôsôlwo ene, Muntu mwoso utasoangata bufumu bwa Ncembi bea mwana mubende kanabwela momu pô.

18Yi munga muntu munene akamwapangusa ene, Mweyexi unengela nakukisa beci ndo kukita môyo ă kô kô ? 19Mo Yisu akamutôyela ene, Kukai ungwabikila meme ene, kunengela ? Kakuna muntu udi kunengela utena umoumwe, Ncembi. 20Walubukwa milangu ene, Kwendedi mukaxi abene, kuxipi, kwebi, kudimbididi muntu, nemeka tetebe yi mabebe. 21Yi akatôya ene, Namanama nama bintu bebi bioso pôi bwabuki bwamene. 22Yi pakakwombwa Yisu noku akamutôyela ene, Ukiasaka yi kintu kimokimwe ; odisa bintu bioso bidi yinebe, yi abanyisa bakombi, yi unakala yi bobidi mu diulu ; lwaka lolo, lwa ngulandudili. 23Yi pakakwombwayi nako akadi yi buxitu bungi, bwalo bwakadiyi yi madidi mangi. 24Mo pakamumona Yisu, akatôya ene, Kai kukola, bobo badi yi madidi kubwela mu bufumu bwa Ncembi ! 25Xamo kubwela mu diso dia ndongo kudi kulebela, mo mwodidi kubwela mu bufumu bwa Ncembi kudi kukola. 26Yi bobo bakakwombwa bakatôya ene, Ape, nani unapandixibwa ? 27Mo yei ene, Bintu biamapidila bantu kwenca biamalubikibwa kudi Ncembi kwencebwa. 28Yi Pita akatôya ene, Mona, coco twamaxiya bintu biecu yi twamakulandudila. 29Yi akabatôyela ene, Nwatôyela sôsôlwo ene, Kakuna muntu amaxiya ndo ncibo, ndo mukasanci, ndo bakunyi banci, ndo tetenci yi mamanci, ndo bana banci, ku mucwe ă bufumu bwa Ncembi, 30utasodika kwangata binga bintu bungi bungi ku kikondo kieki, yi ku mwociya ou ulolwa, môyo ă kô kô.

31Yi akakokyeya disangi yi babidi kudiyi, yi akabatôyela ene, Mona, tuyeya ku Yelusaleme, yi bintu bioso biamafundibwa kudi badimuxi bwalo bwa Mwana a Muntu binafikixibwa. 32Bwalo bunalongolebwayi kudi mabila, yi unakyecebwa, yi unatangolebwa, yi unakwelebwa mati. 33Banamukuma bintu, yi banamuxipa ; yi ku dituku diamusatu kunabikayi kabidi. 34Yi bakadi kabasolubukwa bintu bebi pô ; yi diyi dedi diakabasokokyebwa, yi bakadi kabasolembetela malo akatôyebwa.

35Yi pakakokyelayi pepe yi Yeliko, mufofo akaxikama ku mwanca ă ncila, udi mu kulomba bintu. 36Yi pakakwombwayi kimbukuma kia bantu badi mu kudika, akakwapangusa pa bwalo bobu. 37Yi bakamwambila ene, Yisu a Nasalete udi mu kudika. 38Yi akakwamena ene, Yisu Mwana a Dafidi, ungwombwelipo mwengo. 39Yi bobo bakadi mu kwenda ku buxi bakamukama makamu akali polo ; kaninga yei akadika kwamena kungi, ene, Mwana a Dafidi, ungwombwelipo mwengo. 40Yi Yisu akakwemana, yi akabatôyela bamufikisi kudiyi. Yi pakadi amakokyela pepe, akamwapangusa. 41ene, Kinani kiakyeba nkukixili ? Yei ene, Fumu, ngwangati meso amene. 42Yi Yisu akamutôyela ene, Angata meso ebe ; kwetabusa kwebe kwamakupandisa. 43Yi akangata meso anci mangwoso, yi akamulandudila udi mu kutumbisa Ncembi. Yi bungi bwa bantu pakamonabo bakatumbisa Ncembi.

Atualmente Selecionado:

LUKA 18: Luna_NT

Destaque

Copiar