Байбихьи 5
5
Адамил наслаби
1Гьале Адамил наслабазул хӀакъалъулъ къиса.
(Аллагьас инсан вижараб мехалъ, Жиндирго сипат-сураталда вижана Гьес гьев. 2Аллагьас рижана бихьинчиги чӀужугӀаданги ва гьезда баракат лъуна; Гьел рижараб къоялъ, Гьес гьезда цӀарги «инсан» абун лъуна.)
3Адамица нусиялда лъеберго сон бараб мехалъ, жиндирго гӀадаб сипат-сураталъул вас гьавуна гьесие. 4Шет абун цӀар лъуна Адамица гьесда. Шет гьавун хадубги Адамица дунялалда бана микьнусго сон. Гьесие жеги васал-ясалги гьаруна. 5Кинабниги ичӀнусиялда лъеберго сонги бан, Адам хвана.
6Шетица нусиялда щуго сон бараб мехалъ, гьесие гьавуна вас Энош. 7Энош гьавун хадубги Шетица дунялалда бана микьнусиялда анкьго сон. Гьесие жеги васал-ясалги гьаруна. 8Кинабниги ичӀнусиялда анцӀила кӀиго сонги бан, Шет хвана.
9Эношица ункъоялда анцӀго сон бараб мехалъ, гьесие гьавуна вас Кенан. 10Кенан гьавун хадубги Эношица дунялалда бана микьнусиялда анцӀила щуго сон. Гьесие жеги васал-ясалги гьаруна. 11Кинабниги ичӀнусиялда щуго сонги бан, Энош хвана.
12Кенаница лъабкъоялда анцӀго сон бараб мехалъ, гьесие гьавуна вас Магьалалэл. 13Магьалалэл гьавун хадубги Кенаница дунялалда бана микьнусиялда кӀикъого сон. Гьесие жеги васал-ясалги гьаруна. 14Кинабниги ичӀнусиялда анцӀго сонги бан, Кенан хвана.
15Магьалалэлица лъабкъоялда щуго сон бараб мехалъ, гьесие гьавуна вас Еред. 16Еред гьавун хадубги Магьалалэлица дунялалда бана микьнусиялда лъеберго сон. Гьесие жеги васал-ясалги гьаруна. 17Кинабниги микьнусиялда ункъоялда анцӀила щуго сонги бан, Магьалалэл хвана.
18Ередица нусиялда лъабкъоялда кӀиго сон бараб мехалъ, гьесие гьавуна вас Идрис. 19Идрис гьавун хадубги Ередица дунялалда бана микьнусго сон. Гьесие жеги васал-ясалги гьаруна. 20Кинабниги ичӀнусиялда лъабкъоялда кӀиго сонги бан, Еред хвана.
21Идрисица лъабкъоялда щуго сон бараб мехалъ, гьесие гьавуна вас МетушелахӀ. 22МетушелахӀ гьавун хадубги Идрисица дунялалда бана лъабнусго сон. РакӀ-ракӀалъго Аллагьасе хӀелун хьвадана гьев. Гьесие жеги васал-ясалги гьаруна. 23Кинабниги лъабнусиялда лъабкъоялда щуго сон бана Идрисица. 24РакӀ-ракӀалъго Аллагьасе хӀелун хьвадана Идрис. Цинги гьев тӀагӀана, щайгурелъул Аллагьас гьев жиндихъего Зобалазде вачун ана.
25МетушелахӀица нусиялда ункъоялда анкьго сон бараб мехалъ, гьесие гьавуна вас Ламех. 26Ламех гьавун хадубги МетушелахӀица дунялалда бана анкьнусиялда ункъоялда кӀиго сон. Гьесие жеги васал-ясалги гьаруна. 27Кинабниги ичӀнусиялда лъабкъоялда ичӀго сонги бан, МетушелахӀ хвана.
28Ламехица нусиялда ункъоялда кӀиго сон бараб мехалъ, гьесие вас гьавуна. 29Васасда НухӀилан цӀарги лъун, гьес абуна: «Нилъер ишазулъ ва БетӀергьанас нагӀана кьураб гьаб ракьалда гьарулел хӀалтӀабазулъ нилъер рекӀее хӀалхьи лъугьинабила гьас», – абун.
30НухӀ гьавун хадубги Ламехица дунялалда бана щунусиялда ункъоялда анцӀила щуго сон. Гьесие жеги васал-ясалги гьаруна. 31Кинабниги анкьнусиялда лъабкъоялда анцӀила анкьго сонги бан, Ламех хвана.
32НухӀица щунусго сон бана ва гьесие гьаруна васал: Шем, Хам ва Яфет.
Atualmente Selecionado:
Байбихьи 5: АварАК
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© Институт перевода Библии, 2005-2023
