LUKA 16

1YI akatôyela kabidi beyi banci ene, Mwodidi akadiko akadi yi nkôngôlo akasanyibwa ku mpala anci dia kucakanisa kwa bima bienci. 2Yi akamubikila yi akamutôyela ene, Mwoximo ou udi beci ungwombombwa ku bwalo bwebe ? Ungwebesi bwaio bwa bunkôngôlo bwebe, bwalo bunalekyela owe kwakala nkôngôlo. 3Yi nkôngôlo akaditôyela ene, Nakukisa beci ? Bwalo butananguncula fumwami ku bunkôngôlo. Kiena yi ngulu ya kudima ; yi ndo kulomba lomba, nxefwa bundu. 4Ngwaiubukwa munakwenca, bixengwangatabo mu ncibo yabo, binakala namancudibwa ku bunkôngôlo. 5Yi akabikila kudiyi muna mbata mwoso a fumwanci, yi akatôyela you a buxi ene, Mbata ebe udi lwedi lwa beci yi fumwami ? 6Y akatôya ene, Ncedi ya manyi nkama tô. Yi akamutoyela ene, Angata mukanda ěbe, xikama mangwoso yi funda ene, Masangi atano. 7Akatôyela munga lolo ene, Yi owe udi yi mbata a beci ? Yei ene, Ncedi ya masangu nkama tô. Yi akamutôyela ene, Angata mukanda ěbe, funda ene, Masangi yenana. 8Yi fumu you akakwalakana nkôngôlo you utena yi nkwami bwalo bwakakwencayi yi bweso. Bwalo bwamadika bana ba loboko lolu bana ba obo bweso ku mwociya ăbo. 9Yi meme nwatôyela ene, Nudiangacili bimbila kudi bodidi bwa disalu ; mbwôso panakala bobu bwamaxikila, bananwangata mu ncibo ya kô kô. 10You udi muna kibaku ku bintu bidi bibende nci, udi muna kibaku kabidi ku bintu bingi ; yi you udi muna disalu ku bintu bibende nci udi muna disalu ku bintu bingi kabidi. 11Ndo lolo nonu kanwakadi bena kibaku ku bwalo bwa bodidi bwa disalu, nani unateka bodidi bwa sôsôlwo ku makaci enu ? 12Yi ndo kanwakadi bena kibaku ku bodidi bwa muntu abene, ñani unanulongola bodidi budi bwenu mikyenu ? 13Kakuna musadi umoumwe ubili kusadila bafumu babidi ; ndo unanyañana umoumwe yi unananga munga, ndo unanamata kudi umoumwe yi unatamuna munga. Kanusolubukwa kusadila yi Ncembi yi bodidi.

14Yi baFalixi kabidi bakananga bima bakakwombwa bintu bebi bioso, yi bakamunyokola. 15Yi akabatôyela ene, Nonu nudi bantu badiasuwisa mikyeabo ku mpala ya bantu, mo Ncembi ubili micima yenu ; bwalo bobu bwamatumbixibwa kudi bantu budi nyete ku mpala a Ncembi. 16Bwadi bwakadiko, yi badimuxi, pôi Yoano ; pôi kikondo kieki pamakwambidibwa losangu lunengela lwa bufumu bwa Ncembi, yi muntu mwoso udianyukula munda yi ngulu. 17Bwalo budi kulebela, diulu yi loboko kudika ; mo kaxidi kamokamwe ka bwadi kupona kudi kukola. 18Muntu mwoso ancula mukasanci yi angata munga dibakwa udi muna diendela ; yi muntu mwoso angata mwamukaxi dibakwa amancudibwa kudi bayenci udi muna diendela.

19Muntu akadiko mwodidi, yi akalata bilamba bia tululu a bwinu yi bia susu, yi akadya bidya bingi yi cukai matuku moso. 20Yi mwokombi akadiko, dina dienci ene, Lasalusu, akaladikibwa ku kibwelelu kia kidi kienci, amakwolubila yi mbuta, 21akakyeba kudiokutisa yi bicini biakapona paxi ku mesa a mwodidi ; kate isanga yimbwa yakalwa lafwa mbuta yenci. 22Yi mwokombi akafwa yi akacwadibwa kudi bangele ku kiedi kia Abalami. Yi mwodidi kabidi akafwa, yi akancikibwa. 23Yi akasangola meso anci mu Adese, udi yi bipekye bia kusama ; yi akamona Abalami kulekule, yi Lasalusu mu kiedi kienci. 24Yi akadila, ene, Tete Abalami, ungwombwelipo mwengo, tumapo Lasalusu abwesi sodi a lulembu lwanci mu mai, apolesi ludimi lwamene, bwalo bungwatata kusama kungi mu mwanga ou. 25Kaninga Abalami akatôya ene, Mwana, ela nkanyi mwakangata owe bintu biebe binengela ku kikondo kia môyo ěbe, yi mo nako kabidi Lasalusu bintu bibi. Mo nkyekyu yei amabondebwa kunu yi owe watata kusama. 26Yi bunga bwalo kabidi ; pakacikaci pecu yi penu pamatekyebwa dinamu dinene dia twakô ; bitasoponya bantu kusabuka bakyeba kuncuka kunu kuya kunudi, yi bitasoponya bantu kusabuka, kuncuka kunudi kulwa kutudi.

27Yi akatôya ene, Mbwôso nkwalomba tete, umutumipo ku ncibo a tetemi ; 28bwalo bundi yi bakunyi bamene batano, bixebatôbôlelayi ntôbô yi ngulu, bitaxelwabo kabid ku kidi kieki kia kusama. 29Mo Abalami ene, Badi yi Mosese yi badimuxi ; babombweli bobo. 30Mo yei ene, Kañana tete Abalami ; kate ndo muntu uxencuka kudi bafu kuya kudibo, banadibela. 31Yi akamutôyela ene, Ndo kabasokwombwa Mosese yi badimuxi, kabanakwetabuxixibwa isanga muntu uxebika kudi bafu.

Atualmente Selecionado:

LUKA 16: Luna_NT

Destaque

Copiar